Објавен е шестиот по ред конкурс за претпријатијата регистрирани во Република Македонија за добивање на награда за најдобри општествено одговорни практики.

Новитет годинава е што Националната награда за првпат станува дел од иницијативата поддржана од Европската комисија – „Европски систем на наградување на општествена одговорност на претпријатијата“, чија цел е да промовира позитивни практики на општествено одговорно делување и притоа да инспирира за воведување и понатамошно унапредување на општествена одговорност кај претпријатијата во Македонија.

„За првпат оваа година Република Македонија се приклучува на иницијативата наречена Европска шема за наградување на претпријатијата, поддржана од Европската Комисија и две организации: CSR Europe од Брисел и Business in the Community од Велика Британија. Главната цел на Европската шема за ООП е да ги награди најдобрите ООП проекти од 29 земји, по две за секоја земја, и тоа едно големо и едно мало или средно претпријатие, со нагласено партнерство на бизнисите со јавниот или граѓанскиот сектор“, информираше министерот за економија Ваљон Сараќини.

Тој додаде дека годинава компаниите треба порано да ги изготват своите проекти и да аплицираат, а церемонијата за доделување на Наградите во Македонија е предвидено да се одржи на 18 април 2013 година.

„Најдобрите практиките на нашите претпријатија во оваа област ќе бидат промовирани во Брисел, пред широката европска јавност и ќе добијат Сертификат потпишан од висок претставник на ЕК“, истакна Сараќини.

Евроамбасадорот Аиво Орав, кој присуствуваше на објавувањето на конкурсот, рече дека годинава се обезбедени 652.000 eвра преку програмата за Иновации и претприемништво, во рамките на Рамковната програма за конкурентност и иновации (ЦИП) за кофинансирање на Европската шема.

Пријавените претпријатија, додаде амбасадорот, ќе можат да добијат признание како предводници во општествената одговорност на претпријатијата, да ја зголемат својата репутацијата и кредибилитетот на национално и европско ниво, да ја прикажат својата иновативност и заложбите за постигнување на одржливост, да учествуваат во размена на најдобри практики и да добијат сугестии за унапредување на своите општествено одговорни практики од стручни комисии, да ги одбележат успешните партнерства со непрофитни субјекти.

Претседателот на Координативно тело за општествена одговорност на претпријатијата Александар Николовски информираше дека Националната награда се доделува во пет категории: oдноси со вработените, eтичко управување, односи на пазарот, заштита на животната средина и вложување во заедницата и дека едно претпријатие може да аплицира само со еден проект во една категорија, а истовремено може да учествува со повеќе проекти, доколку се во различни категории.

„Претпријатијата ќе може да ги доставуваат своите пријави за учество од 18 јануари до 11 март 2013 година, преку пополнување на формулар што е објавен на веб страната на Министерството за економија и на веб страната на Координативното тело за ООП“, објасни Николовски, потсетувајќи дека во изминатите пет години македонските претпријатија пријавија речиси 300 добри практики, со кои ја демонстрираа својата одговорност кон животната средина и кон заедницата. /крај/со/ст