Четири нови случаи на жолтица се регистрирани во изминативе два дена во Скопје, со што вкупниот број на заразени достигна 76.

Двајца пациенти се од Шуто Оризари, а по еден од Аеродром и Кисела Вода. Новите случаи не се епидемиолошки поврзани. 

Со последното заболено 13-годишно девојче од Шуто Оризари, бројката на хоспитализирани лица со хепатит А на Инфективната клиника е 17 и сите се во стабилна состојба. 

Во Скопје вкупниот број на случаи со жолтица се искачи на 76. 

Освен во главниот град, епидемија на жолтица е прогласена и во Штип, каде што во вторник биле пријавени три нови случаи со што вкупниот број на пациенти со хепатит А се искачи на 37. 

Во Куманово, пак, има три случаи на жолтица. 

Вирусниот хепатит А (епидемиски хепатитис, заразна жолтица) е акутно вирусно заразно заболување со добра прогноза, ретки компликации и со ниска смртност. 

Заболувањето се пренесува по фекално-орален пат. Станува збор за заразна болест која може да се појави спорадично или во епидемиска форма, особено во лоши санитарно хигиенски услови, после поплави или други природни катастрофи. 

Основната превенција од хепатитис А е иста како и кај другите цревни заразни заболувања т.е. редовно одржување на лична и општа хигиена. Правилното миење на рацете со сапун и со хигиенски исправна вода по секое користење на тоалет, пред и во текот на подготвувањето на храната, како и пред секое консумирање на намирници, сосема е доволно да се спречи контактното ширење на оваа инфекција, велат од Институтот за јавно здравје. 

Исто така, важно е да се употребува хигиенски исправна вода за пиење и да се води сметка за хигиенската диспозиција на отпадните материи. 

Болеста може да се спречи и со давање на вакцина против хепатитис А. Вакцинирањето против хепатитис А се препорачува за одредени ризични категории на граѓани, најчесто на патници кои патуваат во ендемски подрачја и во земји со лоши хигиено-санитарни услови, на лица кои работат во производство на храна, лица кои работат во комунални претпријатија, лица кои работат со вирусот во истражувачки лаборатории итн. крај/мф/сд