Издавање под концесија на патни правци во вкупна должина од околу 380 километри најави во четвртокот македонската влада

Издавање под концесија на патни правци во вкупна должина од околу 380 километри најави во четвртокот македонската владаКако што појасни министерот за транспорт и врски Миле Јанакиески концесиите ќе се издаваат на рок од 35 години.За овој период, концесионерот ќе биде задолжен за изградба, реконструкција и одржување на делниците, за што се стекнува со право целосно да располага со наплатата на патарините, појасни Јанакиески.Тој информираше дека предмет на концесија се и постојните изградени автопатишта во Македонија, како и обиколницата околу Скопје, со цел полесно да се привлече концесионер во услови на светска криза.Делниците ќе бидат групирани во два пакета, со цел да се создадат концесиски пакети, кои ќе бидат финансиски исплатливи и привлечни за светските финансиски пазари.Првиот пакет, кој уште е наречен и Источен пакет, ги содржи делниците Крива Паланка – Романовце, Кочани-Штип, Миладиновци – Штип, Миладиновци – Скопје и обиколницата околу Скопје, во вкупна должина од 177,5 километри.Вториот пакет, или Западниот пакет, ги содржи патните правци Стенковец-Блаце, Гостивар-Ќафасан, Охрид-Требениште, Подмоље – Струга и Гостивар -Тетово – Скопје во вкупна должина од 196 километри.Идниот концесионер ќе биде обврзан во рок од осум години, по склучувањето на договорот да ги изгради делниците.Вкупната вредност на патиштата кои треба да се изградат е проценета на околу милијарда евра, а предвидено е и Владата да се вклучи со одреден надомест, чија висина ќе биде предмет на тендерирање.Одредувањето на висината на цената на патарината останува во надлежност на Владата, а предвидено е покрај постојните, да биде воведена само уште една патарина, на обиколницата околу Скопје.Јавниот повик ќе биде објавен во петок, а право на учество имаат сите домашни и правни лица, кои ќе ги исполнат условите.За најповолен концесионер ќе биде избран, оној што ќе понуди најголем концесиски надоместок и ќе ги исполни строгите критериуми.Потенцијалниот концесионер меѓудругото треба да има годишен промет од 500 милиони евра, во дејности релевантни за вршење на работа на предметот на концесијата.Одлуката за распишување на овој повик е донесена, по извршените анализи за исплатливоста на избраниот консултант француската компанија Луис Берже.Имплементацијата на концесискиот проект ќе го зголеми степенот на стручност, одговорност и професионално вршење на услугите поврзани со јавните патишта, истакна Јанакиески, додавајќи дека бенефит ќе има и градежниот сектор во државата./крај/ап