Култура
Театарска недела на програмата на „Културно лето Карпош 2009“

Со авторскиот проект на Слободан Деспотовски „Стари пријатели“ во Драмскиот театар на 2 септември продолжува програмата на „Културно лето Карпош 2009“. Оваа недела публиката ќе може да погледне пет театарски претстави
На 4 септември, со почеток во 21 часот, на платото во ТЦ Лептокарија ќе биде изведена претставата „Валкани приказни“ од Мал драмски театар – Битола, во режија на Софија Ристевска. „Валкани приказни“ од П. Гутиерес, Р. Полеш, Е. Енслер и Е. Олби на публиката и‘ нуди микс на современиот свет токму преку сексуалноста, страстите и различните девијации. Распадот што се случува во општеството доспева на сцената. Оваа едночинка е своевидна деконструкција на сексот и насилството. Трите лика се маргиналци (иако млади веќе се губат во џунглата на светот, а нивното барање на сопствениот идентитет е повеќе скитање), кои доспеваат на јавната сцена, нешто што само по себе им се препорачува на младите генерации театарски гледачи. Бруталноста и вулгарноста тука се во функција на естетски категории како еден вид хиперреализам. „Валканите приказни“ се чист и девствен театарски чин, кој може да се сублимира како приказ на суровата вистина.Играат: Никола Тодоровски, Стрезо Стаматовски и Адријана Билаловиќ.Наредната вечер, во Хавзи-пашините конаци во Бардовци, ансамблот на НТ „Војдан Чернодрински“ од Прилеп ќе ја изведе претставата „Крпен живот“ во режија на Владо Цветановски. За драмска нишка претставата го има романот на Стале Попов, но нема класична драматуршка структура, туку е составена од фрагменти, слики, моменти од еден заборавен живот, ехo на нашето колективно генетско сеќавање. Играат: Кирил Ристовски, Игор Трпчески, Зоран Иваноски, Алекандар Тодески, Димитар Црцороски, Јасмина Мицовска – Станкоска, Наташа Наумоска, Марија Спиркоска – Илијески, Даниела Стојковска, Димитар Ѓорѓиевски, Катерина Чакмакоска, Александар Степанулески и Никола Настоски.На 6 септември, 21 часот, на академската сцена при Факултетот за драмски уметности во Скопје, ќе биде изведена „Пикник на фронтот“ во режија на Лука Кортина. „Пикник на фронтот“ е надреална, црна комедија за војната. Авторот, Фернандо Арабал, е современ шпански писател кој живее во Париз, откако избегал од режимот на Франциско Франко. Играат: Мирослав Петковиќ, Перо Арсовски, Снежана Стамеска, Кристијан Светиев, Тина Трпкоска и Катерина Аневска. На 7 септември, пак, на сцената на Драмскиот театар, ќе биде одиграна „Граница“ – уште една претстава на Мал драмски театар – Битола, во режија на Софија Ристевска, по текстот на Венко Андоновски. „Граница“ зборува за тоа колку политиката навлегува и располага со човечката индивидуа. Оваа претстава јасно покажува дека општеството, дури и кога е најагресивно, не смее да да го повреди просторот под покривката на креветот. Играат: Горан Стојаноски, Јасмина Билаловиќ, Никола Тодороски, Јоана Поповска и Борис Чоревски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Промоција на „Ќумур смоквин млеч“, дебитантската стихозбирка на Стефан Спасовски

В четврток од 20:00 часот, во кафе-книжарницата „Буква“ ќе се одржи промоцијата на „Ќумур смоквин млеч“, збирката првенче на младиот поет Стефан Спасовски. Преку разговор и читање на дел од песните ќе биде претставена стихозбирката.
Промотор ќе биде Андреј Медиќ Лазаревски, кој во својот текст за стихозбирката пишува: „’Ќумур смоквин млеч’ е стегната и јасна стихозбирка, со избистрен јазик, структурно одлично обмислена, интертекстуална и интердискурзивна книга. Таа е во широк дијалог со современата, пред сѐ, македонска книжевност, рефлектирајќи прашања кои се земени од општото, традиционалното и перенијалното, вметнувајќи ги во личните прашања, современиот контекст на светот во кој живееме и длабоко интимните проблеми и ставови.“
„Ќумур смоквин млеч“ беше наградена со Антев часовник од Меѓународната поетско-културна манифестација „Анте Поповски – Антево перо“ за необјавена поетска збирка од млад автор и организаторите на манифестацијата за стихозбирката велат дека е интересно патување по сетилните меридијани на поетовата млада душа.
Стефан Спасовски е студент на Катедрата за македонски јазик на Филолошкиот факултет „Блаже Конески” во Скопје. Дел е од тимот на кафе-книжарницата „Илика“, а во Здружението за афирмација на младинската култура „Култура Бета“ работи врз јазично уредување и редакција на текстовите. Бил дел од уредничкиот одбор на студентското списание „In medias reѕ“. Се занимава со пишување есеи и поезија. Има учествувано на повеќе поетски читања („Поетска епизода“, Скопски поетски фестивал…).
Култура
Гала концерт на отворено „Од #MOБ за Скопје“

Националната опера и балет на 5 јули со почеток во 21 часот на Плоштадот Мајка Тереза (на платото пред МОБ) ќе одржи гала концерт „Од #MOБ за Скопје“,
Концертот ќе се одржи во чест на 200 годишнината од раѓањето на Јохан Штраус, еден од најзначајните композитори на виенската класика. Ќе настапи оркестарот при МОБ составен од 80 музичари, под диригентска палка на маестро Винценц Праксмарер и солистите Бригита Симон и Иван Наумовски, со репертоар составен од најпознатите валцери, арии и маршеви на Штраус.
Овој уникатен концерт е организиран во соработка со Австриската Амбасада во Скопје, со поддршка од институциите и приватниот сектор и ќе биде сниман и директно пренесуван на каналот на МРТ1.
Култура
Проекција на седум кусометражни играни филма во Кинотеката

На 2 јули (среда) со почеток во 20 ч., во летното кино „Мирно лето“ на Кинотеката на РСМ ќе се одржи проекција на седум кусометражни играни филмови работени според сценарија на македонски писатели.
На програмата се филмовите: „Сонце зад решетки“ од 1957 г., по сценарио и во режија на Славко Јаневски; „Твојот роденден“ од 1961 г., по сценарио на Илхами Емин, во режија на Здравко Велимировиќ; „Невољите на покојникот К. К.“ од 1963 г., по сценарио на Коле Чашуле, во режија на Здравко Велимировиќ; „Давид, Голијат и петел“ од 1960 г., по сценарио и режија на Славко Јаневски; „Лифт горе, лифт долу“ од 1967 г., по сценарио на Ташко Георгиевски, во режија на Душан Наумовски; „Човекот во црно“ од 1970 г., по сценарио на Мето Јовановски, во режија на Бранко Ставрев и „Споменик“ од 1968 г., по сценарио на Бошко Смаќоски, во режија на Вељо Личеноски.
Проекцијата е организирана од Кинотеката на РСМ, во соработка со Друштвото на писателите на Македонија, а селектор на програмата е вонр. проф. д-р Атанас Чупоски, вработен како филмолог советник во Кинотеката и член на ДПМ.