Македонија
Заев нема да оди на преговорите во Брисел
Лидерот на oпозициската СДСМ, Зоран Заев во петок објави дека тој нема да присуствува на преговорите во Брисел закажани за 10-ти јуни со посредство на еврокомесарот за проширување, Јоханес Хан.
Причината за оваа одлука, како што рече Заев, била изјавата на Хан којашто ја даде во петок во Вашингтон, којашто според него, била пристрасна и несоодветна.„Изјавата во Вашингтон на Јоханес Хан, еврокомесарот за проширување на ЕУ, содржи елементи на пристрасност и е несоодветна во подготвителниот период пред одлучувачката средба во Брисел. Зачудува оценката на Хан за генерално позитивни извештаи од набљудувачката мисија на ОБСЕ-ОДИХР за последните изборни циклуси во Македонија. Ниту ОБСЕ, ниту ЕУ досега не констатираа дека извештајот за изборите во Македонија е позитивен. Дополнително доказите од проектот ‘Вистината за Македонија’ ја разоткрија меѓу другото и криминалната позадина на повеќе изборни циклуси во Македонија организирани и спроведени од Никола Груевски и неговата власт. Ние во целиот овој период се однесуваме максимално демократски и седнавме на заедничка маса и покрај нерамноправната позиција во којашто бевме поставени“, изјави Заев на прес-конференција попладнево.Тој истакна дека и по разговорите во Скопје на 2-ри јуни против него бил покренат уште еден обвинителен акт за поткуп, а продолжиле и нападите врз неистомислениците на власта„По разговорите на 2-ри јуни во Скопје подигнат е уште еден обвинителен акт против мене и тоа за земање поткуп, иако кривичната пријава на МВР беше за обид за поткуп. Направена е диверзија на автомобилот на синот на Зоран Верушевски во којшто се возат негови деца и внуци, направени се нови претреси на домовите на притворените лица, палени се возила, напаѓани се неистомисленици на власта. Дадовме максимум во овој сериозен процес и очекувавме тоа да се почитува од сите страни“, изјави Заев. На средбата што беше закажана на 10-ти јуни во Брисел требаше да се финализираат деталите за тоа како да се излезе од политичката криза, откако беше договорено да се одржат предвремени парламентарни избори во април 2016 година.Хан во Вашингтон во четврток изјави дека доколку нема политички договор за кризата во којашто се најде Македонија, земјава може да ја изгуби препораката за членство во Европската Унија./крај/мф/ст
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Променливо облачно и нестабилно со пороен дожд и грмежи
Времето денеска ќе биде променливо облачно и нестабилно со пороен дожд и грмежи, особено во источните делови. Локално процесите ќе бидат во форма на краткотрајно невреме со засилен ветер и услови за изолирана појава на град. Минималната температура ќе биде во интервал од 7 до 12, а максималната ќе достигне од 14 до 22 степени.
Во Скопје променливо облачно и нестабилно со пороен дожд и грмежи. Во делови од котлината ќе има услови за краткотрајно невреме со засилен ветер и изолирана појава на град. Минималната температура ќе се спушти до 10, а максималната ќе достигне до 21 степен.
Продолжува периодот на променливо облачно време со повремени локални врнежи од дожд, освен во недела кога ќе биде претежно стабилно и потопло. Во сабота ќе дува засилен северен ветер.
Македонија
Нема подолги задржувања за влез и излез од државата
Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Тренчевска: Од 2017 година до денес најниската исплатена пензија ја покачивме за 5.309 денари
„330% повисока социјална помош, 53% повисоки пензии, 180% повисока минимална плата, 40 000 просечна плата се нашите резултати и знам дека тоа можеби не е доволно. Затоа вечерва стојам пред вас не како жена, туку како ваша пријателка и комшивка, како жена која работеше со интегритет и бара поддршка за број 1 на 8 мај“ порача Тренчевска од говорницата на митингот во Радовиш.
Ко-носителката на изборна единица 4 од СДСМ, Јованка Тренчевска вечерва на радовишани им порача дека вистинскиот избор е јасен и дека само СДСМ е опција која ќе го води напредокот на општеството.
„Вие највозрасните кои гледам ве има тука во голем број, а со кои деновиве често се среќавав и често ме прашувавте зошто не може покачување од 5000 денари за секој од вас, Ве потсетувам дека од 2017 година до денес најниската исплатена пензија ја покачивме за 5.309 денари, и овој месец најниската исплатена пензија изнесува 13 880 денари. Стабилната исплата на вашите пензии ќе биде доведена во прашање со лажните ветувања на ВМРО, кои слушам деновиве дека започнаа да го раситнуваат лажното покачување на пензиите на месеци, на години и на нови методологии. Знаат и тие дека на лагата и се кратки нозете! Знаат дека 5000 линеарно е невозможно. Но дека е добро за да манипулираат со највозрасните“ рече Тренчевска.
Таа истакна дека во новиот мандат СДСМ се обврзува минималната пензија да ја покачи на 20.000 денари додека просечната пензија ќе ја покачи на 30.000 денари.
„Да продолжиме да градиме мостови посилни од ѕидовите и омразата кои ни ги наметнува ДПМНЕ“ истакна Тренчевска во нејзината покана за граѓаните за да излезат на гласање на 8ми мај.