Министрите за внатрешни работи на Македонија и Србија, Панче Тошковски и Ивица Дачиќ денеска на граничниот премин Табановце – Прешево го промовираа почетокот на One Stop системот на заеднички контроли на граничниот премин со што се овозможува побрз транспорт на луѓе, повеќе трговија, туризам и пријателство меѓу двете држави.

Почетокот на овој систем на заеднички контроли симболично беше означен со потпишување на Протоколот за извршување на гранични проверки на гранични премини кои го потпишаа двајцата министри на настанот. Воедно денес беше потпишан протокол за соработка за време на летната и зимската туристичка сезона кој го регулира меѓусебното испраќање на полициски службеници за помош на туристичките места и настани во зависност од потребите, што веќе функционира во годините наназад.

„Она што го ветивме го остваруваме на дело. На почетокот на оваа летна сезона, воведуваме заеднички систем на гранична контрола, кој што треба да овозможи побрз проток и помалку чекање на нашите граѓани. Денес официјално започнуваме со употребата на One Stop системот и сигурен сум значително ќе се намали времето на чекање и ќе се забрза трансферот на патници на нашите граници. Денес беше потпишан и протоколот за размена на полициски службеници во рамки на туристичките центри каде што имаме потреба во рамки на туристичките сезони“, потенцираше Тошковски.

„Целта на оваа соработка е поедноставување на комплетните процедури на граничните проверки така што полициските службеници на земјите ќе бидат овластени освен за граничните проверки на својата земја да ги извршат и проверките и за излезните гранични проверки. Едноставно воспоставуваме One Stop контрола и тоа на местото на влегувањето во државата. Со тоа едно застанување се избегнува непотребното задржување на патниците на излез. Ова е голем чекор напред посебно кога се однесува за големите празници или летната сезона која голем број луѓе ги минуваат границите“, образложи Дачиќ.

Воедно двата министри разговараа за дефинирање на соработка во вонредни ситуации како пожари за взаемно помагање и користење на ресурсите со кои располагаат двете страни при такви ситуации.

Пратеничката на СДСМ Сања Лукаревска во рамките на комисиската расправа за ребаланост на буџетот за 2025 година година истакна дека по три дена расправа се зборуваше за се, а најмалку за сите битни бројки и параметри кои ја носат државата далеку од фамозното четврто место според растот на БДП.

Несомнено е евидентно дека овој ребаланс е фискално нереален, социјално штетен и без развојна компонента и базиран на нереални макроекономски проекции, очајни капитални расходи и евидентно прекршени фискални правила, нагласи Лукаревска додавајќи дека дефицитот останува на првична проекција од четири проценти од БДП, а инфлацијата ќе порасне од 2,2 на 2,8%.

Истакна дека стапките на економски раст се превисоко поставени за да дадат погрешна слика за големината на номиналниот БДП и проекциите на буџетскиот дефицит на јавниот долг се темелат на ваквиот бомбастичен БДП излегуваат помали и тоа според владата стапката на економски раст е 3,7% светска банка прогнозира 2,6%, а народна банка 3%.

Во 2021 година растот беше 4,5%, без фалби а сега се прави спектакл за три проценти, рече Лукаревска.

Таа посочи дека вкупното задолжување со предложените измени за 2025 година достигнува вкупно 101 милијарда денари и изнесува скоро 21% од структурата на приходната страна на буџетот, што е епохално.

Во пресрет на локалните избори, со зголемувањето на расходите за пензии и плати, владата прави кратења кои директно ја погодуваат економијата и најранливите категории граѓани, истакна Лукаревска.

Таа нагласи дека субвенциите и трансферите се кратат за околу 30 милиони евра, намалени се средствата за развојни проекти за општините, поддршка за мали и средни претпријатија, инвестициите во ТИРЗ-овите, инвестиции во патна инфраструктура, инфраструктурни проекти во општините и реновирање на затворите.

