Зајакнување на соработката помеѓу домашните стопанственици и странските инвеститори позиционирани во Република Македонија, беше тема на денешната дебата, која се реализираше од страна на Министерството за економија.

„Денешниот настан е еден вид на дебата помеѓу Владата, стопанските комори, домашните и странските инвеститори, при што очекуваме од неа да произлезат заклучоци, нови идеи и предлози, кои што ќе бидат дистрибуирани до Владата на Република Македонија и во наредниот период да бидат преточени во конкретни законски решенија. Последниот период во јавноста се остава впечаток дека домашните инвеститори ги немаат истите услови како и странските инвеститори, па тоа и нѐ поттикна да ја организираме дебатата, поради тоа што во ниту еден закон не постои разграничување или, пак, некакво ограничување на домашните инвеститори. Односно, тие услови што важат за странските инвеститори, важат и за домашните”, истакна Сараќини, додавајќи дека главна цел е привлекување на инвестиции, како странски, така и домашни, отворање на нови работни места, зголемување на извозот и зголемување на севкупниот економски раст во земјата.

Сараќини информираше дека во Технолошко индустриските развојни зони (ТИРЗ), секој ден сѐ повеќе расте бројот на вработени, па во моментов, во ТИР – зоните работат околу 2.600 работници, а во блиска иднина се очекуваат 1.600 нови вработувања.

Што се однесува до растот на извозот од зоните, тој истакна дека во првиот квартал во 2014 година само зоните реализирале извоз од 250 милиони евра, и доколку се спореди со минатогодишните 126 милиони за првиот квартал, може да се констатира дека има раст од дури 95%. Очекувањата се дека до крајот на годината дури 30 до 35% од вкупниот извоз ќе биде реализиран од страна на зоните.

„Вториот момент е диверзификација на производите. За првпат во Република Македонија во последните неколку години почнавме да извезуваме готови производи со додадена вредност. Доколку досега нашиот извоз беше насочен главно на три или четири производи од текстилната индустрија, металната или челичната индустрија, сега од РМ се извезуваат готови производи со додадена вредност, почнувајќи од катализатори, автомобилски делови, автобуси и итн.”, истакна Сараќини.

Министерот за странски инвестиции Веле Самак рече дека последните две – три години се зголемува бројот на странски инвестиции кои се распределени на цела територија на РМ.

„Овие инвестиции имаат отворено околу 20.000 нови работни места. Тоа значи дека сѐ поголем број на домашни фирми имаат можност директно да партиципираат, не само во почетните фази, како што е изградбата и поставувањето на капацитетите, туку и долгорочно во производниот циклус на овие странски инвестиции. Наша желба и цел е да овозможиме што повеќе домашни фирми да се интегрираат, да ги искористат можностите, да видат каде се тие потенцијали, да инвестираат во нови машини и капацитети и да го започнеме тој дијалог на едно подетално ниво, како домашните фирми да се интегрираат во овие долгорочни производни процеси на странските фирми”, истакна Самак.

Претседателот на Стопанската комора на Македонија, Бранко Азески, истакна дека дебатата е вистинскиот начин преку која можеме да ги зајакнеме веќе постоечките релации на домашните со странските инвеститори, па оттаму и очекувањата такви резултати и заклучоци да произлезат од неа. Стопанската комора е на ставот да се креираат и други механизми за поддршка на домашните компании и на тој начин да се влијае на нивна рамноправна позиција на пазарот.

Според Азески, комбинација од добри услови за привлекување на странски инвестиции и голема поддршка на домашните компании ќе создаде можност за задржување на постојната стапка на раст и нејзино зголемување во блиска иднина. /крај/со/мф