Култура
Искра Шукарова ја заврши кариерата како класичен балетски уметник
Балетот „Рајмонда“ ќе се изведе в сабота на 12 март со почеток во 20ч. Солисти на оваа балетска претстава ќе бидат Александра Мијалкова, Сергеј Сидорски, Дмитро Чеботар и Искра Шукарова која воедно слави 20 години балетска кариера.
Скопје/9.3.2011/(Макфакс) Балетот „Рајмонда“ ќе се изведе в сабота на 12 март со почеток во 20ч. Солисти на оваа балетска претстава ќе бидат Александра Мијалкова, Сергеј Сидорски, Дмитро Чеботар и Искра Шукарова која воедно слави 20 години балетска кариера. Со оркестарот на МОБ ќе диригира Едуард Амбарцумјан кој е чест гостин од 2007 година.„Рајмнодна“ беше оценета добро од публиката, а тоа го дознавме од анкетните листови кои за првпат ги воведовме од неодамна. По враќањето од Италија, балетот е во добра форма, а се надевам дека нивото и овој тренд ќе се задржи. Ги надминуваме проблемите со екипата бидејќи сме малку, а се случуваат и повреди,“ изјави Горан Божинов уметнички директор на Балетот.„Задоволство ми е што по две години повторно ќе имам можност да настапам во улогата на Рајмонда. Последен пат во оваа улога настапив во Прага. Драго ми е што ќе играм со Сергеј и мојата пријателка и колешка Искра,“ изјави примабалерината Александра Мијалкова.„Со оваа претстава ќе ја заокружам мојата 20-годишна активност како балетски класичен уметник. Имав можност и чест да соработувам со извонредни кореографи, педагози и да реализирам 30 улоги. Публиката можеби повеќе ме препознава и ме идентификува со современиот танц, но 20 години МОБ е мојата матична куќа каде одиграв значајни улоги за мене како Иштар во „Гилгамеш“, „Уличната танчерка“ во Дон Кихот, Па де труа во „Лебедово езеро“ и други. Работев и како кореограф, а оваа соработка со МОБ и понатаму ќе ја продолжам. Кореографите повеќе ме ангажираа во драмскиот и современиот репертоар, но со оваа претстава ја завршувам кариерата како балетски класичен уметник. Драго ми е што е токму балетот Рајмонда и што настапувам со оваа екипа,“ изјави Искра Шукарова која работи на балетот „Болеро“ во кој главната улога ќе ја толкува Александра Мијалкова и премиерата ќе биде изведена на 13 април. крај/сж
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.