Култура
Пинтер во ЦК
Театар
Кон „Неверство“ од Харолд Пинтер, режија Нина Николиќ. Играат: Дарја Ризова, Благој Веселинов, Мартин Јорданоски и Ненад Митевски. Продукција: Центар за драмски уметности Т-ХАУС.
Постојаната дискусија во нашите театарски кругови околу квалитетот на аматерскиот и професионалниот театар, институционализираниот или алтернативниот и кој од нив е доминантен веројатно ќе беше во ред доколку навистина постоеја некакви дистинкции и можности кај нас да се видат што повеќе нови претстави во нови, поинакви простори со нови актерски имиња. Во последниов период низ домашните театри и нема некоја претстава што би предизвикала поголемо внимание, а изборот на текстови кои се поставуваат како постојано да се повторува.
Но токму во ваква апатична состојба на театарската продукција кај нас одвреме-навреме ќе се почувствува некоја свежина, нови ветришта, нови имиња. Најважно, млади имиња. Токму една таква свежина носи и првата претстава на Центарот за драмски уметности Т-ХАУС, текстот „Неверство“ од Харолд Пинтер, во режија на Нина Николиќ, студентка во четврта година на Факултетот за драмски уметности во класата на Слободан Унковски. Одличен избор! Пинтер и онака не е поставен во Скопје неколку години. Уште подобар избор е и просторот на културниот центар ЦК каде се игра претставата. Мал простор кој уште поавтентично го доловува згуснатиот и енигматичен стил на британскиот драматург. Четворицата актери – Дарја Ризова, Благој Веселинов, Мартин Јорданоски и Ненад Митевски, студенти и дипломци од ФДУ, многу сериозно ја сфатиле задачата да се игра во еден текст на генијалниот автор. Нивната младешка енергија многу лесно ја внесува публиката во целата сложувалка од зборови, изговорени и неизговорени, тишината толку карактеристична за Пинтер, анахронизмот во дејството и разголувањето на меѓусебните човечки односи. Клуч кон откривањето на најдлабоките човечки тајни, машко-женските односи, пријателството во кое изневеруваат и истовремено сите се изневерени. Јазикот кој кај Пинтер никогаш ја нема примарната функција на комуникација овде многу лесно комуницира со публиката, повторно благодарение на актерите. Навистина пријатно изненадување.Со надеж за долг живот на овој Пинтер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.
Култура
Распишани конкурсите за државните награди „11 Oктомври“ и „22 Ноември“
Денеска се распишани конкурсите за државните награди „11 Oктомври“ и „22 Ноември“ за 2024 година.
Со државната награда „11 Октомври“ се оддава највисоко признание за животно дело во областа на науката, уметноста, стопанството и во другите дејности од јавен интерес на државата. Наградата се доделува на поединци, група творци, екипи, установи, трговски друштва и здруженија на граѓани од земјава.
Со државната награда „22 Ноември“, пак, се оддава признание на личностите од политичкиот, културниот и општествениот живот во нашата држава кои дале свој придонес во унапредување на меѓучовечкиот соживот и меѓусебно разбирање меѓу припадниците на различните заедници, култури и вери.
Конкурсите за државните награди „11 Oктомври“ и „22 Ноември“ за 2024 година траат од 1 до 31 мај 2024 година.
Конкурсите се објавени и на веб–страницата на Министерството за култура на следните линкови:
Државна награда „11 Октомври“ – https://kultura.gov.mk/wp-content/uploads/2023/10/odluka-3.pdf
Државна награда „22 Ноември“ – https://kultura.gov.mk/22-%d0%bd%d0%be%d0%b5%d0%bc%d0%b2%d1%80%d0%b8/
Култура
Мајските оперски вечери немаат никакви примеси на економски ниту политички стремеж, организаторите го најавија 52-рото издание
Мајските вечери немаат никакви економски ниту политички стремеж, еден ваков уникатен собир ќе го обележи и Скопје и Македонија, соопштија организаторите на прес-конференција.
„Оваа манифестација датира од крајот на 60-тите години. Тогаш имало криза со публика, која не била изразена само во Скопје. Во првите години мајските оперски вечери се празни, но со текот на годините заинтересираноста расте“, изјавја организаторите.
Како што велат оттаму, ова е еден од најголемите фестивали во регионот и со квалитетна програма сите овие години.
„Оваа година ќе има екслузивна програма. Очекуваме одлични резултати“, додаваат оттаму.
Реномираниот македонски режисер Иван Поповски, со успешна кариера во Русија, ја поставува операта „Трубадур“ од Џузепе Верди, со чија премиера ќе се отворат 52. Мајски оперски вечери (МОВ) на 9 мај во Националната опера и балет (НОБ). Диригент ќе биде Енрико Довико (Италија), сценографијата ја работи реномираниот Миодраг Табачки од Србија, костимите Марија Пупучевска, а кореографијата Саша Евтимова.
Во рамките на 52. Мајски оперски вечери, во фоајето на Националната опера и балет, од 9 до 31 мај ќе биде поставена и изложбата „Оперска одисеја“ – наследството на Милка Ефтимова. Изложбата ќе ја сочинуваат донирани лични предмети од движно материјално и нематеријално културно наследство, класифицирани во категоријата лични предмети како и голем број награди, признанија, уметнички портрети и фотографии кои во детали ја прикажуваат нејзината богата музичка кариера.
„Оперска одисеја“ е резултат на институционалната соработка помеѓу Музејoт на македонската борба за самостојност и Националната опера и балет. Автор на изложбата е Василија Чали, соработник за визуелни уметности, дизајн и архитектура.