Култура
„Внатрешен свет“ – групна изложба во Музеј на Град Скопје
На 15 октомври 2009 година, во 19 часот, во просториите на Музејот на град Скопје, ќе се отвори изложбата „Внатрешен свет“, како дел од програмата на Германските недели 2009
Со отварањето на изложбата започнува проектот којшто се состои од 3 дела: изложба, дискусија и видео проекции коишто ќе се реализираат следниот ден на 16 октомври 2009 со почеток во 19 часотОвој проект е дел од програмата на Германските недели 2009 и е поддржан од Германската амбасада во Скопје и Бош фондацијата. Првично беше реализиран во соработка со галеријата Штедефројнд од Берлин, во јули-август 2009 година. „Внатрешен свет“ е изложба со 6 автори – Игор Тошевски, Ѓорѓе Јовановиќ, Ивана Драгшиќ, Стефка Амон, Инкен Рaјнeрт и Катја Пудор. Куратор е Елена Велјановска. Изложбата се фокусира на индивидуалните сеќавања предизвикани од општествените промени во текот на изминатите 20 години во Европа почнувајќи од збиднувањата во Берлин. Таа не ја ре-креира официјалната историја на настаните, туку раскажува лични приказни, покажува различни доживувања на овие промени и потсетува на тоа како еден историски момент влијаел на искуствата на секој поединец. Изложбата отвара простор за сеќавањата, реализирани и нереализирани идеи преплетени со реалните искуства и општествено-политичкиот развој на двете земји од коишто доаѓаат уметниците во изложбата: Македонија и Германија. Берлинскиот ѕид се зема како метафора, почетна точка за дискусија, дозволувајќи им на уметниците понатамошно пребарување во нивната меморија, којашто споена заедно во една изложба креира паралелна колективна свест за одреден просторно- временски развој. Изложбата креира простор кој дава панорамски поглед од овие лични видувања и доживувања.дискусијата наредниот ден, насловена „Простор за уметност“, ќе ги разгледува следните состојби: Што се е потребно за една уметничка сцена да фукционира? Која е улогата на галериите во неа? Дали постојат услови за имплементација на ваков систем во Скопје? Поканетите учесници во дискусијата, уметници и галеристи од Скопје и Берлин, ќе ја претстават моменталната состојба во двата града – Берлин како европска престолнина со разновидноста на галериите и Скопје со вибрантна музичка сцена, но со недостаток од галериски простори. Учесници на дискусијата се Штефка Амон, Христина Иваноска, Ѓорѓе Јовановиќ, Инкен Рајнерт, Игор Тошевски и Јане Чаловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.