Хрватскиот премиер Тихомир Орешковиќ би можел наскоро да поднесе оставка, јавуваат хрватските медиуми.

Веста околу подготвеноста на Орешковиќ да поднесе оставка најпрво беше објавена од порталот Direktno.hr, кој важи за близок до владејачката Хрватска демократска заедница (ХДЗ), повикувајќи се на „добро информирани медиумски кругови“.

Наводно Орешковиќ планира во наредните 24 часа да одржи драматичен говор, а би можел да поднесе и неотповиклива оставка поради актуелната политичка криза, наведува порталот.

Од владата негирале дека тој наскоро планира да одржи прес-конференција, а на поставените прашања околу оставката не дале одговор, пренесува N1.

Пишувањата за можната оставка на Орешковиќ дојдоа откако во четвртокот беше одложена редовната седница на владата, што поттикна дополнителни претпоставки околу продлабочувањто на кризата на владата на десниот центар, раздрмана со аферата „Консултант“.

Владејачката коалиција на десниот центар, составена од ХДЗ и Независната листа Мост се најде во голема криза откако во медиумите беше откриена аферата „Консултант“, односно поврзаноста на компанијата на сопругата на хрватскиот вицепремиер и лидер на ХДЗ, Томислав Карамарко, со консултантот на унгарската компанија МОЛ, Јосип Петровиќ. 

Опозицијата во Саборот покрена постапка за отповикување на Карамарко, бидејќи сметаат дека се работи за негова политичка одговорност, а иницијативата беше одржана и од Мост, без чија поддршка во Саборот владејачката коалиција нема мнозинството./крај/мф/бс