Култура
Скулптури на Владо Костов-Ваце во Софија
Во организација на Културно-информативниот центар На Република Македонија во Софија и Галерија Арт од Скопје утревечер, 18 часот, во бугарската престолнина ќе биде отворена изложбата на скулптури „Од отпад до убавина“ на македонскиот уметник Владо Костов
Владо Костов-Ваце (1968) во Скопје го завршува училиштето за применета уметност „Лазар Личеновски“ и својот уметнички светоглед го оформува под влјание на познатиот сликар Димитар Манев. По завршувањето на училиштето во 1987г. заминува во Лондон, во студиото за анимација и карикатура Hollywood Road Film Production работејќи како цртач–соработник на Дарко Марковиќ. Во 2005 година настанува пресвртница во неговото творештво. Костов го открива својот оригинален израз преточен во суптилна конструкција од отпадни материјали во кои е изразен сензибилитетот на големиот саксофонист Паркер. Со оваа скултура учествува во мултимедијалниот проектот „Омаж за Чарли Паркер“, во клубот Лоби, заедно со Аљоша Симјановски на пијано и балканскиот саксофонист Гоце Мицанов.„Градските отпади, преполни со мртвило, аморфност, трулеж на разновидните метални материи стануваат еруптивна инспирација на Костов. Онаму каде што сите ги отргнуваат погледите од грдото, неупотребливото, хаотичото, уметникот гледа повторно раѓање на животот во необичен хармоничен спој на металниот крш. Реанимацијата на отфрлените и одамна употребените метални предмети ја прави со заварување спојувајки шински шраф со лим… Овој автор го метаморфозира грдото и бескорисното во естетска форма, критичарите го вбројуваат во уметниците на парадоксалната инвенција.“ (В.Величковски)Владо Костов е автор на неколку самостојни изложби, учествува и во групни изложби. За прв пат ќе се престави во Р. Бугарија со самостојна изложба, која што ќе ја отвори Зоран Читкушев, директор на НУ Завод за заштита на спомениците на културата и музеј од Штип.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.
Култура
Распишани конкурсите за државните награди „11 Oктомври“ и „22 Ноември“
Денеска се распишани конкурсите за државните награди „11 Oктомври“ и „22 Ноември“ за 2024 година.
Со државната награда „11 Октомври“ се оддава највисоко признание за животно дело во областа на науката, уметноста, стопанството и во другите дејности од јавен интерес на државата. Наградата се доделува на поединци, група творци, екипи, установи, трговски друштва и здруженија на граѓани од земјава.
Со државната награда „22 Ноември“, пак, се оддава признание на личностите од политичкиот, културниот и општествениот живот во нашата држава кои дале свој придонес во унапредување на меѓучовечкиот соживот и меѓусебно разбирање меѓу припадниците на различните заедници, култури и вери.
Конкурсите за државните награди „11 Oктомври“ и „22 Ноември“ за 2024 година траат од 1 до 31 мај 2024 година.
Конкурсите се објавени и на веб–страницата на Министерството за култура на следните линкови:
Државна награда „11 Октомври“ – https://kultura.gov.mk/wp-content/uploads/2023/10/odluka-3.pdf
Државна награда „22 Ноември“ – https://kultura.gov.mk/22-%d0%bd%d0%be%d0%b5%d0%bc%d0%b2%d1%80%d0%b8/
Култура
Мајските оперски вечери немаат никакви примеси на економски ниту политички стремеж, организаторите го најавија 52-рото издание
Мајските вечери немаат никакви економски ниту политички стремеж, еден ваков уникатен собир ќе го обележи и Скопје и Македонија, соопштија организаторите на прес-конференција.
„Оваа манифестација датира од крајот на 60-тите години. Тогаш имало криза со публика, која не била изразена само во Скопје. Во првите години мајските оперски вечери се празни, но со текот на годините заинтересираноста расте“, изјавја организаторите.
Како што велат оттаму, ова е еден од најголемите фестивали во регионот и со квалитетна програма сите овие години.
„Оваа година ќе има екслузивна програма. Очекуваме одлични резултати“, додаваат оттаму.
Реномираниот македонски режисер Иван Поповски, со успешна кариера во Русија, ја поставува операта „Трубадур“ од Џузепе Верди, со чија премиера ќе се отворат 52. Мајски оперски вечери (МОВ) на 9 мај во Националната опера и балет (НОБ). Диригент ќе биде Енрико Довико (Италија), сценографијата ја работи реномираниот Миодраг Табачки од Србија, костимите Марија Пупучевска, а кореографијата Саша Евтимова.
Во рамките на 52. Мајски оперски вечери, во фоајето на Националната опера и балет, од 9 до 31 мај ќе биде поставена и изложбата „Оперска одисеја“ – наследството на Милка Ефтимова. Изложбата ќе ја сочинуваат донирани лични предмети од движно материјално и нематеријално културно наследство, класифицирани во категоријата лични предмети како и голем број награди, признанија, уметнички портрети и фотографии кои во детали ја прикажуваат нејзината богата музичка кариера.
„Оперска одисеја“ е резултат на институционалната соработка помеѓу Музејoт на македонската борба за самостојност и Националната опера и балет. Автор на изложбата е Василија Чали, соработник за визуелни уметности, дизајн и архитектура.