Свет
ДНК тестoт потврди дека убиениот е Осама бин Ладен

ДНК тест со 99,9 процентна прецизност потврдил дека за време на нападот на американските војници во Пакистан, еден од убиените е Осама бин Ладен, јави Associated Press прес повикувајќи се на претставници на администрацијата на американскиот претседател Барак Обама
Како што дополнува агенцијата, какви и да се други детали за спроведување на тестот засега не се соопштуваат. Операцијата за ликвидирање на најбараната личност на планетава и прв човек на глобалната терористичка мрежа Ал Каеда, била извршена врз неговото скривалиште во голема куќа близина на центар за обука на пакистанската армија во Аботабад, во североисточен Пакистан.„Терористот број еден во светот“ бил идентификуван на самото место од страна на неименувана жена, која би требало да биде една од неговите жени, пренесува Reuters повикувајќи се на американски разузнавачки официјални лица. Покрај тоа, како што потврдено неименуваниот разузнавачки извор, резултатите од ДНК тестовите покажаа дека „сто процентно совпаѓање“ на гените со роднините на Бин Ладен. Во моментов, ЦИА ги проучува материјалите во големо количество запленети на местот на спроведувањето на операцијата против бин Ладен.Според разузнавачки извори, во акцијата бил убиен и еден од синовите на Осама бин Ладен и двајца курири на Ал Каеда. Акцијата траела четириесетина минути. Нема настрадани во редовите на американските војници и оперативци. Еден од пакистанските хеликоптери се урнал, но поради механичка грешка при што загинал пилотот.Информацијата дека Осaма бин Ладен се сокрива во Пакистан, живеејќи во релативен луксуз на само 50 километри северно од главниот град Исламабад, била криена во најголема тајност. Комплексот во кој се сокривал бин Ладен бил изграден пред пет години, но американските разузнавачи засега не знаат колку долго водачот на Ал Каеда таму престојувал, впечатливо ограден со висок ѕид и бодликава жица. Првите информации дека во оваа палата може да се крие Осама бин Ладен датираат од 2010 г.Американскиот претседател Барак Обама денеска изјави дека дал дозвола за операцијата пред една седмица и дека за тоа биле известени пакистанските власти.Пакистанското министерство за надворешни работи потврди дека бин Ладен е ликвидиран од страна на американската војска во областа на Аботабад рано во понеделникот наутро. Телото на терористички, според американските медиуми, било погребано во морето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Високите температури во Европа однесоа осум животи, додека температурата на континентот надминува 40 степени

Шумски пожар во Шпанија и високите температури во другите делови на Европа однесоа уште осум животи, додека температурата на континентот надминува 40 степени.
Двајца земјоделци загинаа во пожар во близина на градот Коско во Каталонија, во Италија двајца мажи загинаа на плажите на Сардинија, а маж во осумдесеттите години почина од срцев застој во Џенова.
Десетгодишно американско девојче се сруши и почина за време на посетата на Версајската палата во Париз, објавува Би-Би-Си.
Француската министерка за еколошка транзиција, Агнес Паније-Рунаше, изјави дека во Франција се регистрирани уште два смртни случаи поврзани со топлината и дека повеќе од 300 луѓе побарале итна помош.
Во Шпанија и Англија, јуни беше најтопол откако се водат мерењата. Шпанската метеоролошка служба објави дека просечната температура од 23,6 степени минатиот месец го сруши рекордот, надминувајќи го нормалниот просек за јули и август.
Франција го забележа својот втор најтопол јуни откако започнаа евиденциите во 1900 година. Јуни 2023 година беше потопол.
Топлотните бранови стануваат сè почести поради климатските промени предизвикани од човекот, според Меѓувладиниот панел на ОН за климатски промени.
Беше објавено дека екстремно топлото време ќе се појавува почесто и ќе станува уште поинтензивно како што планетата продолжува да се затоплува.
Свет
Кина: Европската Унија не треба да бара конфронтација

