Култура
Изложба на арт-колонијата „Де Ниро“
Во Кинотеката на Македонија претставени делата од меѓународната ликовна колонија „Де Ниро“ од Битола
Во рамките на Културното лето Карпош 2009 синоќа (17 август, понеделник) во просториите на Кинотеката на Македонија (библиотека „Другарче“) беа претставени триесеттина дела од меѓународната ликовна колонија „Де Ниро“. Изложбата пред голем број заинтересирани љубители на ликовната уметност ја отвори сликарот Мирослав Масин, и самиот неколкукратен учесник во оваа колонија.Арт-колонијата „Де Ниро“ е основана од страна на Драги Филевски пред пет години: се одржува кон крајот на јуни, на неа учествуваат по петнаесеттина уметници, од кои повеќе од две третини се од странство. Познатиот битолски угостител и хотелиер Филевски, попознат по прекарот „Де Ниро“ според името на неговите ресторани и хотели, е голем колекционер: не само што неговата лична колекција брои преку шестотини платна, туку со гордост истакнува дека ниту едно од делата создадени за време на одржувањето на петте колонии не е продадено, освен десеттина платна подарени во хуманитарни цели. Во досегашните творечки сеанси на колонијата „Де Ниро“, која се одржува во објектите на Филевски, но и во природните амбиенти на потпелистерските села Нижеполе и Магарево, учествувале низа значајни имиња на ликовната уметност, како Глигор Чемерски, Милорад-Бата Михаиловиќ, Васко Ташковски, Филип Буловиќ-Липи, Миливое Новаковиќ-Кањош, Панде Петровски, Мирослав Масин, Љубиша Ѓуриќ, Џеко Хоџиќ, Драган Анѓелковиќ, Драган Мијач-Бриле, Лаура Рамбели, Бранко Белиќ, Еуген Борковски… По изложбата во Скопје, делата од арт-колонијата „Де Ниро“ од 10 септември ќе бидат изложени и во Струмица, а наредниве месеци ќе гостуваат и во четири града во Бугарија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.