Фундаменталниот ислам не може да остави никакви последици на Балканот, бидејќи исламската култура е длабоко вкоренета кај локалното население со муслиманска вероисповест

Вакво мислење денеска во Скопје изнесоа високи верски поглавари, кои учествуваат на Петта средба на лидерите на исламските верски заедници на Балканот. Поглаварот на Исламската верска заедница на Косово, Наим Трнава, рече дека исламот на Балканот не е туѓ идентитет, туку е автохтон идентитет на просторот и како таков треба да се респектира.„Исламот е една чиста религија и нема ништо заедничко ниту со тероризмот, ниту со фундаментализмот и било каков терористички акт кој некои наводно во име на исламот го вршат, нема никаква врска со основите на верувањето“, рече Трнава. Тој потсети дека согласно исламското учење, да убиеш еден невин човек е како да си го убил целото човештво.„Воопшто не се плашиме од фундаментализмот. Исламот овде е присутен многу години и ние сме подготвени со заедничка соработка секое ново настојување или навлегување на фундаментализмот на овие простори да го стопираме“, рече Трнава.Слично размислување изнесе и Неџат Грабус, муфтија во Словенија, кој смета дека настаните околу распадот на поранешната Југославија и стариот систем, отвориле простор за појава на одреден вид на фундаментализам.„Не снаоѓање на самите држави по распадот на Југославија во делувањето на верските заедници, придонесе до тоа верските заедници да бидат несигурни сами по себе како да го организираат своето делување и во таа смисла се и процесите кои се појавија во поинаква примена на исламот“, рече Грабус.Тој изрази уверување дека таквите појави ќе поминат како олујно невреме и дека нема да остават долготрајни последици.Сметам дека исламот толку длабоко  е вкоренет на балканот и овие предизвици со кои сега се соочуваме ќе поминат како еден силен дожд, но долгорочно не може да остават некакви последици, бидејќи на Балканот живеат автохтони муслимани, исламската култура е многу развиена и постои хиерархија на исламската заедница“, рече Грабус.Тежина на настанот му даде и македонскиот премиер Никола Груевски кој денеска организираше свечен ручек за учесниците на Петта средба на лидерите на исламските верски заедници на Балканот. Како што соопшти неговиот кабинет, Груевски укажал дека на просторот на Балканот се преплетуваат многу вредности, дека тука отсекогаш заеднички живеат луѓе од разни нации и религии и дека претставува регион со многу емоции, многу енергија и многу љубов. Токму тие карактеристики, ја прават компаративната предност на Балканот и во тоа светло треба да се гледа таа вредносна полиномија која треба да се искористи во функција на сеопштиот напредок ,истакнал Груевски. Премиерот Груевски посочил и дека христијанството и исламот не учат дека треба да веруваме, да се почитуваме, да помагаме, да соработуваме, да го поддржуваме семејството, ближниот свој, но и својот сосед и сограѓанин, да даваме љубов и да работиме за остварување на заедничкиот успех. На ручекот присуствуваа поглаварот на Исламската верска заедница во Република Македонија Реис Ул Улема Хаџи Сулејман Ефенди Реџепи, претседателот на Дијанетот на Исламската заедница на Република Турција, д-р Мехмед Гормез, како и верските лидери на исламските верски заедници од Словенија, Хрватска, Босна и Херцеговина, Црна Гора, Косово, Албанија, Грција, Бугарија и Романија.