Култура
Културна понуда за денес
Ви претставуваме селекција од културните настани за денес
Во банкет салата на АРМ денес граѓанската асоцијација „Скопјанката Мајка Тереза“ организира расправа по предлог-програмата што идната година ќе се реализира по повод еден век од раѓањето на Мајка Тереза.Во куќата на некогашното арт кафе „Лудница“ со почеток во 11 часот во организација на европската алијанса на Р. Македонија група млади од 4 европски земији заеднички ќе создадат уметничко дело. Во домот на АРМ во 20.30 часот со настап на групата „Скопје конекшн“ започнува 28-от Скопски Џез фестивал.Во градската библиотека „Браќа Миладиновци“ со 12.30 ќе се одржи промоцијата на првата збирка стихови за авторот Билјана Петрова наречена „Заробени сништа“.Во центарот за култура на Автокоманда во 18.00 часот ќе почне со снимање ма една сцена од долгометражниот филм „Панкот не е мртов“ во режија на Владимир Блажевски. Во просториите на Арт институтот во Скопје ќе биде отворена изложбата на академскиот сликар Горан Боев.Во просториите на галеријата Остен во 20.30 часот наспроти Матицата на иселениците ќе биде отворена 37-та светска гелрија на карикатури.Во ценарот на културата Марко Цепенков во Прилеп во 19 часот ќе биде отворена самостојната изложба на академскиот сликар Дејан Арсовски.Во галеријата на МКЦ промоција на поетската книга „ Така умираше една риба“ на поетот Божидар Зимски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Повик за учество на млади поети на „Отскочна даска #3“ во рамките на 4. Скопски поетски фестивал
Скопскиот поетски фестивал, чиешто четврто издание ќе се одржи во периодот од 29 мај до 1 јуни, и годинава го организира преднастанот „Отскочна даска“ ‒ поетско читање за млади поети и поетеси.
‒ Продолжуваме со поддршката за младите поети, за тие што можеби веќе се појавиле со по некоја песна во книжевно списание, ја објавиле својата прва стихозбирка или настапиле на некое поетско читање, но и за тие што можеби и не направиле ништо од сето тоа досега, давајќи им шанса да бидат прочитани, видени и слушнати на настан подготвен само за нив! Како и минатите години, така и оваа, врз основа на испратените песни ние ќе ги избереме учесниците на „Отскочна даска #3“, а тие меѓу себе ќе го одберат најдобриот, односно, ќе изгласаат кој млад поет или поетеса ќе отскокне до официјалното отворање на четвртото издание на СПФ и ќе чита како претставник на најмладата генерација заедно со другите повозрасни и етаблирани поети, соопштија од фестивалот.
Заинтересираните учесници треба да се на возраст од 16 до 25 години и да испратат куса биографија, фотографија со висока резолуција и две свои песни во Word на мејлот [email protected] најдоцна до 13-ти мај.
Имињата на одбраните поети ќе бидат објавени на 20 мај на фејсбук и на инстаграм страниците на фестивалот, а настанот ќе се одржи во кафе-книжарницата „Буква“ на 29 мај, со почеток од 20 часот. Одбраниот млад поет/поетеса ќе чита и на официјалното отворање на СПФ во МКЦ на 30 мај.
Фестивалот е финансиски поддржан од Министерството за култура, а негови помагатели се Младинскиот културен центар – Скопје, градската библиотека „Браќа Миладиновци“ ‒ Скопје и кафе-книжарница „Буква“.
Култура
Костадиновска-Стојчевска: Танцот со својата креативност ја афирмира македонската култура
Министерката за култура, Бисера Костадиновска-Стојчевска, го честита Светскиот ден на танцот – денот кога танцот се слави како моќ на човечкиот дух, на уметничкото творештво и на значењето на танцовата сцена во обликувањето на модерната уметност.
„Министерството за култура го потврдува својот придонес кон сцената и останува партнер во афирмацијата на македонскиот танцов идентитет“, рече министерката Костадиновска-Стојчевска, додавајќи дека танцот како креативна универзална уметност ја одразува и ја промовира македонската култура која има значајна историја на танци низ чие постоење се рушеле предрасуди и ограничувања.
Костадиновска-Стојчевска изрази уверување дека заедничките проекти го унапредуваат културниот дијалог и ја носат слободата на уметноста.
Култура
Велигденски концерт на НУ „Охридско лето“ со женскиот хор „Менада“
Во организација на НУ „Охридско лето“, а по повод големиот верски празник Велигден, утре во црквата „Света Софија“ во Охрид со почеток од 20 часот ќе се одржи Велигденски концерт на православна духовна музика со женскиот хор „Менада“ од Тетово под диригенската палка на професор Ивица Зориќ.
„Со овој концерт заокружуваме програмата која веќе трета година ја реализираме надвор од традиционалната фестивалска рамка 12 јули- 20 август. Имавме прекрасни концерти преку цела година со кои ја потврдивме големината на долгогодишното опстојување на оваа најзначајна културно-сценска манифестација“, вели директорката на НУ „Охридско лето“, Наташа Поповиќ.
Женскиот хор „Менада“ , предводен од диригентот проф. д-р Ивица Зориќ е еден од најрепрезантитивните хорови од нашата земја. Со своето четиридецениско делување тој прерасна во еден од стожерите во развојот и опстојувањето на хорската уметност кај нас.
Хорот „Менада“ е основан 1981 година во Тетово и сите овие години е предводен од маестро Ивица Зориќ. На репертоарот на хорот редовно се застапени композиции од најразлични епохи и стилови од македонската и светската хорска акапела и вокално-инструментална музика. Хорот е добитник на многубројни награди и признанија во Македонија, поранешна Југославија и Европа, за што сведочат бројните настапи на фестивали, конкурси и концертни турнеи во Чешка, Полска, Шпанија, Шведска, Холандија, Данска, Португалија, Босна и Херцеговина, Хрватска, Србија, Албанија, Романија, Бугарија,Турција, Германија, Грција, Словенија, Австрија,Белгија, Косово…..
Билетите по цена од 200 денари можат да се набават во Дирекцијата на НУ „Охридско лето“.