Првата група од 28 бегалци од Сирија и Ирак во четвртокот со авион пристигна од Грција во Словенија, во рамките на програмата за релокација на мигрантите од преоптоварените кампови во Италија и Грција, а според која земјата оваа и следната година треба да прими вкупно 567 баратели на азил.

Се работи за група на семејства со деца и неколку возрасни мажи кои по доаѓањето на аеродромот биле сместени во прифатилиште во Љубљана, пренесуваат словенечките медиуми. Постапката за нивната меѓународна заштита веќе е започната во Грција и се очекува дека нема да трае долго, но секоја молба за азил ќе биде разгледана индивидуално, објавило словенечкото МВР.

По престојот во прифатилиштето, бегалците ќе бидат упатени во центри за интеграции кои се наоѓаат во Љубљана и Марибор, а децата ќе бидат вклучени во школски програми. Словенија се обврза дека во рамките на договорените европските квоти оваа и следната година од Грција и Италија ќе прими 567 баратели на азил од загрозените држави, а месечно во земјата треба да пристигнуваат по 40-тина лица, а процесот кој требаше да започне пред два месеци веќе доцни.

Наскоро се очекува и пристигнувањето на десетина бегалци од Еритреја, кои моментално се наоѓаат во камп во Италија, но италијанските власти се уште на Словенија не и соопштиле кога ќе ги испратат. Во земјата веќе се наоѓаат 387 бегалци од големиот бегалски бран кој беше прекинат со затворањето на ткн балканска бегалска рута, а повеќето од нив се сместени во прифатилиштето во Љубљана./крај/мф/бс