Неофицијалните прогнози на порталот Slate врз основа на податоците од предвременото гласање на американските претседателски избори во вторникот ѝ даваат предност на кандидатката на Демократската партија, Хилари Клинтон, во три од клучните сојузни држави Флорида, Охајо и Невада, но во една од исто така важните држава Пенсилванија, којашто е традиционално „демократска“, републиканскиот кандидат Доналд Трамп неочекувано е пред ривалката.

Според податоците на Slate, предноста на Хилари Клинтон пред Доналд Трамп на Флорида изнесува повеќе од 100.000 гласа од околу 3,7 милиони гласачи кои ја искористиле можноста предвреме да гласаат. За Клинтон гласот го дале 48,3 отсто, а за Трамп 45,3.

Во Невада разликата во полза на Клинтон пред Трамп изнесува околу 32.000 гласови од околу 594.000 луѓе кои веќе гласале, а во Охајо таа разлика изнесува 53.000 гласови од околу 1,32 милиони гласачи. Во Охајо, според првичните резултати од предвременото изјаснување на избирачите, Клинтон добила поддршка од 47,8 отсто од гласачите, а Трамп 43,9 отсто. Во Невада 46 отсто гласачи ја поддржале демократката, а 45,4 отсто републиканецот.

Во Колардо, Клинтон освојува 46,3 отсто од гласовите, додека Трамп заостанува со 2,7 процентни поени.

Во помалку важните сојузни држава, Хилари Клинтон, исто така, е во водство пред противкандидатот. Во Висконсин во моментот на објавување на прогнозата предвремено гласале 18,3 отсто, од кои за Клинтон гласот го дале 52,6 отсто од избирачите, а за Трамп – 40,2 проценти. Во Ајова претходно гласале 35,6 отсто од избирачите и од нив 48 отсто ја поддржале Клинтон, а Трамп – 43 отсто.

Во Пенсилванија, каде што претходно беше прогнозирана сигурна победа на Клинтон, сепак, се случува изненадување. Според споменатите предвидувања, од 199.000 лица кои гласале пред време, Трамп добил поддршка од 99.000 или 49,7 отсто, додека за Клинтон гласале 85.000 луѓе или 42,7 отсто.

Пенсилванија, со своите 20 електорски гласови, е една од поважните држави кои го определуваат исходот од изборите во САД. За Трамп, доколку сака да се надева на успех, неопходно е да победи во Пенсилванија, додека Клинтон има голем број начини да стаса до конечна победа и без оваа држава. И покрај жестоката битка во сите сојузни држави, Пенсилванија од 1992 година досега секогаш гласаше за кандидатите на Демократската партија. Оваа североисточна држава, чии центри се Филаделфија и Питсбург, има 12,7 милиони жители.

На минатите претседателски избори во 2012 година мнозинството од гласачите во Пенсилванија, 51,9 отсто гласаа за актуелниот демократски претседател Барак Обама.

Релативната точност на оваа прогноза се базира на податоците од предвременото гласање со наведена партиска припадност на избирачите.

Со анализа на одѕивот на гласачите за прогнозирање на резултатите од изборите во осумте ткн „колебливи“ или „неодлучени“ држави се занимаваат експертите од компанија VoteCastr. Податоците на аналитичарите ги објавуваат онлајн весникот Slate и телевизискиот канал Vice News. Инаку ова објавување на прогнозите во САД пред затворањето на избирачките места се случува првпат по многу години.

Преќутниот договор за необјавување на прогнозите до затворањето на избирачките места дојде по претседателските избори во 1980 година. Тогаш медиумите објавија дека Роналд Реган е победник на претседателските избори уште пред завршувањето на гласањето во низа сојузни држава, и неговиот ривал Џими Картер го призна поразот, иако сите Американци во тој момент не го искористиле своето право на гласање.

Оттогаш, водечките телевизиски мрежи како CNN, ABC, Fox News и новинската агенција Associated Press го прогнозираат победникот во одделните држави до завршувањето на пребројувањето на гласовите но по затворањето на избирачките места, засновајќи се на своите статистички модели. Овие проекции не се официјални, но уживаат значителен авторитет меѓу Американците. Формално објавување на прогнозите до затворање на избирачките места во САД не е забрането со закон./крај/мф/сн