Истанбулската интервентна полиција со солзавец и гумени куршуми ги растера собраните на поворката на трансполовите лица, која инаку беше забранета откако ултранационалистите и верските конзервативци се заканија дека насилно ќе ги спречат демонстрациите на „дегенерираните“ лица. 

Стотици припадници на интервентната полиција беа распоредени во кордон на историскиот главен истанбулски плоштад Таксим, за да го спречат одржувањето на „Транс Прајд“ кој се одржува за време на муслиманскиот свет месец рамазан.

Претходно турските власти ги забранија традиционалните поворки на трансородовите и хомосексуални лица, изразувајќи загриженоста за безбедноста по ултранационалистичките предупредувања против секаков таков настан на турска почва.

„Љубителите на фудбалот може да се собираат во оваа земја каде што сакаат. Нашето собирање е мирољубиво“, изјави портпаролот на истанбулскиот ЛГБТИ сојуз за солидарност.

„Светиот месец рамазан е само изговор. Ако го почитувате рамазан, нé почитувате и нас. Хетеросексуалците мислат дека тоа е премногу за нас, само два дена од 365 дена“, додаде.

Годишната Поворка на гордоста, која е најголемата во муслиманскиот свет, беше планирана за 26-ти јуни. Во Истанбул се одржуваат поворки за правата на хомосексуалците од 2003 година, во коишто учествуваат по повеќе десетици илјади луѓе, но минатата година беше прекината од полицијата./крај/мф/сн

Извор: Макфакс