Кинескиот министер за надворешни работи Ванг Ји ја предупреди својата европска колешка Каја Калас за опасноста од „конфронтација“, се вели во соопштението од неговото министерство во вторник, додека Пекинг се обидува да се претстави како стабилна противтежа на Вашингтон.
Кина и Европската Унија „не треба да се сметаат едни за други за соперници поради нивните разлики, ниту да бараат конфронтација поради нивните несогласувања“, изјави вчера Ванг Ји на состанокот во Брисел со највисокиот дипломат на ЕУ. Калас вчера изјави дека Пекинг треба да престане да ја загрозува европската безбедност, наведувајќи ги кибернападите, мешањето во демократските процеси и нефер трговските практики.
Европа „се соочува со неколку предизвици“, рече Ванг Ји, од кои ниту еден „во минатото, сегашноста или иднината не бил предизвикан од Кина“.
Ванг генерално се обиде да го прикаже Пекинг како противтежа на администрацијата на американскиот претседател Доналд Трамп, која се закани со царини за стоки увезени од Европа. „Патот што го избраа Соединетите Американски Држави не треба да се прикажува како одраз на Кина“, рече тој. „Кина не е како Соединетите Американски Држави“, додаде тој.
Двете страни разговараа и за други прашања како што се Украина, израелско-палестинскиот конфликт и нуклеарната програма на Иран, се вели во соопштението на кинеското Министерство за надворешни работи. Пекинг и Брисел мора да покажат меѓусебно почитување, рече Ванг, додавајќи дека Европа треба да промовира „поактивна и попрагматична“ политика кон Кина.
Ванг вчера се сретна и со претседателката на Европската комисија, Урсула фон дер Лајен, и со белгискиот министер за надворешни работи.
„Кина и ЕУ мора да го поддржат мултилатерализмот и слободната трговија и да работат заедно за справување со глобалните предизвици како што се климатските промени“, и рече Ванг на претседателката на ЕК.
Ванг Ји ќе ги посети Германија и Франција пред самитот ЕУ-Кина на кој ќе учествуваат кинескиот претседател Си Џинпинг и неколку високи европски претставници.
Свет
Астрономите следат непознат објект кој можеби доаѓа од друг ѕвезден систем

Астрономите следат објект што се движи кон нас, а кој би можел да доаѓа од друг ѕвезден систем, објави АП. Научниците открија нешто што би можело да биде само третиот познат меѓуѕвезден објект што поминува низ нашиот Сончев систем, соопшти синоќа Европската вселенска агенција (ЕСА).
Безопасниот објект моментално е во близина на Јупитер, стотици милиони километри од Земјата, и се движи кон Марс, но според научниците не би требало да се приближи повеќе од тоа до Сонцето.
Сè уште е прерано да се утврди дали објектот – моментално означен како A11pl3Z – е карпест астероид или ледена комета, или каква е неговата големина и облик. Потребни се дополнителни набљудувања за да се потврди неговото потекло. НАСА соопшти дека внимателно ја следи ситуацијата.
Астрономот Жозеп Триго-Родригез од Институтот за астрофизика во близина на Барселона, Шпанија, верува дека станува збор за меѓуѕвезден објект врз основа на неговата необична траекторија и екстремна брзина додека се движи низ Сончевиот систем. Тој проценува дека има дијаметар од приближно 40 километри.
Првиот потврден меѓуѕвезден посетител бил во 2017 година. Именуван е Оумуамуа, што на хавајски значи „извидник“, во чест на опсерваторијата на Хаваи што го открила. Првично бил класифициран како астероид, но поради подоцнежните карактеристики бил класифициран како комета, иако неговата издолжена форма продолжува да ги збунува научниците.
Вториот познат објект за кој е потврдено дека доаѓа од друг ѕвезден систем е 21/Борисов, откриен во 2019 година и речиси сигурно е комета.