Скопје
ОУ „Кирил и Методиј“ во Скопје добива училишна спортска сала
Основното училиште „Кирил и Методиј“ во центарот на Скопје до мај 2017 година треба да добие училишна спортска сала, а во изградбата која е почната, вложени се 32 милиони денари од буџетот на Министерството за образование и наука.
Локацијата денеска ја посетија заменик-министерот за образование и наука Спиро Ристовски и претседателот на ВМРО-ДПМНЕ Никола Груевски, кој изјави дека изградбата на салата е ветување од нивната програма.
„Основното училиште „Кирил и Методиј“ досега никогаш немало спортска сала, а се работи за училиште кое има многу ученици, кое е во самиот центар на Скопје и во кое гравитираат ученици од целиот град, некои што живеат во околината, а некои чии родители работат во околината. Така што, сериозно недостасуваше ваков објект, и го имавме ветено во нашата програма на изборите. Имавме намера да го започнеме и порано, но се појавија некои проблеми кои ги надминавме и сега градбата е започната. До мај следната година треба да биде завршено. Во него се инвестираат 32 милиони денари“, изјави Груевски.
Тој соопшти дека до сега се завршени 94 спортски сали преку Министерството за образование и наука и Агенцијата за млади и спорт. Две сали се речиси готови, а уште три до четири се очекуваат до крајот на годинава, со што ќе бидат вкупно сто изградени спортски сали.
„До крајот на годината ќе се заокружи на 100 бројката од спортски сали завршени, изградени и пуштени во употреба. Веќе наредната година очекуваме да бидат повеќе од 110“, рече истакна Груевски.
Заменик-министерот за образование и наука Спиро Ристовски очекува максимална искористеност на овие објекти како резултат на вложувањето во спортската инфраструктура, но и со новите мерки во областа на спортот кои беа најавени минатата недела.
„Покрај тоа, со физичката активност значително ќе се подобри и здравствената состојба кај учениците бидејќи сме сведоци дека со развој на технологијата децата помалку го посветуваат времето на спортски активности“, изјави Ристовски.
Инаку, ОУ „Кирил и Методиј“ е едно од двете основни училишта во Македонија (заедно со ОУ „Браќа Миладиновци“ во Аеродром) каде што четврта учебна година се спроведува меѓународната ИБ-програма.
„Програмата се одвива одлично, училиштето целосно го има прифатено концептот. Сега и со завршувањето на овој спортски објект, ќе ги има сите предуслови за апликација за комплетна дозвола од ИБ од Швајцарија. Ако биде се како што треба, ова ќе биде првото комплетно лиценцирано училиште во Република Македонија кое ќе работи по ИБ-стандардите и првите излезни резултати ќе ги добиеме со тоа што тие ученици ќе се вклучат во средно училиште. А за таму имаме нови планови за овозможување континуитет на ИБ-програмата“, истакна Ристовски, додавајќи дека од примената на ИБ е задоволен и во другото училиште – ОУ „Браќа Миладиновци“./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Дел од општините Гази Баба и Сарај денеска без струја
Поради планирани зафати во електро дистрибутивната мрежа, денеска без напојување со електрична енергија ќе останат делови од општините Гази Баба и Сарај.
– Во период од 08:30 – 09:300 часот, струја ќе немаат корисниците на улица Лазар Поптрајков зграда бр. 25 во општина Гази Баба.
– Во период од 08:30 – 13:30 часот, корисниците на дел од село Кондово во општина Сарај ќе останат без електрична енергија.
Скопје
Нова спортска сала во Ѓорче Петров
Започна изградбата на училишната спортска сала во подрачното училиште „Димитар Поп Георгиев – Беровски“-Хром. На вкупна површина од 476 м², со димензии 27,40 x 15,6 метри и максимална височина до 12,4 метри, денеска стартуваше со изградба училишната спортска сала во подрачното училиште во Хром „Димитар Поп Георгиев – Беровски“.
Почетокот на изградбата на салата го означија градоначалникот на Општина Ѓорче Петров, Александар Стојкоски, претседателот на Владата Христијан Мицкоски и министерот за образование и наука Весна Јаневска.
-Десет години по изградбата на училиштето, оваа локална власт конечно изнајде решение за долгогодишниот проблем на родителите и децата од Хром кои немаа соодветни услови за спортско образование. Оваа пространа сала ќе понуди соодветни услови за различни спортски активности. Изградбата ќе се спроведе со користење на енергетски ефикасни и еколошки материјали, што ја прави оваа сала не само функционална, туку и одржлива на долг рок, изјави Стојкоски.
Инвеститор на проектот е Општина Ѓорче Петров со вкупна инвестиција од 20.000.000,00 денари.
Предвидена е изградба и на паркинг-простор со 30 места за вработените и посетителите. Новата пешачка патека која исто така е во план за изградба ќе обезбеди лесен и безбеден пристап до училиштето и училишниот двор.
-Денеска е важен ден за учениците од Хром. Нашите заложби зa квалитетно образование остануваат наш приоритет. Сите училишта од Ѓорче Петров во текот на следната година ќе бидат опфатени со реконструтивни зафати, што значи решавање на децениски недостиг со капацитети за настава. Продолжуваме активно да работиме на подобрување на условите за настава, но и за физичко образование, рекреација и спортски активности, додаде Стојкоски.
Скопје
Пуштени во употреба новото детско и кошаркарско игралиште во Бучинци
Општина Илинден со засилено темпо работи на изградба и реконструкција на спортските терени во повеќе населени места. Деновиве беше пуштено во употреба новото детско и кошаркарско игралиште во населено место Бучинци. Во рамки на детското игралиште поставени детски реквизити, лулашка, лизгалка, клацкалка, клупи, канти за отпадоци за почиста и поубава средина, партерно уреден простор со павер елементи.
Дополнително во рамки на детското игралиште изградено е кошаркарско игралиште со бетонска подлога, кош и партерно уреден простор.
Градоначалникот на Општина Илинден, Александар Георгиевски, истакна дека децата и младите од Бучинци добија ново катче каде можат да го поминуваат слоборното време во игра, забава и спортски дух.
Новото детско и кошаркарско игралиште претставува континуитет на успешните проекти на општина Илинден, нов уреден простор за рекреација и забава на најмладите во општината. Во наредниот период ќе бидат изградени нови и реконструирани постојните игралишта и во останатите населени места, велат од општината.