Македонија
НБМ ја зголеми задолжителната резерва на банките
Народната банка на Македонија (НБМ) денеска им наложи на банките зголемување на задолжителната резерва во странска и во домашна валута, како дел од
Народната банка на Македонија (НБМ) денеска им наложи на банките зголемување на задолжителната резерва во странска и во домашна валута, како дел од мерките за одржување на девизниот курс.
Задолжителната резерва на банките во странска валута се зголемува од 10 на 13 насто, од кои три проценти се издвојуваат во денари. Задолжителната резерва во домашна валута се зголемува двојно од 10 на 20 проценти. Истовремено НБМ им дава можност на банките средствата од задолжителната резерва во денари да ги користат за дневни ликвидносни потреби.
Ова, како што е соопштено има за цел да ја одржи стабилноста на девизниот курс, ценовната стабилност и финансиската стабилност во целина бидејќи ризиците продолжуваат да постојат со несмален интензитет.
Според податоците на централната банка дефицитот на тековната сметка во првите месеци од годинава двојно е зголемен, а нето-приливите се намалиле за 40 насто. Поради ова НБМ од почетокот на годинава интервенирала на девизниот пазар со 310,2 милиони евра, а состојбата на бруто девизните резерви на 22 мај годинава изнесувала 1,184 милијарди евра.
Продлабочувањето на дефицитот на тековната сметка се должи, пред се на намалувањето на извозот од 34,5 насто и на увозот за 16,7 проценти во првото тромесечје.
Стапката на инфлација продолжува со забавување и во април годинава е регистрирано намалување на трошоците за живеење од 0,5 насто, додека кумулативната стапка на инфлација во првите четири месеци од годинава изнесува 0,6 проценти.
Годишната стапка на растеж на вкупните депозити на банките во април изнесувала 6,3 насто, додека во март била 7,7 проценти. Девизните депозити во април се зголемиле за 23,6 насто на годишно ниво, а денарските се намалиле за 8 проценти.
Кредитирањето од страна на банкарскиот сектор на годишно ниво се зголемило за 21,4 насто, наспроти 25,3 проценти во март годинава, а поинтензивно успорување има кај кредитите за населението. /крај/со/мп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити на средба со словенечкиот амбасадор Прескер: Словенија за нас е пример во делот на заштитата на природата, инвестирањето во зелена економија и зелениот развој
Првиот заменик-претседател на Владата и министер за животна средина и просторно планирање, Изет Меџити, денеска, оствари средба со амбасадорот на Република Словенија Грегор Прескер.
На средбата се разговараше за досегашната соработка меѓу двете држави, кои имаат потпишано спогодба за развојна соработка помеѓу владите на Република Северна Македонија и Република Словенија и имаат формирано заедничка мешовита комисија за билатерална соработка.
Вицепремиерот Меџити истакна дека Словенија за нас е пример во делот на заштитата на природата, инвестирањето во зелена економија и зелениот развој.
Амбасадорот Прескер ја потврди подготвеноста на Словенија да ја поддржи нашата држава на патот кон ЕУ-интеграцијата и на имплементација на активностите со кои ќе се забрза зелениот развој на државата.
Меѓу другото, Меџити и Прескер разговараа и за тековните политички прашања.
Македонија
Муцунски до Столтенберг: Вашата значајна улога во турбулентните години го зајакна и модернизира НАТО
Министерот за надворешни работи и надворешна трговија, Тимчо Муцунски, во рамките на работната посета на Брисел се сретна со генералниот секретар на НАТО, Јенс Столтенберг, кој набргу ќе замине од оваа позиција. По тој повод, министерот му врачи на Столтенберг благодарница и плакета за извонредни достигнувања и придонес за евро-атлантската безбедност.
Изразвувајќи благодарност за неговото лидерство и водењето на организацијата, истовремено нагласувајќи ја важната поддршка за нашето членство во алијансата, министерот Муцунски го истакна значењето на личните напори на Столтенберг за зачувување на заедничките вредности и одржување на мирот и стабилноста во Западен Балкан, регион од стратешко значење за НАТО, известува МНР.
Воедно, тој ја потенцира и посветеноста кон политиката на отворени врати на алијансата како клучен фактор за зачувување на регионалната стабилност.
„Вашата значајна улога во турбулентните години го зајакна и модернизира НАТО правејќи ја алијансата покредибилна и поподготвена за зачувување на мирот и стабилноста во евро-атлантската област“, нагласи Муцунски на средбата.
Македонија
Трипуновски: МЗШВ и ФАО проблемот на повеќе од 2.000 земјоделци во Пелагонија го надминуваат со почнување активности за реализација на проектот
Министерот за земјоделство, шумарство и водостопанство, Цветан Трипуновски денеска присуствуваше во рамките на работилницата на проектот поддржан од ФАО.
Министерот се заблагодари на сите присутни што се дел од овој настан кој го означува почетокот на иницијатива што е од големо значење за земјоделскиот развој во Пелагонија, кој е еден од најважните земјоделски региони во Македонија.
„Денеска заедно со претставниците од ФАО сме во општина Битола, на расправа каде што се поканети и земјоделците, настанот означува отпочнување на проектот за решавање на децениски проблем кој што го имаат преку 2.000 земјоделци од овој регион“, истакна министерот Трипуновски.
Тој додаде дека досега земјоделците не беа во можност да го користат земјиштето за земјоделско производство заради сосопственост со државата. Но, со овој проект би се овозможило негово максимално користење.
„Министерството и ФАО ќе ги спроведат потребните активности за забрзано решавање на овој проблем кој што за жал долги години стоел како отворена ситуација“, појасни министерот Трипуновски.