Основното јавно обвинителство Кавадарци поднесе обвинение против судијка од Основниот суд во Велес, двајца сопружници – сопственици на ланец аптеки и правното лице, кои се товарат за фалсификување службена исправа и за употреба на исправа со невистинита содржина.

За фалсификување на службената исправа како продолжено кривично дело е обвинета судијката која во текот на постапката беше и разрешена од судиската функција, додека управителката на ланецот аптеки и нејзиниот сопруг се обвинети за поттикнување при извршувањето на кривичното дело и за употреба на исправите со невистинита содржина.

Првообвинетата, постапувајќи во предмет во кој тужители се останатите обвинети, донела пресуда со која им го усвоила тужбеното барање и им утврдила право на сопственост на деловен простор и земјиште под зграда. Иако пресудата не била правосилна и извршна, а тужените навреме изјавиле жалби, судијката поттикната со умисла од сообвинетите, ја заверила со службен печат за правосилност и извршност со што свесно внела невистинит податок во службената исправа. Ваквата службена исправа со невистинита содржина таа ја дала на рака на управителката на правното лице, наместо преку судска достава.

Дополнително, како судија во вонпарнична постапка, обвинетата надвор од АКМИС системот за електронско управување со предметите во Судот, составила решение со кое на истите подносители им го усвоила предлогот за привремени мерки за обезбедување непарично побарување, со кое им овозможила на предметниот имот да впишат прибелешка во јавните книги со забрана за отуѓување и оптоварување. Потоа решила привремената мерка веднаш да биде извршна и примерок веднаш да биде доставен до Агенцијата за катастар на недвижности – Одделение за катастар на недвижности Велес. Решението било со невистинита содржина во поглед на податоците за наводно одржаното рочиште, а документот спротивно на судскиот деловник било доставено само до предлагачот.

Со посебно решение, таа ја задолжила спротивната страна да ги надомести парничните трошоци на предлагачите во износ од 1.124.308 денари, повторно веднаш давајќи и својство на правосилност и извршност на исправата, иако знаела дека се исполнети законските услови за повлекување на привремената мерка со што парничните трошоци би паднале на товар на подносителот. И ова решение не го доставила до останатите странки во постапката, туку единствено до предлагачот, со што ги оневозможила да користат правен лек – жалба.

За да ги прикрие сите противправни дејствија во предметите, обвинетата судијка свесно ги уништила службените документи – повратници и не ги споила сите документи во списите на предметот.

Обвинетите сопственици ги употребиле ваквите исправи со невистинита содржина пред Агенцијата за катастар на недвижности за да внесат промени во имотните листови во корист на обвинетото правно лице. Со лажно прикажување факти од судските постапки тие нанеле значителна имотна штета на спротивната страна, а за себе прибавиле значителна имотна корист. Парничните трошоци за постапката ги наплатиле преку извршител, иако знаеле дека барањето за извршување им е засновано на исправа со невистинита содржина.

И во текот на вчерашното деноноќие, екипите на ЈП Комунална хигиена-Скопје во три смени реализираа активности за рачно и машинско чистење на снегот и мразот на булеварите и поголемите улици во сите скопски општини, како и во пешачките зони во централното градско подрачје, велат од Комунална хигиена-Скопје.

Воедно, во скопската општина Чаир беа спроведени и вонредни активности за отстранување неколку диви депонии лоцирани на улиците Џон Кенеди – до ООУ „Васил Главинов“, Славеј Планина – во непосредна близина на скопското Теќе и булеварот Крсте Мисирков – зад т.ц. Мавровка.

Во рамките на овие активности беа подигнати и транспортирани вкупно 50 кубни метри непрописно одложен отпад, соопшти Комунална хигиена-Скопје.

„Во услови кога цените на основните производи растат во континуитет, а граѓаните едвај врзуваат крај со крај, актуелната власт повторно нуди неуспешни „решенија“ кои не ги менуваат основните економски реалности. Основните продукти станаа луксуз, граѓаните осиромашуваат, додека трговците акумулираат милионски профити и рекордна заработувачка“, велат од партијата Левица.

„Од анализата на цените на основните производи, забележуваме огромни зголемувања – свежото месо и млечните производи поскапеле од 15 до 80 отсто, а синдикалната минимална кошничка во 2024 година изнесува над 62.000 денари. Отсуството на регулатива и државна интервенција овозможија слободниот пазар да сервира нова порција богатење на елитите, врз грбот на граѓаните.

Големите трговски ланци, го зголемија својот профит за неверојатни 16,6 отсто за само три години. Ова покажува не само дека пазарот е нерегулиран, туку е и манипулиран, а инфлацијата, во најголем дел вештачки создадена. Владините мерки како „замрзнување на цените“ или „новогодишни кошнички“ се покажаа како симболични и неефективни мерки, за дневно-политичко залажување на граѓаните.

Наместо козметички мерки, Левица предлага: Ограничување на профитните маржи – задолжително и на долг рок, со редовна контрола од страна на инспекциските служби; Укинување на ДДВ за основните производи – директна помош за граѓаните; Зголемување на минималната плата на 450 евра – за приближување на животниот стандард кон оној во регионот; Реструктурирање на увозната зависност преку поддршка на домашното производство.

Македонскиот народ заслужува системски решенија кои ги надминуваат економските предизвици. Политичките мерки што служат за дневна пропаганда, не даваат никаков резултат. Време е да ја поставиме економијата на правилна основа во корист на народот. Во спротивно, овој економски концепт, продолжува да слугува само на мала група луѓе поседници на крупниот капитал, којшто непрекинато го зголемува јазот помеѓу богатите и сиромашните“, соопшти партијата Левица.