Општината зацртала маркички за две четирикатници на педа место, на локација каде што има 16 гаражи со право на сопственост

Општината зацртала маркички за две четирикатници на педа место, на локација каде што има 16 гаражи со право на сопственост

Жители од неколку згради на улицата Вера Јоциќ, во близина на економското училиште „Васил Антевски-Дрен“, најавуваат тужба против општината Кисела Вода, бидејќи зацртала две згради, четирикатници, на местото на нивните легални гаражи. Жителите за да ја истераат правдата ангажирале и адвокат. Најавуваат и соборување на новиот детален урбанистички план „Цветан Димов“ пред Уставниот суд ако општинарите ги усвојат овие маркички.

Зградите се зацртани на парцела со 16 гаражи, градени во 1968 година, кои се сопственост на станарите. Тие се градени според тогашните закони, кои веќе не важат. Гаражите се водат како привремени објекти, но со право на сопственост. Во тоа време обврската за гаражирање не била на инвеститорот, туку на станарите.

Жителите велат дека проблем не се само зградите, кои пред една година ги зацртале претходните општински власти. Проблемот е посложен, бидејќи локацијата на која се нивните гаражи е предмет на денационализација. Ако таа му се врати на поранешен сопственик, инвеститор ќе може да почне да гради, а тогаш станарите ќе мора да се тужат со општината, но и со него, за да ја докажат сопственоста на своите гаражи.

– Ова го нема никаде, мој имот државата да враќа на друг. Сакаат да ни ги урнат гаражите, за кои плативме и имаме градежна дозвола, да ни го земат местото и да градат зграда. Ова е невидено. По никоја цена нема да дозволиме да ни ги урнат гаражите. А само да го видите просторот каде што општината ги зацртала овие две четирикатници. Меѓу три згради! Во стариот план за тука беа предвидени игралиште, зеленило и трафостаница. Немаме зборови – револтирани се станарите.

Новиот урбанистичкиот план „Цветан Димов 1 и 2“ се’ уште е во подготовка. Станарите во своите претставки од сегашните општински власти бараат да ја избришат маркичката. Шестотини и дваесет жители од шест згради на улицата Вера Јоциќ пред неколку месеци освен забелешките на јавната анкета за планот, поднесле и петиција со протест до општината Кисела Вода. Велат дека општината е незаинтересирана и си ја тера својата политика. Досега немаат никаков одговор од Кисела Вода.

– Единствениот критериум според кој се воделе планерите е трката за профит и ништо друго. Хуманиот аспект со новиот нацрт-план е потполно запоставен. Со ваквите решенија е целосно нарушено домувањето не само во овој станбен комплекс, туку и на околните пет згради. Не е водена никаква сметка за растојанието помеѓу зградите. Лудост е на овој простор да се градат две згради. Тука веќе живеат 700 жители од кои 140 се малолетни деца. Општината веројатно води ваква политика за да задоволи нечии интереси – велат жителите.

Тони Чуповски, портпарол на општината Кисела Вода, потврди дека на ова место општината зацртала маркички за две згради со габарит 20 на 14 метри и висина од 16,5 метри. Тој не ги коментираше најавите од жителите за соборување на планот на Уставен суд.

– Планот е во изработка. Примена е и жалбата од жителите за бришење на маркичката. Ќе го разгледаме барањето и ќе видиме што ќе правиме понатаму – изјави портпаролот.

Јорданка Ивановска