Бројот на предвремено родени бебиња во Македонија е во пораст. Ако во 2013 година на месечно ниво на Клиниката за детски болести биле згрижени три до четири предвремено родени бебиња, оваа година бројот е зголемен за 50 проценти.

Во последните години постои светски тренд на пораст на бројот на предвремено родени деца кој е последица на современиот начин на живот, поместувањето на старосната граница кај мајките и тоа што се поголем е бројот на прворотки на возраст постара од 35 години, како и на примената на ин витро оплодувањето кое често резултира со близначка бременот која сама по себе е многу ризична и голем дел од овие бебиња се прематурни. 

Од Детската клиника велат дека и во земјава постои тренд на зголемување на бројот на хоспитализирани предвремено родени бебиња, како и поместување на старосната граница и денес имаме се повеќе бебиња родени во 24-та гестациска недела. 

„Ако во 2013 просечно на месечно ниво на Одделот за интензивна нега и терапија на Клиниката за детски болести беа згрижени три до четири предвремено родени бебиња, во 2014 бројот е зголемен за некаде 50 отсто и сега во просек имаме шест до седум бебиња месечно. Од овој број на предвремено родени,  45% се бебиња родени во 32-37 недела, 25% се во 28-32 недела, 20% се родени во 26-28 недела, 8% во 24-26 ГН и само 2% се деца родени под 24 недела“, покажуваат статистиките на Детската клиника. 

Најмалото дете на Одделот за интензивна нега на Детската клиника, кое беше третирано со комплетно излекување и дете кое има комплетно уреден психомоторен развој, е родено во 25-26 Гестациска недела со тежина од 670 грама и должина 32 центиметри. 

„Групата на предвремено родени деца се највулнерабилната група на пациенти на одделите за интензивна нега и терапија, пред кои се наидува на најголеми предизвици не само во насока на спасување на нивниот живот туку и овозможување на квалитетен и нормален живот. Во последнава година ипол, со воведувањето на новите методи особено воведувањето на неинвазивната (нежна) вентилација Bubble CPAP, одделот може да се пофали со поголемо преживување особено во групите 26-28 ГН. Оваа метода е замена за механичката вентилација во ситуации кога состојбата на бебето тоа го дозволува. Со овој неинвазивен пристап се намалуваат инфекциите како и одредени состојби предизвикани од интубирањето и механичката вентилација. Иако Bubble C Pap методот во светските неонатолошки центри се употребува години назад, во нашава земја ние сме единствена институција која го користи и резултатите се видливи дури и за овој краток период“, вели д-р Аспазија Софијанова, директорка на Клиниката за детски болести.крај/мф