Второ продолжение на 80 – та седница на Собранието на Република Македонија на кое пратениците ја продолжија расправата по Предлог буџетот за 2014 година.

Спротивставени ставови, негодувања од двете страни, критики и пофалби. За опозицијата лошо проектиран и катастрофален, за владејачкото мнозинство развоен. Вака денеска се развиваше дебатата во Собранието на Република Македонија по однос на расправата за буџетот за идната година.

Лошо проектиран и катастрофален. Граѓаните нема што да очекуваат од него, оцени пратеникот од редовите на СДСМ, Горан Сугарески, кој посебно внимание посвети на борбата со невработеноста и странските инвестиции.

Тој ги оспори мерките за вработување на Владата и ги оцени како непродуктивни бидејќи, како што истакна, 400 илјади луѓе ја напуштиле земјава до сега. Во однос на инвестициите, рече Македонија е последна во регионот. Во своето обраќање побара да се издвојат средства за патниот правец Прилеп-Велес.

„Од 2008 година ова е шести буџет како барам средства за патот Прилеп – Велес. Патниот правец е во катастрофална состојба, гледано и од безбедносен аспект, а во пелагонискиот регион живеат над 300 илјади жители“, рече Сугаревски.

На неговото излагање реплицираше Ане Лашкоска од ВМРО-ДПМНЕ, која истакна дека во Прилеп се завршени или во фаза на имплементација повеќе проекти планирани за 2013 за подобрување на животот на граѓаните. Таа посочи дека во градот почна изградба на 78 социјални станови, формирано е јавно претпријатие за превоз и набавени се автобуси, набавена е опрема за селекција на отпад итн.

За претставниците на Албанците од опозициониот блок буџетот е дискриминирачки. Илјази Садие од ДПА рече дека и покрај забелешките, Владата продолжува да ја загрозува иднината на земјата со нови задолжувања, а расте внатрешниот и надворешниот долг на државата. Оцени дека се лоши состојбите во стопанството, здравството и образованието, а народот осиромашува.

„ДПА предложи 57 амандмани на буџетот за да се подобри состојбата и за праведна распределба на буџетските средства за проекти за патишта, за обезбедување питка вода, за реконструкција на училишта, болници и др. Но за жал не наидовме на разбирање кај парламентарното мнозинство, а ДУИ како партнер во оваа коалиција со голема посветеност помага во дискриминацијата на Албанците“, рече Илјази.

Беким Ќоку од ДПА се осврна на проектот Скопје 2014 и истиот го оцени како непотребен, кич и антиалбански, за кој вели се одлеале над 700 милиони евра, а кој го поддржале пратениците од ДУИ. Според него, ДУИ како партнер на власта нема никакво влијание врз институциите кои се задолжени за финансиите, поради што добиваат само трошки од средствата во буџетот. За странските инвестиции, пак, рече се инвестиции главно лоцирани во источна Македонија, каде се вработуваат само Македонци, а ТИРЗ Тетово е запоставена.

Од ДУИ реагираа дека предложените мерки на ДПА веќе се во плановите на Предлог буџетот и дека до сега остварени се многу проекти меѓу кои проектот за регионален водовод во Општина Липково започнат во 2009 година, во вредност од девет милиони евра, за кој се завршени првите две фази и сите села во таа општина се опфатени со водоводна мрежа./крај/мф/ап