Култура
Спектакуларно затворен Бум Таксират Фестивалот
Последната фестивалска вечер од Бум Таксират фестивалот беше завршена со спектакуларната изведба на македонскиот виртуоз на електронската музика Кирил Џајковски. Тој заедно со неговиот Серџук оркестар ги отсвире своите најпознати хитови како „Баба Зумбула, „Primitive science“ и „Jungle shadows“.
Последната фестивалска вечер од Бум Таксират фестивалот беше завршена со спектакуларната изведба на македонскиот виртуоз на електронската музика Кирил Џајковски. Тој заедно со неговиот Серџук оркестар ги отсвире своите најпознати хитови како „Баба Зумбула, „Primitive science“ и „Jungle shadows“. Последната фестивалска вечер од Бум Таксират фестивалот во Метрополис Арената ја започна метал групата од Португалија „Moonspell“ кои беа одлично прифатени од публиката, иако таа сè уште влегуваше. Пејачот на Групата Фернандо Рибеиро во неколку наврати истакна колку му се допаднала Македонија и во самиот финиш на настапот тој стави македонското знаме на своите раменици кое му го фрли еден посетител од публиката. Одличен настап имаше најдобриот хип хоп бенд од Хрватска ,„Elemental“ што настапи веднаш по „Moonspell“. Момците од овој состав ја размрдаа македонската публика со својата енергија и одличните и весели песни. Долгонајавуваното звучно име на Холивуд и ѕвездата од филмовите „Ртот на стравот“ и „Родени убијци“ Џулиет Луис и нејзината најнова група „The romantics“ не успеа да допре до публиката и покрај што на својот репертоар имаше песни од најновиот албум „Terra incognita“, што излезе во продажба во септември оваа година. Можеби тоа се должи на фактот што македонската јавност сè уште ја препознава по нејзините филмови, а не е толку запознаена со нејзината музика. „Хладно пиво“, панкерите од Хрватска, продолжија онаму каде што „Elemental“ застанаа. Повторно ја кренаа публиката на нозе со нивните најголеми хитови, за да по полноќ публиката со нетрпение ги дочека единствените „Guano Apes“. Групата од Готинген, Германија, по неколкугодишно отсуство од настапите оваа година повторно се обедини, а на фестивалот ги отсвире добро познатите Open your eyes, Pretty in Scarlett, You can’t stop me, Lords of Boards, Big in Japan. Вокалистката на групата Сандра Насиќ одлично се снајде во комуникацијата со публиката и како Хрватка по потекло но, родена во Готинген, комуницираше со публиката и на српски и хрватски, за да се надополни впечатокот. Насиќ и тапанарот Денис Пошвата, исто така истакнаа колку им се допаднала Македонија, посебно Скопје што за прв пат го посетија. По „Guano apes“ една третина од публиката си замина, и останаа само верните обожаватели на Кирил Џајковски и неговиот бенд. Џајковски заедно со најновиот соработник Ем Си Твид и Серџук оркестарот го отсвиреа хитовите како „Баба Зумбула, „Primitive science“ и „ Jungle shadows“ на веќе уморната публика, со што се затвори едно одлично издание на Бум Таксират фестивалот. Бум Таксират фестивалот беше беспрекорно организиран од безбедносна гледна точка. При самиот влез на посетителите им беа поделени заштитни маски за превенција од свински грип, а организаторите поделија и бесплатни презервативи, бидејќи пред само неколку дена беше одбележан Светскиот ден за борба против сидата. Обезбедувањето беше на високо ниво и не се случи ниту еден инцидент, иако во просторијата се точеше алкохол. /крај/сл
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Распишани конкурсите за државните награди „11 Oктомври“ и „22 Ноември“
Денеска се распишани конкурсите за државните награди „11 Oктомври“ и „22 Ноември“ за 2024 година.
Со државната награда „11 Октомври“ се оддава највисоко признание за животно дело во областа на науката, уметноста, стопанството и во другите дејности од јавен интерес на државата. Наградата се доделува на поединци, група творци, екипи, установи, трговски друштва и здруженија на граѓани од земјава.
Со државната награда „22 Ноември“, пак, се оддава признание на личностите од политичкиот, културниот и општествениот живот во нашата држава кои дале свој придонес во унапредување на меѓучовечкиот соживот и меѓусебно разбирање меѓу припадниците на различните заедници, култури и вери.
