Иднината на Македонија е во НАТО и ЕУ, но блокадата која  трае 6-7 години за членството во НАТО и почнувањето на преговорите за членство во ЕУ, ни направи голема штета на секаков план, вели премиерот Никола Груевски во интервју за Press24.

„Иднината на Македонија е во НАТО и ЕУ. Патем речено тоа го имаме демонстрирано и преку бројните наши учества во НАТО и ЕУ мисиите, како што се мисиите во Авганистан, Ирак, БиХ итн. Значи,ниту  јас ниту владата  немаме дилеми по ова прашање. За жал блокадата која ја имаме овие 6-7 години за членството во НАТО и почнувањето на преговорите за членство во ЕУ, мислам дека ни направи голема штета на секаков план“, вели Груевски.

Како коментар на појавата на руски знамиња и маици со Путин на митингот на ВМРО-ДПМНЕ, Груевски вели дека станува збор за работи што ги направиле некои индивидуалци, а бидејќи живееме во демократија не може да им се забрани на луѓето што да облечат или кого да симпатизираат.

На прашањето дали смета дека САД, или Германија, Франција или Британија стојат зад кумановските настани, поточно кога полицијата во вооружен акција ликвидира десет и уапси повеќе терористи, Груевски вели дека за да смета такво нешто треба да има елементарни докази или барем индиции, а такво нешто нема.

„Досега немаме податок дека некоја држава, или нејзина разузнавачка служба, вклучувајќи ги и гореспоменатите, дала логистика или на било кој начин  ја поттикнало криминално терористичката група да го стори делото. А впрочем и не гледам зошто токму држави кои толку многу инвестирале досега во стабилноста и развојот на Македонија би помислиле да ја дестабилизираат истата“, додава Груевски.

Тој смета и дека токму овие четири велесили не стојат зад снимените телефонски разговори на владини функционери, кои ги објавува опозицијата, но сепак вели дека постојат три докази дека се работи за странска служба, но од друга држава.

„Прво, дека самиот Заев ми кажа и пет пати ми повтори дека странска разузнавачка служба го снабдила со материјалот. Второ, во самите компјутери на првоосомничениот најдени се транскрипти од телефонски разговори на политичари преведени на англиски јазик кој се користи во меѓународна комуникација и помеѓу држави каде англискиот не е официјален јазик, очигледно наменети за странци. И трето, во исказите двајцата  од осомничените,а едниот од нив и со судска пресуда, се кажува дека самиот Верушевски им говорел дека материјалите кои тие илегално ги снимале, за што признаа дека примале и парична надокнада, се наменети за странска разузнавачка служба. Тоа се искази на неговите соработници“, вели Груевски.

За гасоводот Турски тек, Груевски вели дека кога Брисел и Москва ќе постигнат договор за овој  проект, ние би се вклучиле во него.

За решавање на спорот со Грција околу устаното име на Македонија, Груевски вели дека за жал во овој момент  Грција е целосно фокусирана на нивниот финансиски проблем во земјата.

„Се надевам дека по неговото надминување, односно по надминувањето на неговата критична фаза,  ќе се фокусира и на овој проблем чие решавање е од интерес на двете страни“, додава Груевски.

За неодамнешната изјава на премиерот на Албанија, Еди Рама дека Македонија не може да стане дел од НАТО без целосно да го имплементира Охридскиот договор, Груевски вели дека во интерес на граѓаните на Македонија и на Албанија е најбрзо интегрирање на двете земји во ЕУ и наше интегрирање во НАТО, каде што Албанија е веќе член. /крај/п24/бб