Кога имала 14 години Фара Малас се заколнала дека еден ден нејзините фотографии ќе бидат излепени на ѕидовите во вежбалниците

Првата Арапка што ќе се натпреварува на некое меѓународно натпреварување во бодибилдинг е 26-годишната Фара Малас од Јордан. На оваа убавица со изразено мускулесто тело, прекриено со тетоважи, воопшто не и е лесно во родната земја, каде што е секојдневно изложена на критики од сонародниците, па затоа многу страда. Но, се чини дека Фара е силна и физички и психички зашто ништо не ја поколебало да продолжи со секојдневните тренинзи во вежбалниците во Аман.”Сите се против мене. Никој не сфаќа зошто сакам да станам меѓународна ѕвезда во светот на бодибилдингот”, му вели таа на новинарот на Ројтерс.Оваа убавица има многубројни тетоважи на телото, што ја прави „подвижна мета“ за нејзините изразито конзервативни сонародници и им дава причина повеќе да ја презираат.Јорданците имаат исклучително строга идеја за „правилното“ однесување на жените, па кај нив се многу чести и т.н. убиства за одбрана на честа, чии жртви се млади жени за кои постои сомневање дека ја загубиле невиноста пред бракот. Меѓу тетоважите што го красат преубавото тело на Фара се голоград ангел на бутот, ангелски крилја на грбот и пораките „Некој си кога ќе престанеш да бидеш никој“ и „Само оној што те повредил може да ти ја излекува болката“ на рацете.”Тетоважите се дел од мене. Ми покажуваат која сум и по кој пат сакам да одам во животот. Да, тетовирањето боли, но таа болка истовремено врз мене има и терапевтско дејство зашто ми помага да го надвладеам внатрешното страдање, кое ме разјадува”, вели Фара, која често патува во Бејрут за тетовирање, а првата тетоважа ја ставила кога имала само 17 години.Фара Малас потекнува од добростоечко јорданско семејство со две ќерки. Нејзините родители се разведени, а Фара нема веќе никаков контакт со татко и, кој е бизнисмен, и со мајка и’, која често патува.Во септември годинава Фара ќе патува во Канада, каде што ќе учествува на аматерски натпревар во бодибилдинг во категоријата „фигура“, во која се пријавуваат билдерите што не сакаат да акумулираат преголеми бицепси.”Ако победам, потоа ќе може да учествувам и на професионалните натпреварувања”, вели Фара, која до остварувањето на сонот чекори по трнлив пат, полн пречки и предрасуди.Имено, таа има проблеми дури и со јорданскиот Сојуз за бодибилдинг, чии членови не се согласуваат да прифатат жена во своите редови. Таму дури и ја прашале како не се срами да парадира во бикини пред целиот свет. Фара засега добива поддршка само од јорданскиот бодибилдер Зеид ал-Фар. И тој ќе настапува во Торонто, па заедно ги делат трошоците за тренирање и заедно бараат спонзори. Но и тоа оди исклучително тешко зашто досега интерес покажале само еден сопственик на радиостаница од Аман и еден сопственик на ноќен клуб од Бејрут. Сепак, Фара не сака помош од семејството.