Манифестации
Со концерт на народни песни отворенa деветтата културна манифестација ’Три круши’
Со најубавите македонски фолклорни рефрени, испеани од тројца врвни музичари поддржани од три професионални оркестра, во петокто вечерта на локалитетот Три круши крај скопското село Драчево, беше отворено деветтото издание на Културното лето на општина Кисела Вода „Три круши 2014“.
Едномесечното културно доживување свечено го отвори градоначалничката на општина Кисела Вода Билјана Беличанец-Алексиќ. „На оваа сцена, почнувајќи од вечерва, па сé до крајот на јули, ќе има случувања кои навистина го заслужуваат вашето ценето внимание. Изборот на секоја содржина која ќе имате можност да ја погледнете, е внимателно направен како би ги задоволил критериумите за квалитет и естетика, притоа потпирајќи се на вкусовите и желбите на жителите на општина Кисела Вода, за кои, пред се, е наменета оваа манифестација. За нас, овогодинешното издание на манифестацијата Три круши, има посебно значение. Посебно затоа што започнува во предвечерјето на 59-иот роденден на општина Кисела Вода и претставува симбол на уште едно од вашите остварени желби, а наши ветувања. Довербата што Вие ни ја дадовте и која резултираше со конкретни проекти, е наша движечка сила во воздигнувањето на оваа локална самоуправа до вистински “сервис на граѓаните”. Водејќи се од дадениот збор пред Вас и одговорноста што тој со себе ја носи, работевме и работиме на остварување на вашите реални желби и потреби, било да се работи за изградба на водоводна и канализациска мрежа, реконструирање на патишта, обнова на старите и отворање на нови училишта и градинки, отворање на повеќенаменски игралишта и други спортски објекти, легализација на дивоградби, доделување на ваучери за вашите новороденчиња, стипендирање на најдобрите ученици од општината или задоволување на вашата потреба за квалитетни културни случувања, какво што е ова, вечерва“, рече на отворањето на манифестацијата Беличанец-Алексиќ Концертот започна со настапот на оркестрите при МРТ- Големиот народен оркестар, Oркестарот на народни инструменти и оркестарот Чалгии. Ним им се придружи Анастасија Петреска чија изведба на познатите „Среќата со пари не се купува“, „Јоване море Јоване“, „Каде е мојто либе“, беше громогласно поддржана од публиката. Во дует со Петреска, Владимир Попоски ја изведе „Калино моме“, а веднаш потоа, преку својот настап сите ги потсети на најубавите изворни македонски песни како „Море сокол пие“, „На сред село чeшма шарена”, „Стани моме да заиграш”…
Енергијата што со себе ја носи македонската песна, на сцена ја донесе и Елена Георгиева која заедно со публиката ги испеа „Мите море Мите”, „Фато мори душманке”, „Не кажувај либе добра ноќ”…Со заедничка изведба на „Земјо македонска” и спектакуларен огномет, беше означен крајот на првото случување од широкиот спектар на културни настани кој ќе биде понуден на публиката во рамки на деветото издание на „Три круши 2014“”Саботната програма од манифестацијата започнува во 20.30 часот, со концертот на уметниците од Факултетот за музичка уметност во Штип – отсек етно-кореологија и игра, како и учениците од Средното музичко училиште „Илија Николовски – Луј” – отсек фолклор кои го сочинуваат ансамблот „Македонија”./крај/мф/таи
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Полска вечер на „Охридско лето“ со концертот на гудачкото дуо Салвадор
Полската вечер во рамките на годинешното издание на „Охридско лето“ го носи концертот на гудачкото дуо Емануел и Емилија Салвадор.
За виолинистот Емануел Салвадор специјализираниот магазин „Страд“ пишува дека е еден од најдобрите виолинисти од неговата генерација. Студирал и на Кралскиот колеџ за музика во Лондон. Емануел Салвадор има снимено неколку албуми и реализирано успешни концертни турнеи во Југоисточна Азија, Кина, Јапонија и САД.
Емилија Гох Салвадор како уметник на виола има дипломирано со највисоки оценки на музичката академија „Јан Падеревски“ во Познан во класата на проф. Доминик Рутовски. Во 2008 година го основа гудачкиот оркестар „Балтик Неополис“.
Култура
Утре, во Трпејца, почнува 12. издание на манифестацијата „На зајдисонце“
Во организација на здружението „За Трпејца со љубов“ и под покровителство на Општина Охрид, од утре до 28 јули, 12. пат оваа туристичка населба и гостите ќе дишат во ритамот на новото издание на културно-забавната манифестација „На зајдисонце“.
