Во рамки на концептот на активна и континуирана соработка со сите инвеститори во зоните, денес директорот на Дирекцијата за ТИРЗ, Гоце Димовски, заедно со заменик министерот за економија и труд, Марјан Ристески и градоначалникот на Прилеп, Борче Јовчески оствари официјална посета на Гентерм, ВИК и Инјецтион Моулдинг, компании кои работат во ТИРЗ Прилеп. Посетата опфати координативни средби со раководството на компаниите, како и обиколка низ производствените погони, сѐ со цел да се увидат предизвиците со кои се соочуваат компаниите, да се изнајде решение за наследените проблеми, како и да се разгледаат можностите.

Димовски ја нагласи посветеноста на Дирекцијата која активно работи на подобрување на условите и олеснување на административните процедури со цел создавање поконкурентна деловна клима и поддршка за понатамошен раст на компаниите. Тој истакна дека само со директна комуникација, транспарентен пристап и партнерски однос со инвеститорите може да се постигне долгорочен економски раст и развој.

Од страна на раководството на компаниите беше изразена благодарност за отвореноста и подготвеноста на Дирекцијата за соработка. Тие ги презентираа своите тековни и идни планови, потенцирајќи ја потребата од континуирана институционална поддршка, што директно ќе влијае на работните процеси и подобрување на условите за понатамошни активности.

Заложбите на дирекцијата за ТИРЗ и натаму остануваат во насока на проактивен пристап во соработката со инвеститорите, со цел навремена поддршка при решавање на проблемите, како и согледување на можностите кои се нудат, велат од таму.

„Ставот наш околу минималната плата е многу јасен и не се темели на никакви импровизации. Ние моравме како Влада, а на предлог на министерството за економија и труд да донесеме минимална вредност на минималната плата, по закон. И врз основа на тој закон луѓето од министерствата ја пресметаа и таа се усвои таква кава што е. Значи моменталната состојба на минималната плата е согласно закон кој што го договорил истиот овој Синдикат кога бил репрезентативен“, вели премиерот Христијан Мицкоски на денешната собраниска седница одговарајќи на пратеничко прашање.

Мицкоски потенцираше дека тие како Влада мора да го почитуваат законот.

„Ние мораме како Влада да почитуваме закон и сме го почитувале тој закон и сега дали на некој тоа му се допаѓа во вредност или не му се допаѓа, тоа е друго. Лично јас сметам дека треба да биде и 1000 евра минималната плата, и тоа можеби е малку. Лично сметам дека на тој начин приходите на Буџетот ќе бидат поголеми, но дали тоа бизнисот ќе може да го издржи е прашање кое што треба да го одговорат работодавачите.“, изјави тој и додаде:

„До сега надвор од закон се утврдувала вредноста на минималната плата во рамки на Економско социјалниот совет и дијалогот кој што таму го води Владата, работникот и работодавачот. Сега претставници од страна на работниците немаше, бидејќи репрезентативноста на Синдикатот истече. Во меѓувреме министерствата за правда, економија и труд и социјална политика, демографија и млади номинираа свои претставници во комисијата која што треба да определи репрезентативност на синдикатите, таа комисија е комплетна.

За време на состанокот кој што го имавме со синдикатите сите се сложија со еден предлог, а тоа е нивото од 10 проценти кое се утврдува за да се пресмета репрезентативноста од членовите на синдикалната организација да се пушти 5 проценти.

Ние не сме против, ние сме за, и веќе дадов налог да се изготват законски измени со кој што ќе биде на 5 проценти и на тој начин ќе бидат опфатени поголем бројот од синдикатите и ќе бидат дел од Економско социјалниот совет“.

Мицкоски посочи дека откако ќе се формира тој економски социјален совет подготвен е веднаш да се свика седница и доколку работодавачите и работниците се усогласат за минималната плата, тој е подготвен да се интервенира во законот.

„Откако ќе се формира овој Економско социјален совет ние сме подготвени веднаш да организираме седница и на таа седница да се дискутира за утврдување на минималната плата надвор од законскиот оној кој што е донесен, и подготвени сме веднаш да интервенираме во законот доколку работниците и работодавачите се усогласат, дали тоа ќе биде 25.000, 27.000, 30.000 денари, како ќе се договорат, ние така ќе прифатиме“, дециден е Мицкоски.

Посетата на Велика Британија претставува нов чекор во подобрување на соработката меѓу Македонија и Велика Британија. Односите се на исклучително високо ниво и во следниот период ќе работиме таквите односи да бидат на уште повисоко ниво, истакна вицепремиерот Александар Николоски по средбата со Стивен Даути, министер за Европа и Северна Америка на Обединетото Кралство.

„Во ракми на дводневната посета на високо ниво на Велика Британија, денеска остварив средба со министерот за Европа и Северна Америка, Стивен Даути, на која разговаравме за односите помеѓу Македонија и Великa Британија. Заеднички констатиравме дека односите се на исклучително високо ниво и дека во следниот период тие ќе бидат на уште повисоко ниво. Заеднички разговаравме за економската и политичка соработка, при што утврдивме дека двете држави се блиски партнери во рамки на НАТО Алијансата, исто така дека Велика Британија е стратешки партнер на Македонија, а економски е партнер број два, односно имаме извоз од 2,5 милијарди евра, што е втор најголем извоз што го остварува Македонија во било која странска држава. Разговаравме и во однос на политичките односи, разговаравме и за состојбите во Европа и војната во Украина и актуелните случувања. Разговаравме за се она што е предизвик и за Македонија и за Велика Британија и Европа и утврдивме дека политичките односи меѓу двете држави треба уште повеќе да растат“, рече Николоски.

Тој оцени дека дводневната посета на Велика Британија претставува еден нов чекор во подобрување на соработката меѓу Македонија и Велика Британија.

Велика Британија е членка на Советот за безбедност на ОН, една од петте најмоќни земји во светот, втора најмоќна земја во НАТО Алијансата и вакво партнерство со Велика Британија може да значи многу и политички и економски за Македонија.

„На Македонија и се потребни вакви пријатели и ќе продолжиме да работиме со нашите западни сојузници”, изјави вицепремиерот Николоски.