Економија
Занаетчиска комора: Замираат занаетите за кои има голема побарувачка
Занаетчиската комора на Град Скопје апелира до младите своето образование да го продолжат во стручните училишта поради тоа што сé повеќе занаети, за кои побарувачката е голема, изумираат.
Традиционалната манифестација „Денови на занаетчиството” се одржува и оваа година во Старата скопска чаршија. Од четврток до сабота, учениците од стручните средни училишта во Скопје ќе вршат презентација на занимања и струки, а во рамки на манифестацијата се одржува и Пролетен базар на креативни рачно изработени предмети.
Претседателот на Занаетчиската комора на Град Скопје, Никола Петров, изјави дека целта на манифестацијата е да се доближат учениците до занаетот.
„Сакаме да ги насочиме и слабите и одличните ученици во развој на занаетчиството и обука за занаетчиски дејности за понатака тие за себе да си обезбедат егзистенција”, изјави Петров во четврток на отварањето на манифестацијата.
Тој предупреди дека многу занаети за кои има потреба се во изумирање, а за некои, пак, од година во година има сé поголем интерес.
„Од година во година сé повеќе имаме ученици во атрактивните училишта – козметичари, фризери и слаткари, но ние не ги гледаме само тие струки. Сакаме да ги развиеме сите други. Има недостиг во многу струки, не оние што времето ги прегази и економската ситуација не им дозволува да се развиваат, туку имаме занаети, како што се пластичари и часовничари, кои што веќе ги нема. Полека, полека ги снемува, а побарувачката за нив е голема”, истакна Петров и упати апел до младите да посветат поголемо внимание за своето образование во занаетчиството.
Тој додаде дека проблемот за изумирање на некои занаети можеби лежи во родителите на учениците, затоа што децата на 14 години сé уште не се зрели за да одлучат каде би го продолжиле образованието.
Петров изјави дека Занаетчиската комора реализирала успешен пилот проект со АСУЦ „Боро Петрушевски” од каде што 14 ученици од смерот за автокаросериски механичари посетувале обука кај механичари, кај кои по завршување на образованието биле вработени.
Во рамки на „Денови на занаетчиството” се одржува и Пролетен базар на креативни рачно изработени предмети кои својата шанса за претставување на нивните дела ја гледаат на оваа манифестација. Со свој штанд беше присутна и Даниела Наумовска, која изработува накит и која веќе три години води сопствен бизнис.
„Со изработка на накит се занимавам седум години. Ја открив многу старата техника на плетење и ткаење жица, и тоа со бакарна и месинг жица којашто претставува претходник на филигранот. Веќе три години сум регистриран член на занаетчиската комора и ова ми е професија, а по образовение сум професор по англиски јазик, но се најдов себеси во изработката на накит и продолжив во оваа насока. Ваквите проекти ни помагаат да се усовршиме и да опстанеме на пазарот”, рече Наумовска.
На базарот може да се најдат и тезги на кои се изложени рачно изработени слики од срма, плетена гардероба и накит изработен во различни техники./крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Меморандум за соработка во полето на гасниот сектор помеѓу Македонија и Србија: ќе се испитува можноста за развој на нова директна врска меѓу двата системи за гас
Министерство за енергетика, рударство и минерални суровини на Република Северна Македонија склучи Меморандум за соработка во полето на гасниот сектор со Министерството за рударство и енергетика на Република Србија, во просториите на Владата.
Гасниот интерконектор Северна Македонија – Србија е означен како Водечки проект за енергетиски мрежи во рамки на ЕУСАИР (EU Strategy for the Adriatic and Ionian Region) со што ќе се обезбеди сигурност во снабдувањето за регионот на Југоисточна Европа и ЕУ по пат на имплементација на проектите од Јужниот гасен коридор на ЕУ и Трансбалканскиот гасен прстен, преку диверзификација на рутите и изворите за снабдување со гас.
Со меморандумот се предвидува испитување на можноста за развој на нова директна врска меѓу двата системи за гас. Во рок од 9 месеци ќе се изработи Физибилити студија и Студија за оценка на влијание на проектот врз животната и социјалната средина за новата гасна интерконекција помеѓу државите.
Врз основа на резултатите од техничките и пазарни истражување и земајќи ја во предвид постојната инфраструктура за пренос на гас кај двете страни, Страните ќе ги анализираат и ќе превземат соодветни одлуки за реализација на проектот и координирање на понатамошни дејствија.
Економија
Зголемување на цената на горивата
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 1,81% во однос на одлуката од 30.9.2024 година.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 1,00 ден/лит.
Малопродажната цена на Екстра лесното масло за домаќинство на (ЕЛ-1) се зголемува за 1,50 ден/лит.
Малопродажната цена на Мазутот М-1 НС се зголемува за 1,108 ден/кг и сега ќе изнесува 42,780 ден/кг.
Економија
Претседателката на ММФ: Живееме во свет на бавен економски раст и високи долгови
Меѓународниот монетарен фонд може да им помогне на земјите да се приспособат на бавниот економски раст и високиот долг бидејќи ова е светот во кој моментно живееме, изјави денеска претседателката на Меѓународниот монетарен фонд (ММФ), Кристалина Георгиева, на конференцијата за одржливост во Хамбург.
Според неа, тоа значи дека реформите што придонесуваат за раст, подобрување на инвестициската клима и напредок на пазарот на трудот треба безмилосно да се одложат.
„Меѓународниот монетарен фонд може да им помогне на своите членки да ги спроведат неопходните реформи, со што овие земји ќе имаат потенцијал да го зголемат растот на БДП во текот на четири години за осум отсто“, додаде Георгиева, пренесува „Танјуг“.
Конференцијата беше отворена со говорот на германскиот канцелар, Олаф Шолц.