Социјалните надоместоци се кратат за околу 5 милиони евра, што е најголема критика за Владата. Намалувањето на парите за „социјалните случаи“ е антисоцијална политика. Недозволиво е да се крати од најсиромашните слоеви на населението, нагласи Лукаревска, додавајќи дека грижата за почист воздух за оваа влада е само фарса, бидејќи средствата за заштита на животната средина се намалуваат за 13,4%.

Лукаревска најави дека пратеничката група на СДСМ и колаицијата има поднесено 160 амандмани на ребалансот на буџетот, кои имаат за цел да помогнат онаму каде што е најпотребно и најнеопходно, игнорирајќи ја партиската боја.

„Ставајќи ја на пиедестал човечката димензија, затоа што во овој парламент пред се сме луѓе и наша морална обврска е да го направиме сите тоа заедно, односно од понеделник од кога ќе почне амандманската расправа да изгласаме 934 милиони денари за финансиска поддршка за семејствата на загинатите и повредените во Кочани, 60 милиони денари за реновирање на болницата во Кочани и 20 милиони денари за нова опрема во болницата во Кочани и пак ќе кажам и овие средства се премалку и нема да ги врати изгубените млади животи во оваа несреќа но сепак иако не го прифативте нашето предлог-законско решение за финансиска поддршка на жртвите и нивните семејства и на повредените во несреќата во Кочани барем сега имаме обврска да покажеме една заедничка солидарност“, нагласи пратеничката на СДСМ, Сања Лукаревска.

Со шок и неверување СДСМ ја проследи намерата на Мицкоски да ги казнува дополнително граѓаните и да воведе данок на неженети и немажени, велат од опозициската партија.

Како што велат, оваа длабока конзервативна и погрешна идеја директно гази на правата, слободниот избор на граѓаните и ја ништи нивната волја.

„Ваквите недемократски мерки немаат место ни во земјите од третиот свет, а не пак во демократски држави за кои се смета Македонија. Од друга страна, Мицкоски со ова уште еднаш потврдува колку нема допир со реалноста и не ги разбира граѓаните ниту нивните проблеми. Не ги разбира ниту младите, ниту луѓето што живеат сами, ниту семејствата што едвај врзуваат крај со крај. Наместо решенија, тој нуди казни. Има огромен број на луѓе кои сакаат да се во брак и да имаат деца што ќе ги гледаат како растат во радост, но од здравствени или други причини и не можат да ги имаат“, велат од СДСМ.

Тие прашуваат дали е свесен Мицкоски дека секое трето дете живее во сиромаштија и дека половина милион граѓани живеат со плата под просечната?

„Мицкоски е човек од високата класа со саати од 60.000 евра кој јаде папаја и манго за доручек. Тој не разбира што значат економски проблеми“, велат од СДСМ.

Од таму велат дека понекогаш луѓето не остануваат сами затоа што така избрале — туку затоа што животот ги принудил, а има и такви кои се плашат дека нема да можат да се изборат со сè што оваа држава им става на плеќи.

„Партнерството, љубовта и децата не се само желба, туку и одговорност, и тие многу добро ја знаат таа одговорност. Проблемот не е што луѓето се себични, туку што државата ги остава сами во таа борба. Ова не е време за казнување на луѓето, туку време за вложување во нив. Време е да се обезбедат плати од кои може да се живее, училишта со учебници, градинки со доволно места, здравство кое не ги остава родителите да молат и да чекаат со месеци. Време е да им се даде на луѓето причина да останат, да сакаат, да се венчаат и да имаат деца тука — затоа што веруваат дека тука има иднина“, се наведува во соопштението.

Според СДСМ, решението за негативниот наталитет и иселувањето не е во понижувачки даноци.

„Решението е во тоа да се покаже дека секој тука има своја вредност, своја шанса и своја поддршка. Оние што сакаат да останат и да изградат живот овде се храбри. Наместо да ги казнуваме, треба да ги поддржиме“, велат од партијата.