Конкурсите за државните награди „11 Oктомври“ и „22 Ноември“ за 2024 година траат од 1 до 31 мај 2024 година.
Конкурсите се објавени и на веб–страницата на Министерството за култура на следните линкови:
Државна награда „11 Октомври“ – https://kultura.gov.mk/wp-content/uploads/2023/10/odluka-3.pdf
Државна награда „22 Ноември“ – https://kultura.gov.mk/22-%d0%bd%d0%be%d0%b5%d0%bc%d0%b2%d1%80%d0%b8/
Култура
Мајските оперски вечери немаат никакви примеси на економски ниту политички стремеж, организаторите го најавија 52-рото издание
Мајските вечери немаат никакви економски ниту политички стремеж, еден ваков уникатен собир ќе го обележи и Скопје и Македонија, соопштија организаторите на прес-конференција.
„Оваа манифестација датира од крајот на 60-тите години. Тогаш имало криза со публика, која не била изразена само во Скопје. Во првите години мајските оперски вечери се празни, но со текот на годините заинтересираноста расте“, изјавја организаторите.
Како што велат оттаму, ова е еден од најголемите фестивали во регионот и со квалитетна програма сите овие години.
„Оваа година ќе има екслузивна програма. Очекуваме одлични резултати“, додаваат оттаму.
Реномираниот македонски режисер Иван Поповски, со успешна кариера во Русија, ја поставува операта „Трубадур“ од Џузепе Верди, со чија премиера ќе се отворат 52. Мајски оперски вечери (МОВ) на 9 мај во Националната опера и балет (НОБ). Диригент ќе биде Енрико Довико (Италија), сценографијата ја работи реномираниот Миодраг Табачки од Србија, костимите Марија Пупучевска, а кореографијата Саша Евтимова.
Во рамките на 52. Мајски оперски вечери, во фоајето на Националната опера и балет, од 9 до 31 мај ќе биде поставена и изложбата „Оперска одисеја“ – наследството на Милка Ефтимова. Изложбата ќе ја сочинуваат донирани лични предмети од движно материјално и нематеријално културно наследство, класифицирани во категоријата лични предмети како и голем број награди, признанија, уметнички портрети и фотографии кои во детали ја прикажуваат нејзината богата музичка кариера.
„Оперска одисеја“ е резултат на институционалната соработка помеѓу Музејoт на македонската борба за самостојност и Националната опера и балет. Автор на изложбата е Василија Чали, соработник за визуелни уметности, дизајн и архитектура.
Култура
Повик за учество на млади поети на „Отскочна даска #3“ во рамките на 4. Скопски поетски фестивал
Скопскиот поетски фестивал, чиешто четврто издание ќе се одржи во периодот од 29 мај до 1 јуни, и годинава го организира преднастанот „Отскочна даска“ ‒ поетско читање за млади поети и поетеси.
‒ Продолжуваме со поддршката за младите поети, за тие што можеби веќе се појавиле со по некоја песна во книжевно списание, ја објавиле својата прва стихозбирка или настапиле на некое поетско читање, но и за тие што можеби и не направиле ништо од сето тоа досега, давајќи им шанса да бидат прочитани, видени и слушнати на настан подготвен само за нив! Како и минатите години, така и оваа, врз основа на испратените песни ние ќе ги избереме учесниците на „Отскочна даска #3“, а тие меѓу себе ќе го одберат најдобриот, односно, ќе изгласаат кој млад поет или поетеса ќе отскокне до официјалното отворање на четвртото издание на СПФ и ќе чита како претставник на најмладата генерација заедно со другите повозрасни и етаблирани поети, соопштија од фестивалот.
Заинтересираните учесници треба да се на возраст од 16 до 25 години и да испратат куса биографија, фотографија со висока резолуција и две свои песни во Word на мејлот [email protected] најдоцна до 13-ти мај.
Имињата на одбраните поети ќе бидат објавени на 20 мај на фејсбук и на инстаграм страниците на фестивалот, а настанот ќе се одржи во кафе-книжарницата „Буква“ на 29 мај, со почеток од 20 часот. Одбраниот млад поет/поетеса ќе чита и на официјалното отворање на СПФ во МКЦ на 30 мај.
Фестивалот е финансиски поддржан од Министерството за култура, а негови помагатели се Младинскиот културен центар – Скопје, градската библиотека „Браќа Миладиновци“ ‒ Скопје и кафе-книжарница „Буква“.