Политизацијата на јавната администрација е клучниот проблем со кој се соочува јавната администрација, смета дел од експертската јавност.

Политизацијата на јавната администрација е клучниот проблем со кој се соочува јавната администрација, смета дел од експертската јавност. Проблем, според дел од нив, е што ова прашање не е дел од Нацрт-стратегијата за реформа на јавната администрација, изработен од експерти ангажирани од Европската Унија во рамки на ИПА-проект. „Прво, концептот е погрешен. Со оваа стратегија немаме гаранција дека државната управа ќе биде професионална, ќе биде непартизирана и ќе може да одговори на потребите на граѓаните, затоа што немате никакво објаснување како тоа ќе се постигне. Не се ни третира делот на политизација. Чисто како информација, неодамна Европската Комисија објави извештај против дискриминација. Македонските граѓани, вкупно 80 отсто од нив во делот на дискриминацијата, сметаат дека најмногу се дискриминирани по политичка припадност. Тоа овде го нема. Ниту еден збор нема за политизацијата“, вели Лидија Димова од Македонскиот центар за европско образование. Според Слаѓана Тасева од Транспарентност – Нулта корупција, Македонија има прегломазна јавна администрација, што е неефикасна. Токму политизацијата ја смета како главна пречка за нејзината професионализација. „Би рекла дека тука е клучна политичката волја. Да не заборавиме дека недостатокот на професионализација во нашата јавна администрација се должи на високата политизација. Значи, многу политички влијанија во работата на администрацијата и начинот на обработувањето и напредокот, наградувањето во администрацијата мора да се подобри и да се сведе на јасни, транспарентни процедури и објективни критериуми“, вели Тасева. Вицепремиерот задолжен за европски прашања, Васко Наумовски, смета дека нацрт-стратегијата ги има вклучено најдобрите европски практики. Тој рече дека сите забелешки на невладиниот сектор, доколку се корисни и позитивни, ќе бидат земени в предвид. „Една од целите на Владата на Република Македонија е токму намалувањето на политичкото влијание во администрацијата. Усвојувањето на законските прописи за државните службеници, за јавните службеници и нивното влегување во сила има токму за цел да ја намали можноста од политичко влијание во администрацијата. Оваа Влада нема никаква цел да ја злоупотребува администрација за своите политички цели. Напротив, тоа сме го повториле повеќе пати претходно, ќе го повториме и денес дека секоја влада која што ќе ја зголемува администрацијата за политички цели, тоа ќе и се врати како бумеранг на таа политичка елита кога таа ќе биде во опозиција. Оттаму, ние имаме интерес Република Македонија да има една целосно деполитизирана и професионална администрација“, изјави Наумовски. Денешната дебата за нацрт-стратегијата одржана во Скопје е прва од серијата јавни дебати што ќе се организираат низ Македонија. /крај/ач