Култура
„Танц фест“ започнува на 5-ти април
Седмото издание на фестивалот за современ танц „Танц фест“ започнува на 5 април во МОБ. Отворањето на фестивалот ќе се случи со гостувањето на „Скапино“ балетот од Ротердам со една од нивните најнови продукции „Холанд плус“ и „Браво Чарли“
Годинава наградата за врвни достигнувања од областа на танцот „Менада“ отиде во рацете на Елисавета Кушовска. Специјалната награда која овој фестивал ја доделува на странци кои го помагаат развојот на современиот танц во Македонија ќе му биде врачена на Самоил Вуерстен, уметнички директор на Ротердамска академија за современ танц, „Холанд денс“ фестивалот и „Степс“ фестивалот во Швајцарија. „Се надевам дека ќе имаме програма која ќе биде на задоволство на публиката и со тоа што ќе го направиме,ќе придонесеме за развој на танцовата сцена во Македонија и нејзино претставување надвор. Во рамките на програмата ќе гостуваат: театарот „Фјодор Достоевски“ со мултимедијална претстава „Синопсис“ која ќе се одвива во Драмски театар и ќе гостува во Народниот театар Битола, Загребачки плесни ансамбал од Хрватска „Интерфест“, балетот од Косово кој ќе гостува со претставата „Љубовта која убива“ на сцената на Албанскиот театар. Фестивалот во Скопје ќе заврши со гостувањето на Истанбулскиот балет со нивната хит претстава „Дон Кихот“ на 12 април, а во Битола со претставата „Меѓусвет“ на Скопје танцовиот театар на 13 април. Фестивалот станува врвен настан кој го следат европски новинари, менаџери и уметнички директори,“ изјави Рисима Рисимкин првиот човек на „Танц фест“„Современиот танц е дел од современото живеење, многу е добро што се развива на едно вакво ниво и преку овие активности Македонија се поставува на мапата на културните светски случувања во современиот танц. Тоа е добра промоција на самата земја на светско ниво,“ изјави амбасадорот на Кралството Холандија во Македонија, Симоне Филипини која е голем поддржувач на современиот танц во Македонија.„Мојата работа за сите овие 35-36 години вроди со плод. Македонскиот балет се разви на едно светско ниво, а македонските школи се меѓу најдобрите светски школи. Со гостувањата надвор покажуваат дека се едни од најдобрите. Горда сум што од мојата класа произлегоа најдобрите играчи скоро сите првенци, солисти, ансамбл играчи,“ изјави Елисавета Кушовска, добитникот на наградата „Менада“Програмата ќе се одвива на повеќе сцени покрај во МОБ, претстави ќе има во Драмски театар, Албански театар и Народниот театар во Битола. Фестивалот е поддржан од Министерството за култура и Амбасадата на Кралството Холандија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.