Судските службеници од сите судови во Македонија во четврток излегоа на двочасовен штрајк и ја прекинаа својата работа од 10.30 до 12.30 часот и побараа измени на Законот за судска служба.

Дел од штрајкувачите се жалат и на многу ниските плати и вработувањата со партиска книшка.„Има партизираност во судството, тоа е, за жал, најголемата болка што постои и се надевам дека ќе дојдат подобри времиња. Тоа е најголемата трагедија, не се гледа квалитетот туку партиските книшки, административецот што си ја извршува професионално работата не е третиран како што треба“, изјави еден од вработените во Основен суд Скопје 2, кој не сакаше да се претстави.„Примањата се многу ниски, има службеници кои земаат од 12 до 14.000 денари, а за казнување први се. Имаме по осум часа ефективна работа. Од 1996 година судството не постои. Не е ништо регулирано. Еве, во архивата немаме сталажи за архива, сами ги правиме. Да се регулира судската служба посебно, не е обична јавна администрација“, порача Екрем Шабан, вработен во основен суд Скопје.„Мора да се изменат рестриктивните и демотивирачките одредби кои се содржани во законот за судска служба, додека не се направи, тоа ќе преземеме и вакви и други мерки кои ни ги предвидува законот“, изјави Трпе Дејаноски, генерален секретар на Синдикатот на работниците од управата, правосудните органи и здруженија на граѓани (УПОЗ) .Според Синдикатот, Законот е неповолен за вработените, предвидени се големи казни, бил донесен нетранспарентно, за многу кратко време.„Оценувањето е голем проблем, бидејќи според овој закон, 5 отсто од сите судски службеници мора да бидат казнети, а 5 отсто може да бидат наградени. Во тие 5 отсто што ќе бидат казнети – во рок од една година ќе бидат казнети со 10 отсто од платата. Исто така, само со една негативна оцена судскиот службеник може да го изгуби работното место. Со две последователни добиени оценки 2, повторно го губи работното место“, предупредија во средата од Синдикатот.Вработените излегоа пред Основниот суд Скопје 2, но ним не им се придружија колегите од најголемиот суд во Македонија, Кривичниот суд. Имаше неколку вработени од овој суд, но поголемиот дел не беа дел од штрајкот.Од синдикалната организација од Основниот суд Скопје 1, која е дел од Синдикатот на администрацијата и државна управа велат дека и тие се против тој член од Законот за судска служба, но ниту биле консултирање, ниту прашани за мислење. Според претставникот на оваа синдикална организација Драган Јосевски, има сомнеж дека овој штрајк има друга заднина, односно лидерот на УПОЗ, Пеце Груевски да си обезбеди уште еден мандат. Смета дека со ваков штрајк нема ништо да се постигне и ги повикува Владата и Судскиот совет да седнат со синдикатите и да се промени Законот за судска служба./крај/мф/ффс

Извор: Макфакс