Култура
Блескаво деби на Симон Трпчески со славниот Бостонски симфониски оркестар
Уште еден од водечките светски оркестри триумфално се најде на листата соработници на нашиот пијанист Симон Трпчески, кој три вечери по ред беше солист на матичната сцена на Бостонскиот симфониски оркестар (третиот настап директно беше пренесуван во живо на радио и интернет).
Под насловот „Во своето деби со Бостонскиот симфониски оркестар Симон Трпчески откри свежи премини низ Лист“, Џереми Ајхлер, критичарот на угледниот Boston Gloub се осврнува на настапот на нашиот пијанист од светски глас: „… меѓу другите дела беше изведен Концертот за пијано и оркестар број 2 од Лист, што за мене беше врвниот дострел на изведбата во Симфониската сала во четвртокот, во голема мерка поради свежото и блескаво исполнение на македонскиот пијанист Симон Трпчески. Вториот пијано концерт на Лист ги става на тест не само техничкиот арсенал на пијанистот, туку и неговата поетска вештина, а Трпчески, веќе докажаниот млад пијанист кој го имаше своето можеби малку задоцнето деби со Бостонскиот симфониски оркестар, се покажа достоен на секоја поставена задача од Лист. Фразирањето во неколкуте лирски моменти на делото беше мошне креативно, исполнето со воздух и светлина, со јасно чувство на елан во звукот. Дури и ненадејните пасажи што понекогаш можат да звучат само виртуозно, овде беа испорачани на карактерно различни начини и многу моменти во кои пијаното се надоврзува на оркестарот беа извезени со непогрешлива чувствителност. Оттука и надежта дека кога веќе дојде до Бостонскиот симфониски оркестар, Трпчески ќе се врати многу брзо…“ пишува угелднито американски весник.Со оценката на својот колега се сложува и Дејвид Ален од АНПРЕДИКТАБЛИ ИНEВИТАБИЛИТИ, кој пишувајќи за настапот на, како што вели, „националниот херој на Македонија“ го истакнува своето воодушевување од „сериозно компетентниот пијанист, многу поинтересен и со многу повеќе интерпретативни моќи од многумина млади пијанисти на денешнинава“. Во пресрет на концертите, нашиот пијанист даде и интервју за интернет-журналот БОСТОН МЈУЗИКЛ ИНТЕЛИЏЕНСЕР, во кое, под насловот „Македонското чудо“, зборува за своите успеси, за честа да се изведе концертот на Лист во годината на јубилејот токму со Бостонскиот симфониски оркестар, за непопуларното правило да не се изведува бис на сцената на овој престижен ансамбл, а особено се задржува на објаснувањето за традиционалната македонска музика и задоволството да ја изведува на светските сцени.БОСТОН МЈУЗИКЛ ИНТЕЛИЏЕНСЕР не остана имун и на изведбата, што ја одбележа со рецензијата во која ја истакнува моменталната врска на „ѕвездата со метеорски успех од Македонија“ остварена со публиката и оркестарот. Со суперлативи и во детали е опишано отсвирувањето на концертот на Лист, а задоволството од слушнатото го тера авторот на текстот Мајкл Роха на неколку пати на читателите да им помогне во изговорот на името и презимето на Симон Трпчески. По трите концерти во Бостон, Трпчески во мај започнува серија оркестарски, камерни и рецитални настапи во Велика Британија, а до крајот на сезоната го очекуваат и повторните средби со публиката во Австралија и Нов Зеланд.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.