Црна хроника
Кумановец побегнал од затвор и украл 16 златни ланчиња
СВР-Скопје, Одделение за имотни деликти и малолетничка деликвенција Центар и Бит Пазар, до ОЈО Скопје поднесе кривична пријава против 31-годишниот И.С. од Куманово поради основано сомнение дека извршил кривично дело „разбојништво“ предвидено и казниво по чл.237 од КЗ на РМ.
Имено, на 18-ти декември минатата година, со намера да се стекне со противправна имотна корист пријавениот, инаку осудено лице кој се наоѓал на издржување казна затвор во КПУ затвор Куманово – отворено одделение во Крива Паланка, додека бил во бегство од затворот, извршил кривично дело разбојништво при што одзел 16 златни ланчиња, и се стекнал со противправна имотна корист од околу 375.190 денари.
Кривичното дело го извршил тој начин што откако дошол во златарата „Рубин“ во ГТЦ во Скопје им се заканил на вработените со пиштол, а потоа со истиот го скршил стаклото од изложната витрината каде бил изложен златниот накит, ги одзел ланчињата по што го напуштил местото на настанот. По превземени мерки и активности утврдено е дека се работи за И.С.
На 5-ти мај годинава, пак, од страна на полициски службеници од ЕИД-МД во просториите на КПУ Затвор Куманово бил извршен разговор со пријавениот во кој тој го појаснил начинот на извршувањето на кривичното дело. Украдените златни ланчиња на 19-ти декември минатата година во Куманово ги продал за 860 евра на лице од Тетово, а гасниот пиштол го фрлил во реката Вардар во Скопје, додека дел од гардеробата која ја носел при извршувањето на кривичното дело и патиките ги фрлил во контејнер.
По извршениот разговор, од страна на надзорниците од затворската полиција во КПУ Затвор Куманово, бил извршен претрес во ќелијата во кој е сместен пријавениот, при што била пронајдена една капа која истиот ја носел при извршувањето на кривичното дело.
На 13-ти мај годинава во ПС ОН Гази Баба, од страна на вработените од златарата било извршено препознавање при што истите со сигурност го препознале пријавениот како лице кое со пиштол влегол во златарата Рубин и ги одзел златните ланчиња.
Инаку И.С. е познат сторител на кривични дела од областа на имотните деликти, кривични дела против животот и телото, кривични дела против здравјето на луѓето како и кривични дела против јавниот ред.
На истиот од страна на СВР-Куманово досега му биле поднесени 43 кривични пријави за сторени кривични дела „кражба“, „тешка кражба“, „одземање на моторно возило“ и „тешка телесна повреда“, потоа од страна на ПС Крива Паланка поднесена му била една кривична пријава за сторено кривично дело „тешка кражба“, од страна на СВР-Охрид поднесена му била една кривична пријава за сторено кривично дело „тешка кражба“ и од страна на СВР- Скопје поднесени му биле пет кривични пријави за сторени кривични дела „неовластено производство и пуштање во промет на наркотични дроги, психотропни супстанции и прекурсори“, „недозволено изработување, држење и тргување со оружје или распрскувачки материи“ и „тешка кражба“./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.