Постојат нови докази за измачување на затворените поддржувачи на убиениот либиски лидер Моамер гадафи во затвореничките центри на силите на привремената либиска влада, пренесува BBC, повикувајќи се на затворенички извори.

Постојат нови докази за измачување на затворените поддржувачи на убиениот либиски лидер Моамер гадафи во затвореничките центри на силите на привремената либиска влада, пренесува BBC, повикувајќи се на затворенички извори.

Затвореници од затворот во Мисрата за BBC тврделе дека биле тепани, камшикувани и подложувани на електрични шокови.

Началникот на воениот штаб на тој град ги отфрли обвинувањата. Обвинувањата доаѓаат на точно 100 дена по насилната смрт на Гадафи, кој беше убиен од поранешните бунтовници.

Шефот на канцеларијата за човекови права на ОН, Нави Пилај ја повика преодната влада на Либија да ја презема целосната контрола врз затворите. Таа во петок ја изрази својата загриженост за односот кон затворениците во Либија, особено кон субсахарските Африканци, за кои милициите сметаат дека се бореле на страната на Гадафи.

„Има измачување, егзекуции без судење, силување и на мажи и на жени. Нешто мора да бргу да се стори за да им се помогне на властите да ја преземат контролата врз затвореничките центри“, вели Пилај.

Претходно и медицинската хуманитарна организација Medecins Sans Frontieres објави дека ги прекинува своите дејности во еден од затвореничките центри во Мисрата поради се алармирачкото зголемување на случаите на измачување.

Голем дел од затвореничките центри ги управуваат милициите кои не се под контрола на владата во Триполи.

Дописникот на BBC, Гејбриел Гејтхаус, успеал да влезе во еден од тие затвори. Затворениците му рекле дека биле изложени на долготрајни тепања и дека биле камшикувани со електрични кабли.Сепак, затворениците изјавиле и дека ниту едно од наводните измачувања не се случило во затворот во кој влегол дописникот.

„Ме однесоа на испрашување на место кое го користи армијата. Мојата нога веќе беше повредена, а тие упорно ме тепаа по повредената нога додека ме испрашуваа, па сега е уште поотечена“, се пожалил еден од затворениците, кој побарал да остане анонимен.

Други затвореници изјавиле дека биле измачувани пред да бидат донесени во затворот.

Меѓународните организации за заштита на човековите права тврдат дека таквите инциденти се честа појава ширум земјата.

„Измачувањата ги извршува официјално признаената армија и безбедносните служби, како и огромниот број на разни милиции кои дејствуваат надвор од законските рамки“, изјави портпаролот на Amnesty International.

Луѓето кои управуваат со затвореничкиот центар во Мисрата велат дека знаат оти затворениците биле одведувани и измачувани, но немаат моќ да го сопрат тоа.

Истовремено, началникот на воениот совет на Мисрата, Ибрахим Беителмал, негира какви и да било малтретирања и тврди дека тие што обвинуваат имаа скриени агенди.

„Мислам дека луѓето кои работат под маската на хуманитарните организации или како лекари без граници се петта колона на Гадафи. Можеби имало неколку случаи во кои поранешните бунтовници се одмаздувале, но тоа не значи дека мојата канцеларија наредила да се измачуваат затворениците“, тврди тој.

Обединетите нации проценуваат дека околу 8.500 луѓе, повеќето обвинети дека му биле лојални на Гадафи, се чуваат во затворите и затвореничките центри ширум Либија. /крај/bbc/сс/