Култура
Триесет и трето издание на Денови на македонска музика
Концертот на Бигбендот на Штефан Шулце и изведба на дела од македонски џез-композитори, како Илија Пејовски, Владимир Николов, Живојин Глишиќ, Кире Костов и Александар Пејовски, вечер во Македонската опера и балет го означи 33-тото издание на „Денови на македонската музика“ што ќе трае до 31 март
До 31 март во Скопје ќе има 26 светски праизведби и осум македонски премиери на современи музички дела, промоции, работилници и свеченостиСо концерт на „Биг-бендот“ на Штефан Шулце од Германија во Македонската опера и балет во Скопје, вечерва во 20 часот, ќе почнат 33-тите по ред Денови на македонска музика. Шулце со својот ансамбл, освен свои, ќе изведе дела од современите композитори како Кире Костов, Живоин Глишиќ, Илија Пејовски, Александар Пејовски и Владимир Николов.Покрај џез-музиката на оваа манифестација ќе и’ биде посветено внимание и на современата романска музика и светската класика за мешан хор. Во десетте дена, колку што ќе траат Денови на македонска музика, ќе има 26 светски праизведби и осум македонски премиери на современи музички дела, промоции, работилници и свечености. На програмата утре во Музејот на град Скопје во 20 часот е концерт на романскиот камерен состав „Аркаеус“, кој ќе се претстави со свои дела, но и со композиции од Дамјан Темков и на Томе Манчев. В четврток во Домот на АРМ ќе бидат доделени наградите на СОКОМ и под диригенство на Хрватот Берислав Шипуш ќе настапи Македонската филхармонија. Заштитата на музичкото културно наследство ќе биде темата на петочната научна трибина во НБУ „Св Климент Охридски“ во 11 часот. Сликата за творештвото на македонските композитори создадено минатата година ќе ја оформува и концертот под наслов Made in 2009 -2010 во сабота во Музејот на град Скопје. Следува традиционалниот настап на млади композитори, еден камерен концерт, како и претставување на гудачкиот квартет „Еквилибриум“.Кокан Димушевски со проектот наречен – „Колор енд колорс“ ќе настапи на 30 март во Младинскиот културен центар.Најавени се три промоции, на книгата „Есеи за македонската музика“ на Марко Коловски и на авторските компакт-дискови на композиторите Благој Цанев и на Тодор Скаловски и Трајко Прокопиев.На 25 март, по повод 75 години од раѓањето на Томислав Зографски, Македонската филхармонија првпат пред публиката ќе го изведе неговото дело „Древниот ѕид“, поема за симфониски оркестар од 1998 година. Деновите на македонската музика ќе бидат затворени на 31 март, со концерт на Новиот лондонски камерен хор. Селектор на манифестацијата е Јана Андреевска.Единствениот фестивал во земјава посветен на современа класика и на презентирањето нови дела од македонското музичко творештво е во организација на Сојузот на композиторите на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.