Македонија
Изгласани новите министри за внатрешни работи и транспорт и врски
Собранието на Република Македонија им изгласа доверба на новите министри на ресорите за внатрешни работи и за транспорт и врски, со 74 гласа `за` и 4 `против`.
Со МВР ќе раководи досегашниот директор на Бирото за јавна безбедност, Митко Чавков, а со транспорт и врски Владо Мисајловски, досегашен директор на Јавното претпријатие за државни патишта.
Собранието на седницата во средата се изјаснуваше за предлогот на премиерот Никола Груевски за избор на нови министри за внатрешни работи и за транспорт и врски, откако доцна вечерта во вторникот Гордана Јанкулоска и Миле Јанакиески си поднесоа оставки од должностите.
Оставка поднесе и директорот на Управата за безбедност и контраразузнавање, Сашо Мијалков.
Во своето образложени на почетокот на седницата, премиерот Груевски рече дека двајцата министри биле пример за раководење на тешки позиции и работливост.
„Се работи за личности кои дадоа огромен личен влог, во развојот на стабилноста и безбедноста на државата. Јанкулоска и Мијалков беа осум години на многу ризични и тешки за раководење позиции. Покажаа професионалност и патриотизам, смиреност, неверојатна лојалност кон државата и подготвеност секогаш да застанат на браникот на татковината. Под нивно раководство граѓаните видоа како се одговара на најсложените и најкомплицираните предизвици, како и последната успешна акција во Куманово, тие секогаш цврсто стоеа зад интересите на македонскиот народ, но и заштитата на безбедносните сили на Македонија. Тие се бореа за нив, а не праќаа насилници да ги навредуваат“, рече Груевски.
Според премиерот, поради нивната цврста одлучност за справување со криминалот и корупцијата, ги довело во ситуација да е трн во окото на секој криминалец, осуден или аболициран.
Груевски рече дека дел од акциите кои ги спровеле Јанкулоска и Мијалков ќе влезат во учебниците како пример за идните генерации, а благодарение на посветеноста на Јанакиески, градежништвото придонело најмногу за целокупниот раст на целата економија.
„Миле Јанакиески како министер е фанатичен работник, неверојтно брз, човек кој помагаше секаде каде што ќе стигне. Многу ќе ни недостига во Владата. Работеше по 15 часа дневно и не се штедеше ниту за празниците“, рече Груевски.
Премиерот смета дека Јанакиески ќе биде запаметен како министер кој е заслужен за растот на градежништвото, а рече дека покрај неговите законски обврски „тој беше најактивниот министер во кризни ситуации во државата, независно дали биле поплави, пожари, снежни наноси, Миле Јанакиески секогаш беше на чело“.
Задоцнети и недоволни се оставките на министрите за внатрешни и за транспорт и врски, Гордана Јанкулоска и Миле Јанакиески, смета пратеничката Солза Грчева, затоа што оставки требало да дадат порано, на што таа повикувала уште во февруари, кога почна објавувањето на прислушуваните разговори од страна на опозицијата, а за тој период се покажало дека се некомпетентни за функцијата. Затоа, смета Грчева „ни се случија серија инциденти“, од кој секако, најголем е оној во Куманово, кога во полициска акција за сузбивање на терористи загинаа осум полицајци.
Премиерот Груевски за нов министер за внатрешни работи го предложи Митко Чавков, сегашен директор на Бирото за јавна безбедност, а за нов министер за транспорт и врски Владо Мисајловски, директор на Јавното претпријатие за патишта.
„Убеден дека ќе дадат одлични резултати во своето работење ве молам да дадете поддршка на овие двајца кандидати за министри“, рече Груевски.
За Митко Чавков, кој 28 години работи во полицијата, смета дека е доволно упатен во секторот, и дека токму поради тоа е соодветен избор за министер за внатрешни работи, а за Владо Мисајловски рече дека се докажал како одличен менаџер на чело на Јавното претпријатие за државни патишта, а претходно и во Министерството за надворешни работи и во Општина Центар.
Според пратеничката Солза Грчева, Чавков е соодветен на функцијата, но Мисајловски бил млад за министер, но и некомпетентен затоа што ќе раководи министерство за транспорт и врски, а е дипломиран политиколог.
За да бидат изгласани новите министри треба да бидат поддржани од мнозинството пратеници од вкупниот број.
Пратениците од коалициониот партнер на ВМРО-ДПМНЕ, партијата на Албанците, ДУИ, исто така, гласаа за новите министри, иако претходно постоеја медиумски шпекулации дека нема да ги поддржат предлозите на премиерот.
Во јавноста се отвори дилемата само околу предлогот за нов министер за внатрешни работи, затоа што според член од Уставот, за министер за внатрешни работи не смее да биде избран човек кој е вработен во МВР, туку треба најмалку три години да е цивилно лице.
„Согласно Член 97 од Уставот на РМ, со органите на државната управа во областа на одбраната и полицијата раководат цивилни лица кои непосредно пред изборот на тие функции биле цивили најмалку три години. Орган на државната управа во областа на полицијата е МВР, а раководното лице е министерот за внатрешни работи. Според тоа, за да биде избран за министер, Чавков морал да биде цивилно лице најрано од април 2012 година. Имајќи предвид дека сè до мај 2013 година тој бил полициски началник, произлегува дека Чавков не го исполнува условот предвиден во Член 97 од Уставот на РМ“, стои во предупредувањето од Хелсиншкиот комитет од каде велат дека евентуалното прифаќање на предлогот на премиерот од страна на мнозинството пратеници би претставувало јасно, свесно и недвосмислено прекршување на Уставот./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.