Младите да се водат според личните афинитети и потребите на пазарот на труд кога носат одлука каде академски ќе се образуваат. Ова е пораката која ја упати министерката за образование и наука проф. д-р Весна Јаневска до средношколците кои денеска го посетија Саемот за образование во Скопје, што го организира студентската иницијатива „Студентарија“, а на кој повеќе високообразовни установи и компании ги претставија можностите за студирање и вработување на младите.

„Како ученици од завршната година во средното образование доволно сте возрасни самостојно да одлучите во која област ќе се надградувате и ќе работите, согласно своите афинитети, но сметам дека секогаш предвид треба да ги имате потребите на пазарот на трудот. Така ќе бидете поуспешни. Ќе имате сатисфакција при учењето и полесно и побрзо ќе го ефектуирате стекнатото знаење. Брзо ќе дојдат уписите и овој собир е добра можност да се подготвите за правилна одлука“, рече Јаневска.

Министерката им порача на универзитетите да се потрудат да бидат што поконкурентни, да ги модернизираат студиските програми и постојано да создаваат нови можности, особено во делот на младинската размена заради стекнување меѓународни искуства.

„Важно е да ги задржиме младите тука, оти без нив државата нема иднина. Ќе потсетам дека за 7 години, имаме 7 илјади помалку студенти. Високообразовните установи треба да инспирираат и да создаваат нови и што поквалитетни генерации на кои ќе им оставиме да ги водат општествените процеси“, нагласи министерката.

Упати порака и до компаниите да се вклучат во практичната обука на студентите и да им понудат пристоен работен ангажман по дипломирањето, со можности за кариерен и професионален развој.

„МОН и Владата ќе ги поддржат сите страни. Го јакнеме студентскиот стандард. Годинава имаме 30 милиони евра или 18% поголем буџет од лани за оваа намена. Прошируваме одредени права како субвенционираниот студентски оброк, а ќе бидат доделени и ваучери за набавка на ИТ уреди, за сите студенти. Повеќе пари ќе се распределат на универзитетите и веќе има повисоки плати за професорите. И за бизнисите има поддршка, особено доколку се заложуваат за креирање иновации“, рече министерката.
Јаневска потенцираше дека синергијата помеѓу сите чинители на високото образование е важна и мора да се одржи за младите да добијат квалитетно образование, достоинствена работа и пристоен живот во својата држава.

Во рамки на дводневниот саем за образование ќе се одржат повеќе панел дискусии на кои средношколците ќе бидат запознаени со студентските права и можности за стипендирање, како и работилници посветени на финансиска и дигитална писменост, јавен настап и самодоверба.

Измените на Законот за електронски комуникации поминаа изминатата недела, потребни се седум дена да стапат на сила и да се објават во Службен весник, а веднаш потоа, Министерството за дигитална трансформација е подготвено да ја донесе методологијата со којашто ќе се забранат нелегалните онлјан приредувачи на среќа, најави денеска од Штип, министерот за дигитална трансформација, Стефан Андоновски.

Тој појасни дека постапката ќе биде по анализа на Државната лотарија, кои се оние нелегални приредувачи на игри на среќа и на министерството испраќаат нотификација, со табела на точна веб-страница, којашто треба да се забрани.

„Ние, таа ја ажурираме, ја испраќаме како налог за забрана до Агенцијата за електронски комуникации, којашто ја забранува преку телеком операторите. Што значи дека од испраќањето имаат рок од три до пет дена да постапи Агенцијата за електронски комуникации и телекомите и тие веб-страници ќе бидат забранети, какошто кажав и при носењето на законот оваа трка ќе биде постојана нема само еднаш да го правиме тоа, од прилика мислам дека темпото ќе биде две до три недели на почеток, што значи на две-три недели Државна лотарија ќе не известува за нови веб страници, коишто се појавувале, а ние со налог ќе ги забрануваме, се до финално завршување на процесот и да ги одвратиме граѓаните да се учесници во нелегално приредување на игри на среќа онлајн“, кажа Андоновски.

Министерот за дигитална трансформација смета дека на тој начин ќе ги заштитат граѓаните од злоупотреба на нивните лични податоци, картички, сметки во банките, но какошто рече „и ќе го заштитиме буџетот од излевање на средства, коишто би требало да се слеат, како даночна обврска кон буџетот на Македонија“.

