Македонија
Политичките структури изритирани од изјавата на премиерот Груевски
Остри реакции од опозицијата и владејачката албанска партија ДУИ следуваа денеска по вчерашната изјава на премиерот Никола Груевски, велат премиерот го покажал својот лажен патриотизам.
Остри реакции од опозицијата и владејачката албанска партија ДУИ следуваа денеска по вчерашната изјава на премиерот Никола Груевски, а политичките партии велат дека премиерот го покажал својот лажен патриотизам.
Од ДУИ велат дека 100 отсто од Албанците се за безусловно зачленување на Македонија во НАТО и ЕУ.
„Два милиони граѓани на државата им го пренеле суверенитет на политичарите и сета власт во историски моменти да носат историски одлуки. Правите патриоти и државници во овој историски момент се докажуваат. ДУИ е подготвена во овие историски моменти да ја носи својата одговорност“, изјави Џеват Адеми од ДУИ.
Од опозициската СДСМ велат дека Груевски наместо на вчерашниот настап да каже како ќе ги решава проблемите, тој според партијата објаснил зошто нема да ги реши.
„И нормално тука му се криви и Брисел и Вашингтон и цела меѓународна заедница и невладините организации и медиумите и се разбира пред се СДСМ и Бранко Црвенковски“, рече Андреј Петров од СДСМ.
Петров рече Груевски да му ги постави вистинските прашања на македонскиот народ дали сака нови работни места, поголеми плати, квалитетно здравство, Македонија да седи на иста маса со Америка во НАТО, со Германија и Франција во ЕУ и да има право на вето.
Сулејман Рушити од Нова демократија рече дека популистичката политика која ја води премиерот Груевски не се совпаѓа со приоритетите на граѓаните.
„За нашите приоритети треба да се дебатира и да се објаснат, а кога ќе ја добиеме поддршката од мнозинството и ќе ги реализираме“, рече Рушити.
Тито Петковски од НСДП изјави дека по изјавата на премиерот Македонија и понатаму е во потрага за државното единство околу клучното прашање.
„Се повикува на два милиони граѓани, а не се консултира ниту со опозицискиот ниту со албанскиот електорат. Тој говори во името на сите, но од позиција на ВМРО-ДПМНЕ“, рече Петковски.
Од ЛДП сметаат дека граѓаните не треба да очекуваат помош од премиерот, дека сами треба да се борат со тоа што ќе го сменат Груевски од власт.
„Премиерот вчера повика на јавен линч врз секој кој размислува поинаку од него, секој политичар, секој новинар, секој припадник на невладина организација, секој граѓанин на РМ. Не само што се збогувавме од европските пријатели туку и од европската перспектива и полека но сигурно се збогуваме и од демократијата во Македонија“, изјави Андреј Жерновски од ЛДП.
Премиерот Груевски на вчерашното обраќање пред Унијата на младите сили на ВМРО – ДПМНЕ кои прославуваа 20 години од создавањето на партијата рече дека Македонија сака влез во ЕУ и НАТО, но не по секоја цена, туку дека за тоа ќе одлучи народот на референдум./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Битиќи: Во среда да гласаме и да избереме заедништво и соживот
„Ви се обраќам со длабоко чувство за важноста на двојните избори во среда. Државата ни е на крстопат, одлуката која ќе ја донесеме ќе ја обликува судбината на Македонија во годините што доаѓаат. Вашиот глас нема да биде само исполнување на граѓанска должност, туку и влог во наследството кое ќе го оставиме“, вели во видео обраќање Фатмир Битиќи, потпретседател на СДСМ и коносител на листата на кандидати за пратеници на Коалицијата за европска иднина во изборна единица 2.
Тој истакнува дека секој глас е скапоцен, притоа посочувајќи дека избори може да се добијат или изгубат со мали разлики, но со големи последици.
„Затоа секој од вас е важен за да продолжиме по нашиот пат кон Европската унија. Да не дозволиме да отстапиме од тоа што седум години го градиме заедно и внимателно. Вашата желба за европски стандард и квалитет на живот е најважна, а тоа може да го исполниме со заокружување на бројот 1“, вели Битиќи.
Потпретседателот на СДСМ и кандидат за пратеник, Битиќи, потсетува дека пред седум години излеговме од сенките на поделеноста и заробената држава, притоа предупредувајќи дека национализмот и изолацијата повторно демнат, како што тој вели, на нашиот праг.
„Тоа не треба да не’ плаши бидејќи ние ја имаме моќта да одлучуваме за нашата судбина. Секој од нас сноси одговорност, никој не е изоставен. Без разлика дали сте земјоделци, учители, доктори или студенти – вашиот глас е важен. Затоа на 8 мај излезете на гласачките места и дадете го својот глас за СДСМ и Коалицијата за европска иднина, изберете го напредокот, оставете зад себе наследство на напредок, единство во различностите и просперитет“, порачува Фатмир Битиќи, коносител на листата на кандидати за пратеници на Коалицијата за европска иднина во изборна единица 2.
Македонија
Демократски сојуз ги повикува граѓаните да гласаат за Силјановска и ВМРО-ДПМНЕ
Демократскиот сојуз на Павле Трајанов ги повика граѓаните да гласаат за Гордана Силјановска Давкова и за коалицијата предводена од ВМРО-ДПМНЕ.
-Партиите кои се на власт, кои ги разградија институциите, ја криминализираа државата, ги загрозија националните и државните интереси, ги доведоа граѓаните во очај и предизвикаа масовно иселување, треба да одат во опозиција и да одговараат за грабежот и загрозувањето на опстанокот на државата. Во овие сложени состојби кога се одлучува за иднината на Македонија, Ве повикуваме на масовно гласање за промени, за Гордана Силјановска Давкова (2) и за кандидатите за пратеници на Коалицијата ТВОЈА МАКЕДОНИЈА, предводена од ВМРО-ДПМНЕ (Број 2), се вели во соопштението.
Македонија
Возач загина во сообраќајка на експресниот пат Штип-Кочани, повредени жена и две деца
Триесет и деветгодишен маж загина, а три други лица, од кои две малолетни, се повредени во сообраќајна несреќа што синоќа околу два часот по полноќ се случила на експресниот пат Штип-Кочани.
Во несреќата која била пријавена во 2:24 часот изутрина, учествувало само едно возило. Автомобилот „рено лагуна“ со скопски регистрации излетало од коловозот во близина на клучката кај селото Крупиште.
Возачот – 39-годишен маж од Скопје – починал, а сопатничката и двете деца се здобиле со повреди и се пренесени во болницата во Штип.
Увидот во несреќата е во тек.