Поројните дождови што ја зафатија Македонија, кои заедно со топлото време придонесоа за топење на снегот доведоа до излевање на реките и поплави

Поројните дождови што вчера ја зафатија Македонија, кои заедно со топлото време придонесоа за топење на снегот доведоа до излевање на реките и поплави во повеќе општини.

Центарот за управување со кризи соопшти дека се очекува денеска акумулација Лисиче да го достигне максималното ниво.

Според ЦУК во општините Македонски Брод и Пласница има излевање на реката Треска кај селата Дворци, Ижишта, Лисичани, Пласница, Девич и Модришта, како и месноста Пешна.

Поради излевањето на Треска кај селото Пласница постои опасност од поплави на куќи и објекти. Кај селата Слатина и Грешница има наноси од дрвна маса на мостовите, додека на мостот кај Мала река забележано е попуштање на еден бетонски столб. Поплавен е дел од обработливото земјоделско земјиште, ливади и пасишта, но не е предизвикана поголема материјална штета.

Во општина Долнени, како резултат на поројните дождови и наглото топење на снегот, забележано е излевање на водата од неисчистените канали во атарот на селата Костинци, Пешталево и Заполжани. Поплавени се повеќе посеани површини со различни житни култури. Во селото Црнилиште прекинато е напојувањето со електрична енергија

Во општина Демир Хисар забележано е помало излевање на Црна Река кај селото Грешница, а има излевање и на реката Жаба кај селата Кочишта и Ракитница, кое предизвикало одредени оштетувања на пропустите за вода на патот и на некои мостови.

Во општините Радовиш и Конче не постои опасност од прелевање на речните корита, освен Конечка река која на едно место е излеана во обработливо земјиште.

Нивото на реката Вардар во тетовскиот регион е зголемено, но не постои опасност за излевање. Поголем проблем претставуваат помалите реки кои веќе се излеани од своите корита. Во селото Јеловјане е појавено лизгање на земјиштето, бидејќи водата со себе носи земја и песок и го затрупува коритото на Камењанска река. Зголемено е и нивото на реката во Боговиње и на реката Пена, но нема опасност од излевање. Проблем претставува каналот на потегот меѓу селата Брвеница и Фалуише.

Во скопскиот регион железничкиот сообраќај кај станицата Јане Сандански во Зелениково ноќеска од 20.00 до 00.05 часот, беше во прекин поради прелевање на водата кај самата пруга.

Во прекин беше и сообраќајот на патниот правец помеѓу с.Драчево и населбата Драчево во должина од 400-500 метри. Исто така, патниот правец кон с.Моране не бил прооден поради надојдените води. Жители од село Зелениково јавија за најдојдени води близу нивните живеалишта. Поради затнување на цевките во коритото од Крњевска Река во село Студеничани, водата била излеана до станбените објекти.

Сите реки на територијата на општината Куманово се со зголемено ниво на вода во своите корита. Опасност од излевање има на реките Слупчанка и Липковка.

Водостојот на реките во штипскиот регион е зголемен, но засега нема излевање на коритата./крај/с/ил