Утре, четврток, на отворената сцена во Трпејца, од 20.30 часот, во името на покровителот, Општина Охрид, манифестацијата за отворена ќе ја прогласи заменик-градоначалникот Перчо Божиноски.
Приустните ќе може да ја видат изложбата на дела од Интернационалната уметничка колонија, која се одржува во Трпејца, а во музичкиот дел ќе настапат Влатко Броз и диџеј Марама.
В петок во истиот термин публиката ќе може да се запознае со минатото на дел од околината на Трпејца. Младиот Петар Симоноски ќе прикаже видеопрезентација на тема: „Тврдина Осој од VI век“.
Викендот е резервиран за документарни филмови. В сабота навечер публиката ќе го гледа документарно-туристичкиот филм „Трпејца на дланка“, работен по сценарио на Милчо Јованоски.
Следната вечер од 20.30 часот публиката ќе се запознае со Љупчо Паункоски и неговиот документарен филм „Охридските пливачки легенди“.
Неделното утро е резервирано за традиционалната прошетка на домаќините и гостите по патеката Чоколско.
В понеделник, на 24 јули, во Трпејца ќе гостува бендот „3.0“ (три промили), а денот потоа е резервиран за традиционалната кајакарска регата „Номче Митрески“ и натпреварот во пливање.
Вечерта е резервирана за прошетката „Со кајче по езерото“.
В среда, на 26 јули, од 19.30 часот, посетителите на манифестацијата „На зајдисонце“ ќе може да учествуваат на атрактивната трка со куфери по скалинадата во Трпејца.
Час подоцна, ќе следува интересната видеопрезентација „Пчелите ќе го спасат светот“ од Петар Стојаноски од фирмата „Органски природен мед“ од Трпејца.
Претпоследната вечер од културното лето во Трпејца е резервирана за драмското студио „Цвет 75 “ од Охрид, под раководство на Драгана Боцевска. Младите актери ќе ја одиграат претставата „Пепелашка од Охрид“.
На крајот од дванаесеттото издание на „Зајдисонцето“, охридскиот сликар, фотограф и филмофил Ѓоко Симјаноски ќе гостува со изложбата на портрети „Беше еднаш Холивуд“.
Летото во свој стил со пародијата „Дојдете во Трпејца“ ќе го затворат познатата македонска актерка Марија Кондовска и угостителот Марјан Митрески-Мац.
Култура
Заврши 57. фестивал „Војдан Чернодрински“ во Прилеп: „…Медеја“ е најдобра претстава
Синоќа со врачувањето на наградата за претставата „Се викам Медеја“ (My Name is Medeja) на Народниот театар од Битола за најдобро уметничко остварување во целина заврши 57. фестивал „Војдан Чернодрински“ во Прилеп.
Награда за најдобра режија доби Себастијан Хорват, за најдобра главна женска улога – Илина Чоревска, за најдобра музика – Драго Ивануша и за најдобар рекламен материјал – Сашо Илковски.
Скопскиот Драмски театар и претставата „Чудна случка со кучето во ноќта“ освои 5 награди, меѓу кои и за главна машка улога за Дамјан Цветановски и за најдобра женска епизодна улога за Емилија Мицевска.
Наградени беа и Турскиот театар за претставата „Човек перница“, како и Прилепскиот театар за „Мистерија Буфо“ и на Театарот за деца и младинци, за „Роња, ќерката на ограбувачот“.
Наградата за современа сценска драматизација ја доби Лидија Митоска-Ѓоргиевска за „Мистерија Буфо“.
Наградата за млад актер „Трајко Чоревски“ ја доби Хакан Даци за улогата на Катуриан во претставата „Човек перница“ во изведба на Турскиот театар од Скопје, копродукција со „Машина продакшн“ и „Пик продукција“. За истата претстава, за улогата на Микаил, актерот Дин Ибрахим ја доби наградата за најдобра машка епизодна улога. Наградата за млада актерка ја доби Матеа Јанковска за Роња во „Роња, ќерката на ограбувачот“ на Театар за деца и младинци од Скопје.
Со свечената вечер со наградените на финалето на „Черондрински“ и со изведбата на „Последниот балкански вампир“ на Дејан Дуковски и Александар Поповски, на Српското народно позориште од Нови Сад, се спушти завесата на годинешниот МТФ „Војдан Чернодрински“, со најава за нова свежина и афирмација на македонската драма вгодина.