Намалени цени на лекови, олеснување на начинот на добивање лек на товар на Фондот за здраствено осигурување и поголем избор на лекови, се некои од новините на ФЗОМ што во вторник на прес-конференција ги објави директорката Маја Парнарџиева Змејкова.

Се очекува заштедите од новините за осигурениците да бидат 200.000 денари годишно, а Фондот за лекови годишно ќе може да пренамени два милиони  денари. 

Прва новина е намалени референтни цени на 13 лекови. 

„Поради влез на пазарот на нови регистрирани лекови во Република Македонија, ФЗОМ утврди нови намалени, избалансирани референтни цени за лекови кои се користат кај пациенти со трансплантирани органи, лекови од групата на антидепресиви, остеопороза, антиепилептици, антипаркинсоници, за мијастенија гравис (нервно-мускулна болест).  Со оваа новина Фондот обезбеди нови, во сите 13 генерики, по најмалку еден без доплата за осигурениците и одлуките се објавени во Службен Весник“, појасни Парнарџиева Змејкова. 

Втората новина се однесува на 20 нови заштитени имиња на лекови. 

„Поради влез на нови лекови на пазарот на лекови во РМ, ФЗОМ изврши дополнување на одлуката за референтни цени на лекови со нови 20 заштитени имиња, со што се зголемува можноста на избор на лекови за осигурениците. Лековите се наменети за терапија на желудник, за намалување на масти во крв, антибиотици, Алцхајмер, астма и ХОББ, карциноми, против болки и покачена телесна температура“, рече директорката на ФЗОМ. 

Исто така, додаде, ФЗОМ изврши промена во режимот на пропишување за 28 генерики со форма и јачина – тоа значи дека осигурениците ќе може да добиваат препорака за лекови од повеќе лекари специјалисти отколку досега. 

ФЗОМ овозможи отсега лекот levothyroxine за штитна жлезда, да може да го препишува матичен лекар, при хронична примарна хипотироза. Оваа поволност ќе биде олеснување за 10.000 осигуреници. 

Директорката на ФЗОМ информираше дека се направени и дополнувања и корекции за индикациите на лекови што се наоѓаат на Позитивна листа – отсега осигурениците ќе може да добиваат лекови на товар на ФЗОМ и за нови индикации. 

„Дополнување на индикации има кај следните лекови: Ursodeoxycholic acid (Ursofalk) кој е наменет за третман на жолчка и жолчни патишта, а  сега може да се пропишува за терапија на деца до 14 години болни од цистична фиброза и со алажил синдром; Cefadroxil (Alycef, Duracef) и Cefuroxime (Zinnat, Xorimax, Aksef, Cefaks, Megasef, Inceptum-sanovel) и Cefaclor (Alfacet, Cefaklor Alkaloid) од групата антибиотици цефалоспорини,  што сега може да се пропишува и за генитоуринарни инфекции; Amoxicillin (Sinacilin, Hiconcil. Moxilen, Almacin, Ospamox) што спаѓа во групата на бета лактамски антибактериски средства, а  сега може да се пропишува и за одонтогени (стоматолошки) инфекции; Dydrogesterone (Dabroston), кој спаѓа во групата на полови хормони и лекови за третман на гениталниот систем сега може да се пропишува и за крварење во рана бременост; отсутна, скудна и ретка менструација;  обилна, честа и нередовна менструација;  друго означено ненормално крвавење од утерус и вагина“, појасни Парнарџиева Змејкова. 

Со измените, лекот Benzathine phenoxymethylpenicillin со заштитено име Ospen  ќе може да се пропишува без ограничувања од матичните лекари кај бремените жени и малите деца, а Cefalexin ќе може да се пропишува без ограничувања од матичните лекари, согласно регистрираните индикации за лекот.крај/мф/