Секој прв понеделник во месецот компаниите ќе имаат можност да остварат средба со министерот за економија Ваљон Сараќини во рамките на проектот „Отворено со бизнисот„ што го започнува Министерството за економија.

Целта на овој проект, кој ќе стартува од септември годинава, е преку отворен дијалог со бизнис секторот во земјава да се олесни дополнително процесот на носење на регулативи и правилници кои се од витално значење за реалниот сектор.

Преку проектот „ Отворено со бизнисот “ ќе се лоцираат сите административни точки кои што ги отежнуваат условите за водење на бизнис, а истовремено преку редовна комуникација ќе се отвори можност за побрзо имплементирање на новини кои се од клучно значење за бизнис секторот и ќе произлезат од потребите на пазарите.

„Создавање на поконкурентна економија, развој на претприемништвото и иновациите и подобрување на позициите на компаниите на странски пазари е вревен приоритет на Министерството за економија. Овие цели можат да се исполнат само преку зајакнато партнерство и отворен дијалог со бизнисот. Ние сакаме дополнително да ја зајакнеме соработката и на тој начин да делуваме ефикасно во интерес на бизнисот и подобрување на економската состојба во целина“ истакна министерот за економија Ваљон Сараќини.

Во рамките на проектот „Отворено со бизнисот“ компаниите ќе можат да ги изложат своите предизвици и да предложат решенија за нивно надминување, да дадат свои идеи во врска со можностите за дополнително скратување на роковите за одредени процедури, но и да се информираат за пристапот до средства од ИПА фондовите и другите кредитни линии. Исто така преку овој проект дополнително ќе се афирмира и техничката поддршка што ја нуди Министерството за економија за компаниите преку различни наменски програми.

Министерот Сараќини најави дека во рамките на овој проект ќе се прават и анонимни анкети и истражувања во компаниите за подобрување на работата на компаниите и за најчестите пречки во водењето на бизнис. Исто така, ќе се прават истражувања за можностите и потенцијалите на компаниите и нивните потреби во насока на подобрување на бизнисот.

Министерството за економија и досега во рамките на своите овластувања одржуваше редовни средби со бизнис заедницата. Како резултат на тоа по барање на бизнис секторот донесени се неколку нови законски решенија и измени на постојни. Овие законски решенија како што се Законот за трговски друштва, Законот за стечај, Закон за енергетика, Закон за минерални суровини, Закон за едношалтерски систем и низа други подзаконски решенија, се изменети и дополнети по барање на бизнис заедницата во најкраток можен рок и се со цел да создадат реални услови за дополнително подобрување на бизнис климата. Како резултат на интензивираниот дијалог со бизнис заедницата зголемен е и бројот на компаниите што ги користат средствата од ИПА фондовите и другите програми за подршка на бизнисот./крај/со/мф