Оваа 2025 година по се изгледа ќе биде бериќетна година, бидејќи во иста минута се родени две деца – првото момче на Клиниката за гинекологија, а второто девојче неколку секунди подоцна на Клиниката во Чаир, кажа денеска министерот за здравство Арбен Таравари. Тој заедно со неговата сопруга Нора, заменик-министерот Јовица Андовски, сопругата на премиерот Мицкоски, како и заменик-министерот за социјална политика, демографија и млади Ѓоко Велковски, Клиниката за гинекологија во Скопје го посетија првороденото бебе – Јаков.

„Ако денот се познава по утрото, можам да кажам дека ќе имаме навистина плодна и бериќетна година, затоа што само една секунда по новата година ние го породивме Јаков. На свет дојде жив машки плод со родилна тежина од 3. 190 грама и 50 см. Мајката е Сања Талевска. Јаков по името навестува убава и јака година, која се надевам на сите ќе ни биде плодна и бериќетна“, рече директорката на Клиниката, Ирена Алексиоска-Папестиев.

Таравари додаде дека оваа 2025 година по се изгледа ќе биде бериќетна година, бидејќи во иста минута се родени две деца – првото момче на Клиниката за гинекологија, а второто девојче неколку секунди подоцна на Клиниката во Чаир.

„Чест ни беше што вака заедно и со Министерството за социјална политика и сопругата на премиерот и директорката ги видовме и мајката и детенцето. И двајцата изгледаат убаво, перфектно, задоволни од услугите кои ги добиле од Универзитетската клиника за гинекологија“, рече тој.

На прашањето, дали има некој неформален натпревар со царски рез да се породи бебе само за да биде прво во новата година, Таравари кажа дека воопшто не верува во тоа.

„Воопшто не верувам во тоа, нашите доктори се професионалци. Битно е што повеќе деца да ни се раѓаат, тоа е најважно. Ние имавме група во која што добивавме информации од двете клиники во Скопје. За среќа, во иста минута добивме информација за породено дете и на Гинекологија и во Чаир, така што да се множат вакви вести да имаме што повеќе новородени деца во секоја минута“, рече Таравари.

Според директорот Небојша Настов во Универзитетската клиника за хируршки болести „Св. Наум Охридски“, на новогодишната ноќ имало вкупно 81 прегледан пациент, пет како последица на сообраќајни несреќи, тројца од физички пресметки и биле извршени три оперативни интервенции.

„За среќа во текот на новогодишната ноќ немаше повреди од петарди и огнострелно оружје, тоа беше зачестено во период пред празниците. Во последниот месец имаше 50-ина претежно малолетници на возраст од 12 до 17 години“, кажа Настов, додавајќи дека најверојатно се користат се поголеми петарди со поголемо барутно полнење и оставаат трајни оштетувања кај децата.

„За жал се користат петарди со се поголемо барутно полнење кои оставаат многу поголеми оштетувања односно траен инвалидитет кај децата“, рече тој.

На ТОАРИЛУЦ, Ургентниот центар, КАРИЛ и Ортопедија, како што информираше доктор Игор Мерџановски, биле направени околу 35 прегледи.

– Направени се околу 35 прегледи од кои девет се сообраќајки со лесни телесни повреди, тие пациенти се пуштени на домашно лекување. Имаме двајца пациенти од физички напад, едниот е задржан на опсервација и во текот на денов ќе биде пуштен дома, како и 13-годишно дете со тешка повреда на раката од петарда, кое веќе е оперирано на Детската клиника за хирургија и најверојатно ќе биде со инвалидитет на раката. Примен е и еден странски државјанин во алкохолизирана состојба со повреда на носот и на главата, згрижен е и пуштен е на домашно лекување, изјави Мерџановски.

Претседателот на Социјалдемократскиот сојуз на Македонија, Венко Филипче, оддаде почит на одбележувањето на годишнината од смртта на првиот претседател на државата, Киро Глигоров.

„Денеска се сеќаваме и оддаваме почит на првиот претседател, Киро Глигоров.
Неговите вредности и државничките одлуки оставија траен белег во нашето општество и претставуваат патоказ за идните политики за напредок и просперитет на државата.

Претседателот Глигоров е симбол на мудрост и визионерство, и неслучајно многумина го нарекуваа „Таткото на нацијата“. Во најтешките моменти, кога државата се соочуваше со предизвиците на независноста, тој направи историски чекори кои беа важни за иднината на државата. Глигоров веруваше во силата на дијалогот и помирувањето – вредности кои се подеднакво важни и денес, кога треба да продолжиме да работиме на заедничката иднина на државата.

Ние, како генерација, сме должни да ја продолжиме неговата визија за напредна и демократска Македонија, да ги надминеме сегашните предизвици и да изградиме подобра иднина за сите наши граѓани. Вечна му слава“, посочи Филипче.