Пред да се донесат законските измени за електронски комуникации, во кои е опфатено нелегалното електронско коцкање, направени се анализи. Според министерството за дигитална трансформација во тој период биле детектирани 160 веб страници на коишто нелегално се приредувале игри на среќа.

„Што значи во првиот бран ќе бидат повеќе од 160, но мислам дека и во секој нареден бран, како ќе забележува Државната лотарија и други заинтересирани странки забележуваат дека постојат нелегални приредувачи на игри на среќа онлајн во Македонија, тие можат да не информираат и ние веднаш ќе постапуваме“, изјави Андоновски.

Работниците се револтирани, затоа што додека ги манипулира Слободан Трендафилов, тој и луѓето околу него имаат месечни примања од над двојно и тројно поголеми од една минимална плата, кажа денеска на прес-конференција Бране Петрушевски, пратеник на ВМРО-ДПМНЕ.

„Дали синдикалецот на батерии на СДС и Левица, Слободан Трендафилов, со 75 илјади денари месечно во џеб ги манипулира работниците за минималец? Според информациите кои стигнаа до нас, само во текот на 2024 година и првите два месеци од 2025 година Слободан Трендафилов покрај платата од 75.000 денари, имал и примања по други основи, со што вкупната сума која ја земал во овој период е 1 милион и 688 илјади денари по основ на плата и договори. Ова е првиот синдикалец Трендафилов, кој според овие информации за 4 години прави 100.000 евра, со амин на СДС кои го поставија на таа позиција за да ги манипулира работниците. Во следните денови ќе бидат демаскирани сите негови соработници“, рече Петрушевски.

Претседателот на СДСМ, Венко Филипче, на денешната прес-конфренција, рече дека нема никаква комуникација со претставници на Сојузот на синдикати на Македонија.

„Да се стави партиско обележје на една таква активност е недозволиво и недемократски, затоа што Синдикатот е репрезент на работниците и нивните реални барања. Сега кога работниците укажуваат дека тешко се живее, дека се потребни три минимални плати за да се обезбеди една потрошувачка кошничка, очигледно е дека има проблем, истакна Филипче, нагласувајќи дека оваа Влада не прави ништо за да ги подобри условите за живот на граѓаните“, рече Филипче.

Тој ја оцени актуелната владина тенденција како многу опасна, бидејќи наместо да ги решава економските проблеми, таа секое незадоволство го претставува како политички мотивирано.

„Тоа значи дека Владата ќе му фрли партиско обележје на било кое барање на било која група на луѓе, иако тие имаат реални проблеми што таа треба да ги реши. Наместо да реагира со решенија, Владата ги напаѓа барањата на работниците“, порача Филипче.

Вчера Теа Јарц од Европската конфедерација на синдикати рече дека битката за повисока минимална плата во Македонија е легитимна и праведна. Тоа е најголемата синдикална организација во Европа со 45 милиони членови и Јарц најави дека ќе ја информира Европската комисија за политичките притисоци врз ССМ. Тоа, според неа, ќе се одрази на извештајот за напредокот на Македонија.

„Да се биде синдикалец е човеково право и право на работниците. Никој не смее да биде напаѓан поради тоа. Особено во земјите во процесот на прошување кои преговараат за да се зачленат во ЕУ. Тие мора да дадат одговор на тие прашања. Ние сме во контакт со Европската Комисија која секоја година објавува извештај за напредокот и во тој извештај ние ја известуваме ЕК за тоа каква е состојбата со социјалниот дијалог. Ако социјалниот дијалог не се почитува во тие земји, ние тоа го пријавуваме до ЕК и тоа ќе биде отсликано во извештајот за напредокот. Од тој извештај зависи како ќе напредува земјата кон ЕУ и кои финансии ќе ги добие за поддршка на реформите“, рече Јарц.

ССМ бара најниската плата да биде 30 илјади денари. Предложија покрај законското усогласување од околу 2 илјади денари, да има зголемување за дополнителни 6 илјади за кои придонесите ќе ги плати државата во период од една година. Ваквиот предлог Владата го одби.