Во Музејот на Македонија денес беше промовирана „Порта археологика“, прв итнернет портал за македонската археологија

Станува збор за индивидуална работа на група ентузијасти кои на овој начин го даваат својот придонес во областа на археологијата.„Основната цел на веб-порталот ‘Порта археологика’ е да се овозможи на идните генерации научници, археолози и сите оние што се заинтересирани за археологијата да добијат релевантни информации. Независно дали се интересирате за одреден археолошки локалитет, или некоја тема, како оружје, или период, на пример – антика, и слично, веб-порталот може да послужи како појдовна точка од каде можете да ги почнете своите истражувања. Тоа е главната цел на порталот“ –  објасни Горан Санев, виш кустос археолог во Музејот на Македонија и магистер по археологија.Иницијатор и уредник на „Порта археологика“ е м-р Горан Санев, вработен како виш кустос археолог во Музеј на Македонија. На подготовката на порталот работеа и м-р Александра Папазовска – Санев и м-р Славица Бабамова, виши кустоси археолози во Музеј на Македонија, како и Зоран Ивановски (Порта дигитал) и Благоја Мартиновски (веб-дизајн).„Подготовката на порталот почна во 2000-та година, кога работев на вториот том на изданието Археолошка карта на Македонија, и тогаш пред себе имав богата библиографија од околу 800 единици. Уште тогаш се разви идејата сето тоа да се надополни, да се собере сè што е напишано за археологијата на едно место и од тогаш почна прибирањето на материјалите. Финалната подготовка почна пред две години, кога ги посетивме сите библиотеки и се исцрпи целата библиографија што можевме да ја пронајдеме и сега во промовираниот портал имаме околу 2400 библиографски единици“ – објасни Горан Санев.Библиографскиот каталог во рамки на порталот е првата категорија во секцијата „Библиографија“ која е фокусирана на презентација на научните достигнувања во македонската археологија. Во оваа категорија ги има и селекциите Периодика, Антички извори, Дисертации и Соопштенија.„Причините за подготовка за порталот имаат и друга позадина, бидејќи секогаш во странство за Македонија велат дека е егзотична земја затоа што немаат информации што работиме, не знаат кои се нашите резултати и достигнувања. Со порталот се создава можност странските научници да видат што се работи во областа на археологијата во Македонија, да се развијат нови соработки, да дојдат нови институции кои сакаат да соработуваа со нас. На тој начин ќе се отвориме кон светската археологија, а на тој начин ќе го подигнеме и нашето ниво“.Тимот на „Порта Археологика“ како особено важни ги смета информациите за актуелните случувања во македонската археологија. За пласман на ваквите информации подготвени се селекциите Археолошки ископувања и Настани.Како посебна секцијата на порталот може да се најде единицата Адресар/линкови, преку која секоја заинтересирана странка може да ги добие основните информации за институциите кои се занимаваат со истражувањето и заштитата на археолошкото наследство, нивната контакт адреса и линк до интернет-страницата.Порталот „Порта археологика“ може да се пронајде на веб-адресата www.porta-archaeologica.com.