Култура
Сто години од раѓањето на Белогаски
Во Музејот на град Скопје од синоќа е отворена изложбата „Сто акварели за 100 години од раѓањето на Љубомир Белогаски“. На изложбата се изложени 20 дела од донацијата во Музејот на град Скопје и 80 досега неизложени дела на Љубомир Белогаски од приватни колекции.
Во Музејот на град Скопје од синоќа е отворена изложбата „Сто акварели за 100 години од раѓањето на Љубомир Белогаски“. На изложбата се изложени 20 дела од донацијата во Музејот на град Скопје и 80 досега неизложени дела на Љубомир Белогаски од приватни колекции.Поставувањето на изложбата во Музејот на град Скопје е несекојдневен настан што се случува еднаш на сто години. Одбележувањето на стотиот роденден на големиот човек, уметник и педагог, Љубомир Белогаски, е дел од годишната програма на Министерството за култура за одбележување значајни јубилеи во областа на уметноста.„На 15 април се навршија сто години од раѓањето на академскиот сликар и педагог Љубомир Белогаски. Затоа, со особена почит се потсетуваме на неговиот лик и дело, на неговиот хуман гест да подари дела од своето творештво, вреден легат во Музејот на град Скопје. Во знак на сеќавање и пиетет кон Љубомир Белогаски, еден од основоположниците на современата македонска уметност и врвен мајстор на акварелот ја организираме оваа изложба“ – изјави Љубица Кондијанова, директор на Музејот на град Скопје.На отворањето на изложбата се обрати уметникот и професор Владимир Георгиевски, кој своевремено бил ученик на Љубомир Белогаски.„Секое човеково раѓање вредно е да се одбележи, зашто раѓањето е космичка димензија, а заминувањето од овој свет е небесна тајна. Творештвото на Љубомир Белогаски е темел на современата македонска ликовна уметност. Акварелните слики уште од најстарите времиња го живееја светот како контемплација и како уметност. Тие, кај Љубомир Белогаски, со задоволство на духот што ја слави природата и во неа ја открива радоста на интелектот што одново го создава светот и човекот во него, ја слават природата. Акварелот како сликарство за Белогаски е мисија на неговата творечка мисла која бара да го разбере светот како цртеж и боја, како емоција исполнета со светлина, како музика. Таа светлина кај него е одблесок на неговата духовна вертикала која низ делото што го создава им служи на луѓето“ – нагласи Владимир Георгиевски.Љубомир Белогаски е творечка личност со јасно препознатлив сликарски знак. Одредени искуства од европската ликовна сцена тој ги протолкувал како своја внатрешна состојба. Белогаски беше уметник и професор. Своите ученици ги советувал како може да се открие душата на човекот.„Треба мошне внимателно да се гледа човековото лице, да се потоне во него“- потенцираше Георгиевски како некогашен ученик на Белогаски.„Во Музејот на град Скопје имаме неповторлива можност да навлеземе во суштината на македонскиот ликовен идентитет, да видиме дел од творештвото на визионерот кој го трасираше патот на македонското сликарство, да направиме пресек на творечкиот мозаик на врвниот мајстор на акварелот, големиот Љубомир Белогаски“ – изјави Елизабета Канческа Милевска.Во делата на Белогаски се огледуваат стрмните и сурови планински масиви, старата градска архитектура, чистите предели, небото, морската површина. Тоа се пејзажи кои ја отсликуваат лиричната душа и смирениот дух на Белогаски.На отворањето на изложбата беа доделени благодарници на луѓето кои се втемелија во формирањето на донацијата и галеријата „Љубомир Белогаски“ при на Музејот на град Скопје. Благодарници добија семејството на Илија Илиевски, Климе Коробар, Владимир Георгиевски, Ефтим Клетников и Дора Андова Фотева. Благодарница доби и министерката за култура, Елизабета Канческа Милевска./крај/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.