Култура
Отворен 14-тиот Скопје филм фестивал
Со премиерата на филмот „Панкот не е мртов“ на Владимир Блажевски синоќа беше отворен 14-тиот Скопје филм фестивал. Годинава фестивалот се одржува од 15 до 20 април со филмски проекции во кино „Милениум“ и во Кинотеката на Македонија.
„Им посакувам добредојде на сите љубители на филмската уметност, и на сите што ги носат Скопје и Џо Страмер во душата“ – изјави Иво Антов, директор на Скопје филм фестивал, пред преполната сала во киното „Милениум“.Првата активност на Скопје филм фестивал беше доделувањето на наградата за животно дело на значајниот полски режисер Кшиштоф Зануси.„Навистина сум допрен што ја добивам наградата и навистина многу ми значи. Секогаш кога ќе добијам награда за животно дело се чувствувам како артефакт ставен во некој природонаучен музеј. Колку и да ме прави тоа среќен, сепак, сѐ уште сум активен и сe уште работам и се надевам дека ќе направам уште многу филмови, ќе раскажам уште многу приказни и со вас ќе ги поделам моите чувства. Затоа, ве молам не ме ставајте во музеј. Иако многу сум среќен што ја добив наградата, сѐ уште сум жив и ги подготвувам моите следни филмови“ – изјави Кшиштоф Зануси со симпатична доза на духовитост откако ја прими наградата.Наградата што ја доби Зануси е една коцка од скопскиот плоштад, едно парче историја од животот на Скопјани, на градот и на фестивалот.„Многу сум среќен што дојдов во Македонија, бидејќи е една од ретките земји во Европа што сe уште не сум ги посетил. Мислам дека имате голем потенцијал, прекрасни пејзажи, долга историја и се надевам дека сето тоа ќе го искористите да направите квалитетна филмска уметност“ – потенцираше Зануси.На отворањето на фестивалот присуствуваше министерката за култура, Елизабета Канческа – Милевска, американскиот амбасадор Филип Рикер, екипата која го реализираше филмот „Панкот не е мртов“, филмски работници, медиуми и љубители на филмската уметност.„Пред 14 години група млади Скопјани имаа сон, сакаа филмски да ги замрзнат своите идеи во доријангрејовскиот флешбек, во кој елипсите и паралаксите како моќен синопсис нема да му дозволат на времето да стане минато. Денес Скопје го живее овој сон, сон на домаќин на меѓународен филмски фестивал“ – изјави Елизабета Канческа – Милевска.„Целата убавина скриена во подвижните слики, чија естетика воодушевува, поттикнува, инспирира, воздигнува, образува, менува, ја крие тајната на популарноста што ја ужива филмот насекаде во светот. Во следните пет дена ќе навлеземе во најновите скриени меандри и лавиринти на филмовите создадени и создавани од многумина по 1895-тата година. Скопскиот филмски фестивал стана настан кој го врати филмскиот дух на киносалите во Скопје“ – нагласи министерката за култура на отворањето на фестивалот.Отворањето на фестивалот со премиера на новиот македонски филм „Панкот не е мртов“ во режија на Владимир Блажевски е вистински потег на организаторите на огромно задоволство на екипата која го реализираше филмот. Станува збор за искрено, емотивно и енергично филмско остварување. Приказната за група луѓе кои најубавите денови од својата младост ги оставиле во долгата транзициска реалност на емотивен начин допира до публиката. Користењето на панк-идеологијата е во функција на обидот да се врати и оживее нешто што одамна заминало. Сето тоа е претставено низ приказната за реоформување на една панк-група и взаемните релации и конфликти кои членовите на групата со години ги носат во себе.Во „Панкот не е мртов“ учествуваат актерите Јордан Симонов, Камка Тоциновски, Тони Михајловски, Џевдет Јашари, Кирил Поп Христов, Владимир Тулиев, Ратка Радмановиќ, Флора Достовска.Филмот е снимен по сценарио и режија на Владимир Блажевски. Извршен продуцент е Дарко Попов. Соработници на сценариото се Вардан Тозија и Дарјан Пејовски. Директор на фотографија е Димо Попов, монтажер е Благоја Неделковски, додека композитор на музиката за филмот е Александар Пејовски.Во екипата која го реализираше се и Мојца Горогранц – Петрушевска (шминка), Кирил Спасески – Кикич (сценографија), Илина Ангеловска (костимографија) и Атанас Георгиев (дизајн на звук).По завршувањето на Скопје филм фестивал, филмот „Панкот не е мртов“ ќе се прикажува на редовниот репертоар на кино „Милениум“.Билетите за денешната програма на фестивалот во киното „Милениум“ со филмовите „Заверена копија“ на Абас Киаростами, „Говорот на кралот“ на Том Хупер и „Социјална мрежа“ на Дејвид Финчер, веќе се распродадени.Во Кинотеката на Македонија на репертоарот се филмовите „Персона нон грата“ од циклусот филмови на режисерот Кшиштоф Зануси, и македонскиот филм „Маклабас“, од циклусот „Скопје најнтис“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).