По снимките што ги објави опозицијата во коишто наводно судиите се избираат партиски и се колнат пред носителите на извршната власт, првиот судија, односно претседателката на Врховниот суд, Лидија Неделкова уверува дека граѓаните треба да веруваат во правораздавањето на судиите во Македонија, бидејќи, според неа, имаат капацитет да се справат со сите предизвици, пред сé, затоа што имаат професионални знаења и вештини и постојано го надградуваат своето знаење.

Неделкова вели дека ги слушнала објавените разговори на опозицијата, но за неа не е познато дали тоа било навистина така. „Не ми е познато што се правело, тоа треба да ги прашате тие што тоа го правеле“, вели.Името на претседателката на Врховен суд се споменува во еден од објавените разговори во коишто наводно директорот на Управата за безбедност и контраразузнавање, Сашо Мијалков зборува со судијката Софија Лаличиќ и ја информира дека ја избрале за судија во Основниот суд Скопје 1, иако конкурсот за избор сé уште не бил завршен.Во разговорот Лаличиќ вели дека „токму Лидија“, се претпоставува дека мисли на претседателката на Врховниот суд, лобирала да се избере судијката Лидија Петровска за судија во Основен Суд 1, на истиот конкурс заедно со Лаличиќ. Втората во презентираниот разговор уште тврди дека Петровска ја „купила“ со подароци „Сваровски“.Неделкова, пак, не е сигурна дека токму таа е судијката за којашто разговараат, но тврди дека никогаш не добивала подароци. „Јас немам што да го коментирам тоа, бидејќи јас не чув дека токму јас сум таа (што лобирала –з.м.). Беше споменато Лидија, но има многу Лидии во судството, не знам дали сум баш јас таа. Не сум добивала подароци, како што гледате повеќе сум љубител на бисери отколку на ’Сваровски’“, изјави Неделкова. Таа вели дека резултатите и знаењето никој не може да им ги земе на судиите. Кога Законот дозволувал 50 отсто од судиите да се избираат од стручните соработници односно од другите кадри, а 50 отсто од завршените судии во Академијата за судии и јавни обвинители, оние кои ги предлагале морале да имаат познавање за нивните квалитети.„Не е дозволено да се предлага кандидат кој нема одредени квалитети. А квалитетите се манифестираат преку резултатите кои никој не може да му ги земе на судијата, професионалноста, знаењето и интегритетот никој не може да му ги земе на еден судија, и затоа верувам дека секој го предлагал судија го имал ова на ум“, рече Неделкова.Одлуките на судиите, според неа, се проверуваат редовно во две инстанци – Основните судови, кога ги носат одлуките, и Апелационите судови, кога ги проверуваат тие одлуки по жалба, а секако и пред Врховниот суд по вонреден правен лек.„На општа седница на Врховен суд не се разговараат вакви теми, но може да се отворат на Комисии и етичките совети кои се формирани преку кодексот за судска етика. Јас мислам дека Здружението на судии, на кои сум и јас член, даде изјава без разлика дали на некој му се допадна. Навистина сметаме дека судиите имаат интегритет и знаење, и треба да верувате во работата на судиите. Ова се претвори во јавно судење. Треба да се почитува судството, а дали и тоа се случувало не можам да коментирам, бидејќи не знам“, истакна Неделкова.И претседателот на Здружението на судии, Николчо Николов не ги коментира објавените снимки и тврди дека судиите судат по Устав, закон и меѓународни договори. Здружението имаше средба и издаде соопштение во кое тврдеше дека судиите работат професионално и чесно.„Евентуалните обвинувања за тоа како се избираат судиите, мислам дека треба да ги упатите во Судскиот совет, дали тоа што се пласира во јавноста преку некои наводни прислушувани разговори, автентични или неавтентични затоа што за мене секое прислушување е забрането надвор од она што е дозволено со евентуалните одобрени ПИ (Посебни истражни) мерки во законска постапка. И оттука не сакам да навлегувам и да коментирам што се зборува во тие изјави и соопштенија. Она што здружението може да го коментира е во врска со работата на судиите и нивното поимање и прифаќање на судскиот кодекс“, рече Николов.Врховниот суд во вторник одбележа 70 години јубилеј од своето постоење, токму на Денот на правосудството.Неделкова го промовираше издавањето на „Збирката судски одлуки 2004-2014“ на Врховниот суд , додека Николов “Кодексот за судиска етика на судиите во Република Македонија“ донесен од Собранието на Здружението на 20-ти јуни минатата 2014 година.На приемот присуствуваше и јавниот обвинител Марко Зврлевски, поранешниот претседател на Врховниот суд, Јово Вангеловски, претседателката на Уставниот суд, Елена Гошева, сегашни и поранешни судии./крај/мф/ффс