Култура
8 Bit вечер во „Точка“
Во културниот центар „Точка“ во петок, 4 декември, со почеток во 19:30 часот ќе се одржи предавање на германскиот музичар Тобијас Хикетиер, насловено „Понг принцип“
„Понг принцип“ („Das Pong Prinzip“) е предавање за историјата и културата на 8 Bit музика. Тобијас Хикетиер е член на групата „Jigsaw Screening“, која се занимава со продукција и рецепција на дигитални и недигитални медиуми. Неговото предавање „Понг принцип – развојот и културата на 8 Bit видео и компјутерски игри” ја осветлува историјата на почетоците на оваа компјутерска игра во контекст на нејзиното повторно усвојување денес. Првиот дел ги опфаќа пионерите на компјутерските игри на 50-те и 60-те години, во вториот дел ќе стане збор за настанокот на една индустрија од ова поле и митот поврзан со нејзините зачетоци, играта „Понг”. Третиот дел го опфаќа подемот на персоналниот компјутер во 80-те и зачетоците на една дигитална супкултура – кракери и демосцена. За крај, следи осврт кон гембојот, кој во 90-те години ја спаси 8 Bit техника, а кој пак денес е омилен меѓу 8 Bit музичари. Предавањето ќе биде дополнето со слики, видеоклипови и звучни илустрации.По предавањето на Хикетиер, во 20:30 часот Матијас Вицке, алијас „Модерен свет“ и практично ќе ни покаже што значи 8 Bit култура. Пример за тоа како денес може да звучи 8 Bit музика е соло-формацијата „Модерен свет“ од Хановер. Во живо од сцената, со вокал и „Комодоре 64“, со домашно програмирана музика, како и со касети со семплови од стари рок изведби, „Модерен свет” изведува впечатливи диско мелодии. „Модерен свет“ создава музика која не е задоволство само за љубителите на оваа супкултура, туку и за сите слушатели, нудејќи забава и ритам создаден за играње. 8 Bit вечер е весел настан за сите љубители на културниот живот во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Повик за учество на млади поети на „Отскочна даска #3“ во рамките на 4. Скопски поетски фестивал
Скопскиот поетски фестивал, чиешто четврто издание ќе се одржи во периодот од 29 мај до 1 јуни, и годинава го организира преднастанот „Отскочна даска“ ‒ поетско читање за млади поети и поетеси.
‒ Продолжуваме со поддршката за младите поети, за тие што можеби веќе се појавиле со по некоја песна во книжевно списание, ја објавиле својата прва стихозбирка или настапиле на некое поетско читање, но и за тие што можеби и не направиле ништо од сето тоа досега, давајќи им шанса да бидат прочитани, видени и слушнати на настан подготвен само за нив! Како и минатите години, така и оваа, врз основа на испратените песни ние ќе ги избереме учесниците на „Отскочна даска #3“, а тие меѓу себе ќе го одберат најдобриот, односно, ќе изгласаат кој млад поет или поетеса ќе отскокне до официјалното отворање на четвртото издание на СПФ и ќе чита како претставник на најмладата генерација заедно со другите повозрасни и етаблирани поети, соопштија од фестивалот.
Заинтересираните учесници треба да се на возраст од 16 до 25 години и да испратат куса биографија, фотографија со висока резолуција и две свои песни во Word на мејлот [email protected] најдоцна до 13-ти мај.
Имињата на одбраните поети ќе бидат објавени на 20 мај на фејсбук и на инстаграм страниците на фестивалот, а настанот ќе се одржи во кафе-книжарницата „Буква“ на 29 мај, со почеток од 20 часот. Одбраниот млад поет/поетеса ќе чита и на официјалното отворање на СПФ во МКЦ на 30 мај.
Фестивалот е финансиски поддржан од Министерството за култура, а негови помагатели се Младинскиот културен центар – Скопје, градската библиотека „Браќа Миладиновци“ ‒ Скопје и кафе-книжарница „Буква“.
Култура
Костадиновска-Стојчевска: Танцот со својата креативност ја афирмира македонската култура
Министерката за култура, Бисера Костадиновска-Стојчевска, го честита Светскиот ден на танцот – денот кога танцот се слави како моќ на човечкиот дух, на уметничкото творештво и на значењето на танцовата сцена во обликувањето на модерната уметност.
„Министерството за култура го потврдува својот придонес кон сцената и останува партнер во афирмацијата на македонскиот танцов идентитет“, рече министерката Костадиновска-Стојчевска, додавајќи дека танцот како креативна универзална уметност ја одразува и ја промовира македонската култура која има значајна историја на танци низ чие постоење се рушеле предрасуди и ограничувања.
Костадиновска-Стојчевска изрази уверување дека заедничките проекти го унапредуваат културниот дијалог и ја носат слободата на уметноста.
Култура
Велигденски концерт на НУ „Охридско лето“ со женскиот хор „Менада“
Во организација на НУ „Охридско лето“, а по повод големиот верски празник Велигден, утре во црквата „Света Софија“ во Охрид со почеток од 20 часот ќе се одржи Велигденски концерт на православна духовна музика со женскиот хор „Менада“ од Тетово под диригенската палка на професор Ивица Зориќ.
„Со овој концерт заокружуваме програмата која веќе трета година ја реализираме надвор од традиционалната фестивалска рамка 12 јули- 20 август. Имавме прекрасни концерти преку цела година со кои ја потврдивме големината на долгогодишното опстојување на оваа најзначајна културно-сценска манифестација“, вели директорката на НУ „Охридско лето“, Наташа Поповиќ.
Женскиот хор „Менада“ , предводен од диригентот проф. д-р Ивица Зориќ е еден од најрепрезантитивните хорови од нашата земја. Со своето четиридецениско делување тој прерасна во еден од стожерите во развојот и опстојувањето на хорската уметност кај нас.
Хорот „Менада“ е основан 1981 година во Тетово и сите овие години е предводен од маестро Ивица Зориќ. На репертоарот на хорот редовно се застапени композиции од најразлични епохи и стилови од македонската и светската хорска акапела и вокално-инструментална музика. Хорот е добитник на многубројни награди и признанија во Македонија, поранешна Југославија и Европа, за што сведочат бројните настапи на фестивали, конкурси и концертни турнеи во Чешка, Полска, Шпанија, Шведска, Холандија, Данска, Португалија, Босна и Херцеговина, Хрватска, Србија, Албанија, Романија, Бугарија,Турција, Германија, Грција, Словенија, Австрија,Белгија, Косово…..
Билетите по цена од 200 денари можат да се набават во Дирекцијата на НУ „Охридско лето“.